放榜買報紙？你不能不知的升學小貼士！

DSE放榜臨近，咪話我唔教精你哋，升學係有竅門的，例如要買份報紙。

細個開學日，呀媽塞咗成棵葱同芹菜入我書包，用紅帶紮住。何解呢？因為葱即聰、芹即勤，寓意讀書聰明同勤力，望子成龍。不過講真，當時年紀太細乜都唔識，朝早打開書包時仲以為呀媽用買餸冇袋用，係咁叫老母拎返走，你知啦，成嚿嘢突起晒好唔方便，結果我全日喺學校拎水樽、拎文具出黎都要好小心，廢事潛咗棵葱出黎，畀人笑到面黃。

細個笑老母，大個仲迷信過老母。到會考放榜果陣，記得朝早約咗個同學食早餐。食完之後，本身打算趕返學校，同學竟然話：「老閪都買份報紙先啦！」。派報紙就多姐，叫我睇報紙？不了。原來買份《星島日報》磧書包，可保平安上中六，因為「星島」諧音「升到」，好吉利，從此以後，「老閪都買份報紙先啦！」呢句我銘記於心。

嗰朝我哋撲咗幾間報紙檔都話冇，可想而知考生們個個都貪意頭。其中一檔個報紙佬講：「冇晒星島喇，明報就好多，要唔要呀？」，同學話：「佢都on99，懂不懂規矩？放榜日《明報》賣淨蔗是常識吧。」原來俗語有云：「《明報》明報，明年再報」，言下之意，即係今年升唔到，明年再報考，你話幾大鑊呢？最後我哋都買到《星島》，然後真係順利升到中六，去到中七放榜又點樣？老閪都買份報紙先啦，有份《星島》磧袋，心都定好多。

有啲考生仲識玩，買完《星島》後會搭份《東方日報》，取其「don’t 慌」偕音，都係傳統嘢嚟。如果夾埋《星島》、《東方》各一，就係「升到，don’t慌張」之寓意，雙重意頭，心安又理得。

不過都要小心行事，唔好亂咁買。放榜日，份份報紙頭版都離唔開放榜資訊，當中不乏升學廣告。聽過有一年，《明報》定唔記得咩報，封面係副學士/HD廣告，大大隻字歡迎學生報名之類，聽到都打個突，成件事非常唔好意頭。雖則話「條條大路通羅馬」，不過放榜都係希望自己升到上去：中五升中六、中七升大學，而家就中六升大學，所以見到封面咁樣嘅報紙，請自己執生。
事過景遷，呢一兩年問返啲妹豬，已經全部唔識呢樣嘢，連聽都未聽過，仲叫我咪搞笑。放榜買報，係一門學問，係漸被忘記嘅香港非物質文化遺產，為咗莘莘學子着想，我哋要好好承傳同推廣。

大學嘅「過三利是」，其實都有異曲同工之妙。利是金額一般係$1.3：個三者，過三也，取其GPA過3.0之諧音。如果加個十蚊就變$10.3：十個三，乃實過三也。改制之後，中學生除咗買報紙外又多樣嘢可以做，因為「過三利是」同樣可以應用於DSE ，不過送利是時，切記唔好順口祝人「過3爆4」，DSE 過3爆4……爆4……你自己諗喇。

放榜日，老閪都買兩份報紙先，一份星島、一份東方，鍾意嘅再夾封利是，三重保險，保你平安大吉順風順水，不過
.
.
.
.
.
.
.
冇溫書嘅就算啦好嘛。

作者：潮文社

潮文社，實錄生活百態、個人小品，以流行通俗形式表達，由社長親筆原創，亦歡迎投稿。專頁：https://www.facebook.com/9.Literature

閱讀後覺得好，請多多讚好及分享～：）