吓?契弟?肥佬黎教精你無錢開飯嘅話契弟都無得你做呀!

 

話說坊間有傳肥佬黎為壹傳媒賣盤做足準備都講咗成大半個月,由一開始有傳蘋果日報副刊《果籽》會有人事變動同改革,再有壹傳媒工會Page夾埋蘋果日報記者連續半個月不斷炒起啲轉手呀外判新聞、工會聲明咁。結果呢單嘢就一傳十、十傳百咁傳開去,呀肥佬黎喺中段都有跑出嚟定軍心添。點知佢尋日就一吓回馬槍,拆件將壹傳媒期下嘅《壹週刊》以港幣5億嘅售價賣咗畀黃浩,引嚟唔少社會大眾嘅嘩然。

到底點解肥佬黎寧願做契弟都要收呢五億?不如齊齊拆解吓。:O)

 

壹傳媒蝕到入肉 全年蝕足3.93億元

小弟諗呢個都係主因嚟㗎啦,我哋睇睇《蘋果日報》喺今年6月中嘅報道截文先:

「期內收入按年減少23.4%,至17.84億元,主要源於集團印刷刊物在香港及台灣的廣告收益大幅下跌。報章出版及印刷業務收入按年減少24.3%至9.06億元,主要因集團報章產生的印刷廣告收入及發行收入下跌,及《蘋果日報》的刊頭及出版權錄得2.024億元的減值虧損所致。」

其實傳媒要接廣告先有飯開,我諗呢啲嘢都係人所共知,咁喺依家呢個市場環境之下,又係咪成個行頭得壹傳媒一個係蝕錢呢?咁諗就錯啦,另一報章龍頭《明報》同埋電視界C9殺手CCTV_ 都係蝕錢或者賺少三分二收場,咁壹傳媒無廣告接而蝕錢都相當合理?老老實實,講真嗰句,當生財工具賺唔到錢,作為商家佬嘅責任,就係諗方法將件負資產變返做賺錢工具,抑或拋棄佢開條新路出嚟畀自己行,咁壹傳媒喺呢方面嘅操作都唔係第一次實行嘅,只係肥佬黎以前唔係賣盤而係直接將賺唔到錢嘅嘢摺埋,就好似《FACE》呀、《忽週》咁,至於今次點解肥佬黎會選擇賣盤呢?賣咗盤又會點?下文繼續分析。

延伸閱讀:
【業績速報】壹傳媒全年蝕3.93億元
【業績速報】《明報》母企世界華文全年純利跌15%
【TVB業績】去年純利倒退62% 因回購股份暫緩派息

 

《壹週刊》賣盤 對員工、公眾係好係壞?

咁到底肥佬黎為咗啲乜而決定揀唔摺《壹週刊》,而係賣畀黃浩呢?嗱以下嘅原因純屬本人按新聞資料分析出嚟,並非為肥佬黎本人口講出嚟,至於佢他日點向大眾交代就係時後話。依小弟嘅愚見,《壹週刊》賣盤嘅原因主要有兩個:其一,肥佬黎想將《壹週刊》賣盤得嚟嘅資金用於止蝕,順勢淨返嘅流動現金可以繼續營運《蘋果日報》。其二,將《壹週刊》賣畀有意喺娛樂界發展嘅商人,可以延續到《壹週刊》嘅日常運作之餘,仲可以保留舊有員工以作日後發展之用(假設佢哋係會聽新老闆支笛)。

