喺香港，係要完成唔到嘅嘢先可以叫夢想？

睇新聞發現又有個十優狀元有銀行唔做去追藝術夢。

夢想呢樣嘢真係神奇，順順利利嘅唔係夢想，本身條件唔好嘅又唔係夢想。

大家諗下，如果一個出身於富商家庭嘅人，獨生子嚟嘅，話：「我嘅夢想就係繼承家業。」然後佢又順順利利咁繼承咗家業，相信冇人覺得佢係實現咗夢想嘅。

另外，如果一個人由細到大嘅夢想都係工程師，然後公開試考得廿幾分，僅僅入咗中大工程系。佢同佢啲親戚講話佢嘅夢想就係讀工程，相信佢班親戚又係會嗤之以鼻：「唓，你讀唔到Law先走去讀工程啫！」

凡係足以被大眾認同為夢想嘅嘢，一係你就係經歷千辛萬苦，一波三折咁去達成，一係就要犧牲其他選擇，去揀一樣其他人覺得唔抵嘅選擇。

所以，十優狀元讀醫係會被人話冇夢想嘅，因為太順利喇（人哋付出咗幾多，我哋當然唔知啦！），同埋冇犧牲。

如果你公開試得3分，然後返中國讀醫，最後考到個喺香港行醫嘅資格，而班香港人又唔會覺得損害到自己嘅醫療保障嘅話，大概會讚美之聲不絕，話你有毅力，食腦等等。

相反，你係十優狀元，但係你揀讀物理、工程、數學甚至哲學，香港人又會一邊表面上好欣賞你，話你有夢想，心底裡就笑你戇鳩。

所以，喺香港，要令人由衷咁覺得你達成咗自己嘅夢想，你都係唔好有十優喺身，亦都唔好有錢，最好就貧窮家庭出身，公開試零分，然後發奮向上，到你有一番成就嘅時候就可以話你嘅夢想已經達成咗喇。

作者：哲學仔

一條哲學廢青

閱讀後覺得好，請多多讚好及分享～：）