我要證明俾人睇我唔見左嘅嘢,我要親手攞返!

 

公眾假期無乜野做,都係喺屋企hea下執下房睇下戲。今日開左《英雄本色》黎睇。細個成日都聽d人講話mark哥好型,而家自己睇返終於明點解。

「Mark!呢度已經唔係你同我嘅世界,你仲踎喺度做乜野?」曾經吒叱一時嘅江湖大佬豪哥被二五仔阿成出賣,喺台灣坐左三年監,返黎香港重遇好兄弟Mark,卻見佢跛腳兼生活潦倒,就問佢點解仲留喺是非之地。

「三年!我等左你足足三年!我地重頭黎過呀!」Mark為豪哥報仇而被槍傷致跛腳,又忍辱負重做為做左大佬嘅阿成做抹車仔,只係為左等豪哥返黎,一齊打返以前嘅世界返黎。但豪哥一心只想做返正行,過正常嘅生活,所以只係默默咁搖頭。

豪哥想平平靜靜咁做個的士司機,所以總係對做左大佬嘅阿成處處挑釁忍氣吞聲。你以為我不犯人就人不犯我,但敵人只會得寸進尺,一再挑戰你嘅底線。阿成陷害豪哥細佬(張國榮飾)、破壞豪工作嘅的士行兼捉左阿Mark去毒打。

「真係估唔到香港嘅夜景原來係咁靚。咁靚嘅嘢一下就冇晒真係有d唔抵!」俾人打到半死嘅Mark,喺山頂上望住維港兩岸嘅夜景,一邊讚嘆眼前嘅美景,一邊感嘆呢個地方已經唔屬於自己。

「我地從頭黎過呀!」Mark從來都無放棄過。「Mark!以前嘅野過左去嫁啦!」「咩過左去?!我仲未死嫁!」Mark深信自己一息尚存,戰鬥都未完結,自己都未輸。

「我有自己嘅原則,就係唔想成世人俾人襟住黎打!我等左三年,我係等一個機會!我要爭番一口氣,唔係要證明俾人睇我威!我要證明俾人睇我唔見左嘅嘢,我要親手攞返!」呢段對白好多香港人都背得出,但有幾多個真係明白,同真係做到。

「睇下你自己似乜野?!」Mark捉住阿豪指住佢黎鬧。「你有爭取過機會咩?你無呀!我唔想學你!」無爭取過機會,無親手去攞返自己失去嘅野,只會一直失去更多更多。

之後嘅劇情係點,你自己睇啦,我都寫到無心機寫。聽到廳個電視播緊煙花,我就訓喺張床度望住天花,視線越黎越糢糊。

 

 

作者:何夢

何夢
大學畢業後無業幾年,自稱專業廢青。而家塭到正職,決定疊埋心水全力邁向廢中之路。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 163271
Date: 2017-07-01 21:27:32
Generated at: 2020-07-10 17:02:59
Permalink: https://www.vjmedia.com.hk/articles/2017/07/01/163271/我要證明俾人睇我唔見左嘅嘢,我要親手攞返!