我們不應一視同仁

 

Aimee Mullins

 

好多時,我哋被教育嘅「平等待人」,只係去忽視一啲同自己唔同嘅人。
例如喺街見到個坐輪椅嘅人,大人會教小朋友:「唔好望住人哋呀。」
久而久之,就形成咗一種觀念——身體架構同大部分人唔同嘅就係殘障/有缺陷,一旦注視對方嘅不同就係歧視。例如你喺街望住個36-24-36嘅女仔係欣賞,望住個冇腳坐輪椅嘅女仔就係歧視。
於是,(撇除嗰啲喺鍵盤同喺當事人背後笑9人bully人嘅仆街之外)社會個正能量風氣就係扮冇嘢——「你同其他人冇唔同呀」。呃完自己之後心入面咪又好奇想望多人哋兩眼想知人哋嘅經歷。
當然本質上眾生皆人類,而眾生都受到肉身嘅限制,例如我生得矮就做唔到空姐,去睇啲企喺度嘅演唱會永遠都睇唔到台上嘅人。
但唔同就係唔同,每個肉身嘅特徵都冇需要被模糊,注視亦唔等於歧視。

話說,我近來識咗個網友,佢張propic係一張得一隻眼珠嘅大頭照。
第一眼睇到坦白講我有啲嚇親,而我都唔肯定相中人係唔係就係佢本人(你知網上嘅嘢啦)。傾咗幾句,我都未搵到機會問佢張相係咪佢本人之際,佢自己就主動提起:「係喎,你都見到我張相,你會唔會怕我?」
我:「張相係你本人?」
佢:「係呀。有嘢你可以問,我唔介意㗎,我反而介意零交流。」
既然佢咁大方,咁我都大方問啦:
「點解你會得一隻眼嘅?」/「會唔會影響你另一邊視力㗎?」/「你睇唔睇到3D電影㗎?」⋯⋯
如是者一問一答有來有往,我哋喺呢段對話中都冇尷尬,對我嚟講係一段好有趣嘅經歷,亦都係因為咁先會寫呢篇文。
(Btw,單眼係睇唔到3D電影㗎,Physics原理,不贅。)
(Bbtw,我唔知香港有幾多單眼人士,希望唔會麻煩到你哋啦。)

另一個例子係,大家都會出於好意叫聾人做「聽障人士」,彷彿直接指出佢哋係聾嘅會唔禮貌、
會感到唔好意思。
我有個學手語、接觸過聾人團體嘅朋友話,原來聾人係唔鍾意大家咁稱呼佢哋,佢哋希望大家稱呼返佢哋做聾人,而且佢哋係好proud of自己嘅聾人文化嘅。

我諗,社會所有小眾都想大家了解佢哋多啲,從而了解佢哋嘅需要(每個人都可以同時係某方面嘅大眾同另一方面嘅小眾)。可以的話小眾自己都可以主動啲大方啲,畢竟世人好多都面皮好薄呀。
平等嘅眼光唔等於將對方等同於其他人,而係不帶批判去了解佢嘅特徵,模糊或忽視只係逃避真正嘅對方。
當然,我唔能夠代表所有小眾嘅心聲,就算係咩人,都可能唔想人哋問佢咁多,但我哋永遠都唔會知道對方點諗。所以,有機會嘅時候,不妨輕輕問一句:「你介唔介意我問關於你耳仔嘅嘢呀?」
就算對方唔想講,我相信佢都會記得你嘅禮待。

另,
我記起某一次喺地鐵站內等𨋢,有個坐電動輪椅嘅男仔一下子去咗條隊嘅最前面,因為地鐵有圖講明坐輪椅係優先嘅,大家就冇出聲。
到𨋢門開咗,個男仔掛住低頭打機miss咗架𨋢(有人上前㩒返),後面啲阿叔攻擊力極高鬧到佢黐線,嗰一刻我覺得--「啊,呢啲就係平等喇」。(呢啲時候就應該一視同仁喇)

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 163761
Date: 2017-07-07 16:29:45
Generated at: 2020-04-05 06:08:40
Permalink: https://www.vjmedia.com.hk/articles/2017/07/07/163761/我們不應一視同仁