咁講返第一個原因先,睇返黃浩喺尋日收購《壹週刊》嘅細節:「5億港元當中,3.2億元是付予壹傳媒的,另1.8億元是注入雜誌業務的。交易將出售集團內多本雜誌,包括壹週刊 (香港)、壹週刊 (台灣)、《Next+One》、《ME!》,以及已停刊的《忽然1周》、《FACE周刊》及《FACE周刊》的前身《壹本便利》」可以睇得出呀黃生除咗《蘋果日報》之外,基本上其他娛樂性質嘅週刊都幾乎買哂,呢一點又可以見到肥佬黎想專注返喺報道日常新聞嘅《蘋果日報》身上,同時唔使驚有乜紅底資金流入《壹傳媒》從而被操控,繼而變成第二間香港攻受嘅傳媒,眾所周知畀人叫做立場親泛民主派嘅《蘋果日報》都係其中一間深受大眾歡迎同喺Facebook share新聞嘅其中一個傳媒,事實上佢比起香港攻受嘅話,大眾一般會易接受好多。最少,肥佬黎喺呢一刻上仲係守住佢自己嘅陣地,兼且將件負資產轉為生財工具撐返住壹傳媒嘅其他業務。

第二個原因,黃浩其實早喺2013年收購《都市日報》,兼且喺2015年已經有接收當年停刊嘅壹傳媒旗下雜誌《忽然一週》員工,可見黃生對傳媒同報刊業有幾大野心,再睇埋佢近年喺娛樂圈嘅「偉大」事蹟,就係喺2012年黃生曾經大爆有偽人喺佢經營嘅餐廳內吸毒,又指自己餐廳內嘅CCTV已經錄低哂啲證據,結果引嚟一眾偽人嘅抨擊同抽水,甚至去到佢同徐淑敏嘅婚禮都仲要畀演偽界嘅米奇老鼠兜巴星,搞到要驚動警方。可想而知,黃浩對香港娛樂圈嘅野心同仇恨值,配合埋壹傳媒獨有嘅賤格口風同照妖鏡,一定能夠為熱愛娛樂同追逐偽人嘅香港人帶嚟無盡嘅花生同歡樂嘅啫,你話係咪呀,哈姆太郎?再者,上面都有講黃浩有接收壹傳媒員工嘅經驗,咁今次直接收購人哋成個壹週刊,都無理由唔需要人手,或者唔留住舊人去維持《壹週刊》嘅運作,所以《壹週刊》嘅員工理應唔會失業,除非佢哋唔習慣新老闆嘅公司政策而走人,不過以尋日工會同黃浩喺網上隔空嘅對話,睇怕佢哋短期內嘅關係都唔會好得去邊。

延伸閱讀:
【壹週刊賣盤】黎智英保證不賣壹傳媒 CEO指未來數年維持《蘋果》紙本
【壹仔賣盤】黃浩:同事溝通唔到無辦法俾佢留低! 《壹》仔員工︰我一定唔會打佢工!

 

其實喺一般大眾嘅角度嚟睇,肥佬黎呢步棋確實行得唔錯,由搞時裝起家到轉型搞報章、傳媒生意,再去到成為一般泛民主派政黨/組織嘅金主,成個觀感係佢確確實實喺壹傳媒、《蘋果日報》到搵到佢自己嘅定位同想做嘅嘢。最少,佢的確無賣走成個壹傳媒,佢的確有畀人話佢係契弟嘅勇氣,佢的確最終都守住《蘋果日報》呢個平台,同時幫自己同佢啲員工保返住個飯碗。反觀香港人,有幾多人係為咗份糧而做老闆個契弟,又有幾多香港人係做完我契弟都唔敢認,甚至呃自己其實無為咗份糧而做契弟,仲要做得好好。骨氣呢家嘢真係唔係人人有㗎。

 

作者:健華

90後廢青,如果你認同我的文章,可以多留意一下輔仁媒體的廣告及其他文章,以表支持,如對文章有任何疑難,歡迎PM。fb: https://www.facebook.com/KelvinKinWa.7

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 164522
Date: 2017-07-18 04:20:29
Generated at: 2021-06-23 04:31:47
Permalink: https://www.vjmedia.com.hk/articles/2017/07/18/164522/吓?契弟?肥佬黎教精你無錢開飯嘅話契弟都無得