人類身份證

畢業就好似每個大學生嘅童話故事走到盡頭。好似《灰姑娘》裡面十二點嘅嗰部分——本應該係高潮，實際就好無聊。

十二點鐘一到，所有喺學校學到嘅野、榮耀、地位，仲有身為「學生」嘅保護罩，就好似六點鐘八號風球全部卸下。對某啲比較好彩嘅人，畢業其實就即係轉會，係從一隻布鞋轉到去另一隻玻璃鞋，不過係其中一頁轉折。對文學院人，畢業就好似係你永遠都唔願意承認已經發生——但係已經發生——嘅事。

五月完。你考晒所有試。每當你落街，遇到熟悉嘅街坊，你總係會被人以好善意的表情、聲調，好溫柔地問，你畢業未啊？你打算揾咩工啊？你有咩好路數啊？對於呢啲問題，你會扮曬唔好意思，扮你未畢業。然之後你答，你岩岩考完試，宜家仲未出Exam Result，都唔知道Grad 唔Grad到，然後就九秒九咁趁住下一個問題殺到嚟之前冇鞋挽屐走。事關呢啲解釋，其實都係掩飾：無論考成點，大家都預期你已經揾緊、或者揾到工。大家都喺度期待你下場。個個都好奇你會變成咩人，過咩生活——雖然又唔見呢班人平時會問你吃咗飯、買咗餸、返咗學未。

漸漸地，呢種問題，就好似瘟疫咁，從你嘅親戚、屋企人，漸漸擴大到大廈嘅看更。每次唔小心喺𨋢入面遇到隔離鄰舍，你又會被人問相同嘅問題。平時你去買早餐吃嘅嗰間早餐店嘅店員，又唔知點解好有默契咁樣問你。就連上高登、連登、睇Facebook Secrets、Twitter、Plurk都好，同你一樣相同遭遇嘅網友，開始無端端問你最近揾咗咩工，預計你有好多好路數打算分享俾兄弟；某D更離譜嘅，索性假設你已經揾到工，問題個前設就寫「我預計你已經揾到Full Time Job，你就好啦」——然後你又會以相同嘅，足以媲美人肉錄音機嘅播音效果，扮曬無辜（差在未滴眼藥水咁）再廣播多次：「嗱我未畢業架，我準備去畢業旅行，我計劃畢業以後先慢慢揾，人生係要慢慢享受架。」

於是你每日留喺個竇入面。但係毒撚一個留喺屋企其實都冇咩好做，毒撚都係人都會覺得無聊。你好快就意識到你唔可以出門。你唔可以去買書，因為你會晒曬你僅餘無幾嘅生活費。你唔可以叫外賣，因為外賣太貴。你大學時期嗤之以鼻嘅KFC頹飯突然變咗奢侈品。求其食個乾炒牛河都要四十幾蚊，蔥、芽菜分分鐘仲多過牛肉和河粉夾埋，點叫？挨麵包都嫌貴了，都係留喺屋企煮個營多算吧啦。你甚至唔可以去睇戲、買CD、行街買衫，呢啲全部都係資本主義嘅狗先會做嘅事。就連留喺屋企開冷氣，用電腦上網，做毒撚唯一會做嘅事都唔得：當你嘅屋企人溫柔咁提你下個月要交電費，扮曬蟹咁話下期電費肯定會好貴，而你又係每日唯一一個長時間留喺屋企嘅人，你唔想老豆老母每日都煩住你。所以你決定自制。你決定唔開冷氣。

你盤算，盤算除了繼續做你個三百蚊四堂，而且每堂仲要倒貼十蚊車錢入天水圍補習之外嘅後路：如果自己係個有啲姿色的女生，或者仲可以去做Part Time Girlfriend，但這些機會不是屬於你的。你只係一個連好好地對著女仔講野都無辦法，毒撚年齡等於出生年齡嘅死毒撚。或者你可以去日本做汁男。又或者你可以揾工。但係揾D咩？你冇做Intern、冇Final Year Project、出身鯨魚大學、Grade爛曬、讀冇任何特殊技能或者專長嘅英文系，Year1因為Gen科攞咗一次獎學金，攞過一個無咩人識嘅文學獎。你自問最犀利個範就是睇AV同埋寫膠文，派膠有無工返？回收膠可唔可以揾食？

你諗起日本某啲中年失業嘅男人，會怕到唔敢話俾老婆仔女聽自己失業，因為太大羞恥而且太大打擊，分分鐘家破人亡。最極端同埋正常的情況下，就要每日著住套西裝扮返工，實際上卻係留喺網吧、麥當勞鳩坐，搞到好似冇工開就冇人權——因為事實上真係冇。

你諗起好應景嘅歌詞——「我冇咗身為人嘅會員證／但你地唔好唔記得我／我知道我屬於呢度」。標題？「你仲想我講咩？」Dismemberment Plan 嘅歌本來係寫人失戀，但失下失下，你又覺得，你真係好似被個社會拋棄咗，又或者係你拋棄咗個社會。

諗到，你就覺得想喊。

然後你決定，都係留返啲水分嚟打飛機算。

作者：Altia

有點憂鬱有點傻。半個宅，喜歡故作感性扮大道理，但其實什麼都不是。Blog： http://altiahk.blogspot.hk/

閱讀後覺得好，請多多讚好及分享～：）