其實我可唔可以無夢想呀?

 

「你有無諗過第時個家庭係點?」

「其實你都做左野幾年,有無諗過幾時買樓?」

「喂,你寫野架?一篇要寫幾耐?咁點解唔拎啲時間黎搵錢?」

「唔係話一定要你點做,但都咁大個人啦,係時候諗下將來啦。」

由廿五歲開始,我一直聽到呢啲說話。有時真係會有種錯覺,自己係拎緊綜援,定係做左邊緣青年。

而通常會咁問嘅人,其實都係打份工,返朝九晚六,當中有幾個仲真係完全按章工作,每日可以準時走準時返屋企食晚飯嗰隻。但一講到人生路向,佢就會講自己打算幾多年後做到咩職位,大概幾時會同另一半結婚生仔。

尋日同朋友食晚飯,求其走左入間西餐廳。

傾傾下又去左前途問題,然後問我打算點,我話無咩打算,雖然有時要OT,但工作都尚算滿意,我唔係公務員,但工作能力都唔差,升職只係時間問題,我又唔打算特別搏命。每個月夠洗夠食儲到錢比到家用,剩返啲時間拎黎打下機寫下野,仲有啲閒錢可以打機課下金……生活都算得上寫意。

「你諗住以後都係咁?有無plan過之後要點?」朋友一副要點醒我嘅口吻。

「無呀。」喂咁真係無丫嘛,我又唔係失業。

「下?」呢種人最乞人憎嘅位係擺一副好錯愕嘅樣,一種「你有絕症但都唔醫?」嘅口吻,提示你應該點做點做,如果係呢類,都唔算交錯朋友,但有啲真係純粹因為你生活方式唔同,佢睇唔順眼就黎騷擾你生活嗰隻,唔會提供任何建議。

「咁請問我可以點做?」我無可奈何咁笑,都叫做虛心求教啦掛。

「進修下,增值下自己……set下啲target,年尾再evaluate,咁先有進步架嘛。另外呀,你依家有女朋友,成家立室要好多錢架,我岩岩結婚,過來人提醒下你姐……」呢個世界係好搞笑,永遠都會有人無啦啦「比下意見」,「溫馨提示」等等……喂我又無問過你意見,又無話我唔記得啲咩,你講完堆野最後加五個字「提醒下你姐」戴左頭盔就大晒。

我微笑,然後痛下殺手。

「其實咁嘅,你同女朋友一齊咁耐,聽你講啲洗費都係你出多,我呢段時間都有儲錢。依家你地終於結婚,你搵得少過我,你都搞得掂啦!我真係無擔心過。」拿,真係唔係人身攻擊,但呢位仁兄近排因為無戴套做爸爸,局住結婚洗一大筆錢,個寶貝仔要外家養嘅,你叫我每年evaluate,你有無諗過去紅館開棟篤笑?

「我都係關心你姐,你發咩脾氣?」

「喂,咁客觀陳述姐。咁都唔係有一個家庭,每個月搵到幾多錢先叫里程碑架……我有返工有交稅有養父母,你咁都要研究我上唔上進,不如我求你比條生路行下?」其實岩岩講完

「唉,你單身得耐,份人愈黎愈孤僻!」基本上佢唔係答緊我,我開始明白女人一直搵唔到岩嘅人,等到變左中女,然後比人屈性格有問題同眼角高嗰種感受,要話你嘅人,佢地唔會聽道理。

我可以繼續同佢傾落去,但因為我單身得耐,份人愈黎愈孤僻,所以唔太想溝通落去。

「好啦,我試下啦。你搵兩萬一個月,老婆做家庭主婦,聽講幼稚園學費好貴,你每年都自己evaluate下會唔會撐唔住要離婚啦。」我個表達都算簡單易明。

「我首先就evaluate下我地段友誼!」仁兄拍檯走人,真係好似電視劇咁。

我呆望住成檯未食夠一半嘅食物,心諗:頂!局住埋單,算唔算有份助養佢個仔?

……

事後,我發覺自己真係孤僻左好多,因為,對於一個自我感覺良好嘅人,兜頭淋盤冷水埋去,竟然令我有種莫明嘅快感。

 

 

作者:求其花

求其寫,求其賣,求其志不求奢華|求其真,求其愛,求其花不求其果

閱讀後覺得好,請多多讚好及分享~:)

其他熱門文章

  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
  • 【Reg Day 攻略】大學新生註冊四件事 by Cube
    不要以為,Reg Day只是單純報到,拿張學生證就完事。這一天是十分重要的,不想留下不愉快的回憶,就要好好準備了。…
歡迎讚好我們的facebook page,免費資訊源源送上。

文章資訊

ID: 164727
Date: 2017-07-20 06:17:41
Generated at: 2022-08-10 12:12:45
Permalink: https://www.vjmedia.com.hk/articles/2017/07/20/164727/其實我可唔可以無夢想呀?