我今年三十二歲,準備吊頸自殺

最新文章綜覽 / 短篇小說

 

政府不斷打壓,我哋就不斷咁向前衝、向前撞。去到今日,我終於喺呢一片我喜歡嘅土地死去,死得不留痕跡……好記得先輩講過八九六四屠城嘅事,對我哋嚟講已經係六十年前嘅事。其實好多嘢對我哋嚟講已經好遙遠,而我哋相信一個政權係會不斷進步,無可能做Barbarian做足咁多年。但我哋錯咗。

二零四九年,五十二年,我哋失落咗嘅,比得到嘅更多。歷史真相,最終只可以困喺斗室入邊塵封,冇人夠膽拎出嚟。我哋拎住啲記載六四嘅舊報章,拎住啲講零三沙士係廣東省傳來嘅文章,拎住一四年先輩雨傘革命時嘅報導,我哋咩都做唔到,完全冇辦法傳出去。呢個年代,用Facebook就好似以前啲人用微博咁要實名登記,一有半點政治不正確就俾人秤去照肺,然後動不動就隔離你。生存喺度,冇自由,冇安定,十年前我哋仲講笑可能有一日去飲嗰陣除咗要帶人情仲要帶防狼棒,結果女朋友喺出席一個朋友婚宴時,因為做伴娘而被強姦……因為嗰個朋友係做政府,官官相衞,我哋報警都報唔到。

我係二零一七年出世嘅香港人,何致誠,今年三十二。我同朋友大家努力咗好多年,依家嘅我喺牢房入邊,準備吊頸自殺。我冇得揀我死定唔死,但我可以揀我點死。如果你係一個有讀吓書,識少少英文,偶爾接觸到外面世界嘅人,你一定想像唔到死刑喺香港係合法嘅——只要同政府不合,都有機會喺維園度當眾處決。至於點解係維園,聽聞係因為政府班人覺得維園以前年年都聚埋班牛鬼蛇神,亂嗡廿四,所以揀呢度,嚇吓佢哋。七月一號已經係好耐年前嘅抗爭日子,我哋呢代人冇再堅持落去,因為自政府啟動咗鄰舍通報機制起,根本我哋搞唔出啲咩。大型嘅示威遊行影低之後,一放上電視,啲人就會認吓有冇自己啲鄰居、朋友、屋企人,有嘅話就會舉報,舉報完就可以收到糧票。所以我哋呢班人每次出現都要蒙頭,都係做吓塗鴉製造吓細嘅騷亂居多。

今次我俾人捉到係因為我蒐集咗好多港珠澳大橋同埋高鐵嘅醜聞,而最觸動政府神經嘅當然係二零二八年嗰單:中國用高鐵運入大批軍事武器同設備,暴力鎮壓香港人。我其實都唔知寫低,留喺度會唔會俾人發現,會唔會俾人清走。但點都好,我都好希望呢段嘢可以俾人發現,因為我諗我係我嗰班朋友入邊死淨嘅最後一個……我好希望可以有人接手我哋儲落嘅嘢,線索係LOCKSHER SHOLME。祝你好運。

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 163093
Date: 2017-06-29 20:10:55
Generated at: 2020-09-22 13:16:26
Permalink: https://www.vjmedia.com.hk/articles/2017/06/29/163093/我今年三十二歲,準備吊頸自殺