「主題樂園」的職場卸膊操

 

早排ViuTV有主題樂園員工呻啲麻煩客,我呢篇就仆街啲,呻啲麻煩同事。
對我嚟講,一百個麻煩客都比不上一個麻煩同事。個客再麻煩走咗之後都冇咩機會再見,但同事尤其上司,如果唔幫你唔企你嗰邊,你明啦。

話說,上禮拜去咗睇《小人國6》。
好多人就算冇睇過現場,都大概知道有個經典scene叫「職場卸膊操」
點知嗰晚現場睇完卸膊操,第二日返工就有人表演喇科科。

我喺主題樂園返part time嘅,唔係好多人知我哋有條team係專帶啲learning program,參加嘅團體通常都係學校、社區中心或者課外活動中心,program由幼稚園程度去到大專都有。
我每次就帶住十幾個學生,唔用mic咁帶三個鐘頭program,喺樂園度周圍走,去到邊教到邊。至於帶咩program就公司安排,自己冇得揀嘅。

講返卸膊操事件,roster上我當日要帶program A嘅,但一個禮拜前收到email通知轉做program B,okay啦,呢啲情況都普遍嘅,有時遇著突發情況(例如有同事call sick),即日先通知轉program都有試過,呢啲時候大家都明嘅。
而因為我哋係part time,返工日子又唔固定,所以公司都好好嘅,前一日會個別send SMS嚟提同事第二日返工,好偶然先會send漏一次半次。
雖然卸膊操前一日冇收到SMS,但第二日我都自動自覺返咗工。

好喇,到返工當日,staff張list上面冇我個名喎,咁我就問啦——原來佢哋調人調program調嚟調去調到調走咗我佢哋自己都唔知呀。
Coordinator check完發現我今日真係唔使返工之後,就咁講喇:

「點解你尋日唔打電話嚟問呀?」

嘩嘩嘩嘩嘩!好正呀!!!一句說話就變咗係我疏忽呀!
既然收到轉program email,肯肯定知道要返㗎嘛,我點知佢係漏send定未send喎(扁嘴),如果係未send嘅,我打去問又畀人話我催佢做嘢就唔好啦(攤手)。
唔通我對住部電話等到佢收工,「嗯,仲有五分鐘佢就收工,都未send SMS嚟唔通係漏咗?(頭頂燈泡)等我打去問問先!」
我好忙㗎,放假要出街玩㗎okay?

我最介懷嘅唔係佢哋唔記得通知我,講聲唔好意思就得。坦白講我自己做嘢都會甩漏,都唔係百分百零失誤,但我一發現會即刻道歉同補救。
Okay,就算唔道歉(其實根本就冇可能會道歉),都唔使順口一句就將個責任推畀我丫(冇心的話仲死呀,即係本身個人已經習慣咗咁樣,卸膊已經變成反射動作喇)。

雖然事後Coordinator再調人手,我照出program,照有糧出,但佢講咗句:「總之你宜家有program出有糧出就happy happy啦!」
你老味,我心諗。

同青年才俊舊同事呻,佢話:「佢攞彩咋嘛,你慌佢唔知自己理虧咩,如果唔係佢點會幫你安排返啲嘢丫,仲唔由得你企喺度食風咩?」
我:「直接解決個問題唔得㗎咩?佢喺其他同事面前一句就推個波落嚟,我火滾到反應唔切,出咗間房先諗到點串佢。」
才俊:「你唔好同佢一般見識喇,佢一世都係打呢啲工,出到去都做唔到其他嘢㗎啦。」
又好似係,聽佢咁講完我又即刻gur咗。

另,
我知,要睇開啲丫嘛,度度都係咁㗎啦blahblahblah,但如果我接受呢句說話,就係被同化嘅第一步。
他日如果我有下屬,我都會對佢講:「點解你事先唔問我呀?」

 

(下次講下第二個仆街同事。)

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 164511
Date: 2017-07-18 04:59:02
Generated at: 2020-03-30 04:32:54
Permalink: https://www.vjmedia.com.hk/articles/2017/07/18/164511/「主題樂園」的職場卸膊操