討好下屬,比討好上司更有用

 

上次講咗個咗卸膊女同事,今次講下另一個仆街男同事。
上次主要就想發洩,但今次除咗發脾氣之外,都有啲嘢想討論下。

(前情提要:我喺主題樂園返part time嘅,負責帶啲learning program,每次三個鐘頭帶住十幾個學生,唔用mic咁喺樂園行到邊教到邊。)

點解要特別講明唔用mic呢?因為事源就係因為唔用mic,日子耐咗就有啲職業病aka聲帶發炎。
我做呢份part time差不多七年,大概兩年前開始成日覺得聲帶、喉嚨唔舒服,睇過兩個耳鼻喉科醫生都係話我聲帶發炎,小心之後生繭或者生息肉(我唔係好知佢哋有咩分別,是但啦)。
我唔係要批判冇mic用呢件事,畢竟我哋冇專屬地方進行program,用mic會影響其他日常賓客我明白,我想批評嘅係--一年前我同當時嘅acting manager商量,可唔可以就住我聲帶嘅情況,畀少啲更亦即係返少啲工(某啲part time同事本身有正職,manager都可以就住佢哋嘅工作情況容許佢哋交少啲更返少啲工),acting manager聽完之後同我講咗一句:

「可能你要諗下你係咪適合呢份工喇。」

我 屌 你 呀 ?

我心諗你是咪冇腦?你心入面係咁諗都唔好講出口丫,尤其你仲想升職做leader。
一個下屬因為身體狀況同你商量日後工作安排,就算你心入面理撚得佢死,你道義上都應該問候關心佢兩句先講其他嘢啦係咪呀,尤其是佢個問題正正係因為份工引起。

我自問唔係唔識用聲嘅人,點解都會搞成咁呢?
因為人始終會病,我次次傷風感冒一定係喉嚨及週邊地區發病得最厲害,呢啲日子自然就想休息多啲講少啲嘢啦。遇著公司唔夠人返工嘅時候,啲coordinators就會打電話嚟用啲好好嘅聲氣邀請你返工,當你同佢解釋因為唔舒服想休息下,佢哋會講:「唔該你丫,幫埋呢一次丫~~~」然後我就會心諗好啦好啦返啦返啦,但當然,每次都唔會係最後一次。
久而久之,把聲就返唔到轉頭。

當你需要員工嘅時候好聲好氣,當員工被你消耗到失去戰鬥力嘅時候就當人棄將,同啲仆街𡁻完鬆有咩分別?有咩分別?!下?下?下?!
心地本身唔好,管理手腕又唔識,呢啲人如果做管理工作組織只會萎縮落去。

啲辦公室低能仔成日覺得討好老細就夠,對下屬點都得,但其實你要討好嘅係下屬先啱。
世界點解會有「下屬」呢個物種出現,就係因為你做唔曬啲嘢,所以要搵人嚟幫你分攤。
換這之,如果你得罪咗個下屬,佢玩嘢唔做嘢/做漏嘢/做錯嘢,喺夠料炒得佢之前執屎同食屎嗰個都係你。而下屬做嘢做得衰,你老細自然會覺得係你教得衰。就算你老細都好唔妥個下下屬,但一樣唔會同情你呢個下屬。咁嘅情況下,就算你老細對你客客氣氣,都係佢管理手腕高明過你咋。
平時做人好啲,唔係有事先嚟鍾無艷,有咩事上嚟要叫下屬做嘢都容易啲啦。老細見你同大家關係和諧又受人尊重,比起你趴低扮狗呻脷擺尾更加分啦。

我呢啲part time仔,留唔留喺度對我仕途係完全冇影響;但班full time就唔同講法喇,尤其係想升職嗰啲,畀我呢啲垃圾搞到老細覺得你連區區part time仔都管唔好而影響對你嘅能力評估就唔好啦,你話係咪?

我唔會話自己完全冇責任,我錯在真係信呢度啲人會同你講人情味。工作就係工作,唔舒服就係唔舒服,宜家聲又冇尊嚴又冇,係自己嘅愚蠢造成。
呢整整一年,我一直都為呢句話耿耿於懷。

下一篇我哋嚟傾下心事。

另,
同才俊舊同事傾起一年前時任acting manager件事,佢驚訝咗一秒然後話:
「我肯定佢係戇鳩先會講呢句說話,你唔好同呢啲人客氣丫嘛,畀我就咁樣應佢喇:『係啦,我冇你咁適合呢份工呀,嚟緊呢二三十年你都唔好轉工做到退休喇!』」

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 164751
Date: 2017-07-21 05:05:31
Generated at: 2020-03-30 06:21:33
Permalink: https://www.vjmedia.com.hk/articles/2017/07/21/164751/討好下屬,比討好上司更有用