動物傳心呢樣嘢講咗好耐，無諗過最近成為熱爆嘅話題。嗱，我就文科出身，我唔識咩嘢量子力學，但係單憑陌生人遙距去睇你寵物嘅一張相，就可以分析到佢到底諗緊乜唔開心啲乜，個原理仲難理解過我同啲客解釋塔羅牌。
奈何我真係見過有客人去幫襯，同大家分享吓。話說我有個做空姐嘅客人，單身，獨居，佢當年仲做緊文職，見悶，所以養咗隻狗。隻狗幾靚仔，係狗樣，不過我鍾意貓多啲。佢做咗文職三年之後，轉去做空姐，仲要飛長線，問題就開始。
佢話隻狗原本好聽話，但係轉咗工之後，次次返到屋企，唔係周圍小便，就係咬爛哂佢啲衫褲；空姐話知自己成日飛咗去，已經搵阿妹屋企個工人每一日過黎一次打掃、帶狗散步同埋餵糧水，「每次過黎兩個鐘，我有比返補水佢添架！」空姐咁話，「都唔知點解 Felix 仲係咁百厭，定係屋企風水唔好？」
無錯，我認識空姐客嘅原因，係佢黎開牌問「應否搬屋」。
無論你有無養狗或者其他動物，喂，你嘅世界好大，但係寵物嘅世界淨係得你架咋！先唔好講狗要散步要媽媽抱，你唔喺屋企都算，仲要搵個唔識嘅人黎湊；好彩嘅話，個工人咪真係鍚隻狗囉！唔好彩嘅人地當打份工架咋！
大家有時喺屋村屋苑樓下應該都會見到，啲姐姐帶狗散步，邊度係散步架？坐喺度傾電話架之嘛！同埋佢話有帶狗散步啫，空姐客屋企連 Cam 都無裝，咁其實人地有無做足，你都無從考究噃……
我一路開牌一路咁同個客講，叫佢與其考慮搬，不如試下可唔可以轉飛短線，或者最基本裝返個 Cam 先；不過空姐客經我口中知道佢「唔駛搬」同埋「風水無問題」之後，佢始終無去做我建議嘅嘢，而係駛咗幾千蚊幫襯動物傳心。
幾千蚊嘅收獲係：Felix 話好想媽媽陪佢多啲，佢覺得好 Lonely 同埋好悶啊。
我聽完之後真係嘔血，陰公，你比幾千蚊我買塔羅套票好過啦，我 VIP 都開比你呀！呢啲說話有邊個聽完你嘅個案之後會講唔出呀？我講得多過佢添噃，連 Solutions 都比埋你呀！呢啲叫理性分析，乜鬼傳心啫？你話同隻狗見過玩過、從佢行為上推斷出佢想法，我都話你 Make sense 吖！憑張相？吓？做咩呀？隻狗眼神入面埋藏著 hidden message 要用幾千蚊去 unlock，係咪？
即係咁講，人與人之間明明已經享有共同語言，但係，唔通全部人都可以互相理解？你同你另一半都可能有溝通問題啦？BB 出世喊，你都唔會佢一喊就知佢係要換片、肚餓定係其他嘢架嘛！任何關係嘅相處，都係要經過摸索，先會有機會明白對方點諗（當然有啲人係一世都無法溝通）；明白完之後係咪可以互相體諒，又係另一回事！人類都係動物吖，唔通你睇 FB 上面一日咁多張相，你就知相中人嘅心路歷程嗎？
不過……大道理講完之後，諗起空姐客話咁就幾千蚊……
我不如考慮轉行？以後唔叫神婆，唔叫師父，我叫自己做人類傳心師，你比對方嘅相我，我幫你睇佢面相（其實我唔識）；你黎開牌，我幫你剖釋對方嘅心理，喂聽落幾 Pro 吖係咪？
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2017年7月11日
