到底有幾仆街先可以唔畀人飲水?

 

話說呢幾日睇新聞見到有化妝師係Facebook講係尖沙咀某大商場個廁所遇到個清潔女工,言談之間發現原來所謂商場管理層唔畀清潔女工係工作時間飲水,而且要同每個去廁所嘅人打招呼,甚至見過同一位清潔工要係廁所食飯。

其實咩都唔洗講,唔比人飲水已經係荒謬絕倫,而且水係維持生命嘅其中一樣基本條件,到底有幾仆街先唔畀人飲水?難道呢位清潔女工可以不停飲水作為偷懶藉口?如果係,所謂管理層真係要驗一驗個腦。其實作為商場廁所,最重要係做好本份,即係清潔,而唔係叫員工同每個客打招呼,打招呼、搞關係應該係比其他人做架啵。如果廁所清潔做得好,用家自然會讚,口碑自然就會有,好似而家咁搞錯重點,坐這山,望那山,當然一事無成。

呢件事令我諗起電影《龍咁威》入面鄭中基守廁所嘅情節,佢將個廁所打理得乾乾淨淨,張學友入到去已經即刻讚佢,心情好,有話題,其實已經係一種好服務,只不過清潔工用另一角度提供服務姐。可惜所謂管理層唔明白不特止,仲要千方百計剝削員工人生自由,對待佢地好似監犯咁,呢樣先係最可恨嘅地方。

 

 

講到剝削,點可以唔提黨鐵,更過份嘅係佢地唔係剝削員工,而係乘客。港鐵附例第27條b寫明「任何人不得在已付車費區域進食或企圖進食任何食物或飲用或企圖飲用任何飲品(不論是酒精類或非酒精類飲品)」,如果違規係要罰款$2000!即係話,飲水都唔可以,真係不知所謂到一個點,飲水係人生自由,黨鐵憑咩可以禁止?

社會上其實好多法例都過時,需要調整,好似之前Hidden Agenda咁,問題係有幾多人會去關心?到有時先去發聲已經太遲,我哋仲要重複幾多次咁嘅覆轍?

 

 

作者:文探花

廢青一名,早上做教育,夜晚做音樂,醉心填詞,最欣賞林夕老師的細膩感情,最喜愛方文山老師的詩情畫意。不想在沉默中滅亡,深信堅持才有希望。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 163003
Date: 2017-06-28 15:50:49
Generated at: 2019-11-22 14:18:27
Permalink: https://www.vjmedia.com.hk/articles/2017/06/28/163003/到底有幾仆街先可以唔畀人飲水?