愛利物浦賊

 

呢篇文茲事體大,定必打碎一眾影衰利物浦嘅愛利賊玻璃心,故在下事先戴定頭盔,利伸:廿年曼聯擁躉,但欣賞謝拉特、古治、懷斯、古天奴、高普領隊,05伊斯坦堡決賽拍爛手掌,真金白銀睇過兩次利記訪港,同埋——至撚憎本篇提及呢啲愛利變成害利嘅愛利賊。

英超四角賽今年終於再臨香港,對喜歡睇波嘅球迷嚟講係暑假休季樂事,最平$360波飛能夠一晚睇兩場英超賽事喎,抵屌到不行,好過俾錢行將執笠嘅落視啦係咪?入場睇波,跟睇演唱會雷同,一葉知秋,世上實在太多以愛之名倒米的所謂擁躉。

尋日在下1630就坐定定喺香港大球場南看台某處,霸定靚位等1800欣賞好波(不設劃位當然早到早享受),頭場係西布朗對水晶宮,雙方話就話只係英超中下遊球隊,以波論波,兩隊大半場時間並不欺場,話哂球季就來開鑼,以戰養戰 + 順便賺戲金 + 外國球迷扮下偽西人開心吓,英超四角賽係一箭三雕嘅。

順帶一提,今晚呢度絕對係利物浦主場——四萬人入場,放眼一大片紅海,九成人係利躉,逢利必褒,敵利必讎,我相信利物浦職球員都莫名奇妙,隨時晏菲路主場嗰班忠心撚都冇咁忠心。

講返西布朗對水晶宮,開波冇耐,呢班愛利賊就令非利球迷側目——西隊後衛 莊尼伊雲斯 及 宮隊中場 韋費特沙夏,愛利賊竟然係不分青紅皂白見二人掂波就狂噓甚至狂屌(雖然你用中文屌佢老母,兩位外國人都黑人問號.jpg),他們只係前曼聯球員,而愛利賊呢,就擺明係見山非山,打過曼聯工嘅人都當仇家,沙夏踢過四場曼聯波咁大把,伊雲斯係曼聯領隊改朝換代之後水土不服嘅棄將,二人前塵往事早已了,呢班所謂球迷卻彷彿中蠱般如此針對,莊尼伊雲斯踢咗十零分鐘仲要傷出埋,嘩啦啦,佢被隊醫扶出場嘅時候,愛利賊直情上哂腦瘋狂歡呼。

得罪講句,呢班愛利賊的確令喜歡足球嘅人蒙羞。誠然足球的確係比賽第一,但足球嘅精髓在於體育精神及君子風度,勝不驕敗不餒,有鬥志嘅波就係好波,可惜愛利賊呢種狂熱原教旨球迷並唔會理解呢樣足球之中最重要嘅精神。

西宮之戰呢場冇乜火花和仇恨嘅比賽,尚且招來瘋迷原教旨式針對,決賽係利物浦對李斯特城,唉,未開波我都知有另一位球員必定會成為新犧牲者,佢就係將門之後,李城正選龍門卡斯柏舒米高,佢係曼聯傳奇門將丹麥鋼門舒米高之子,單單係佢合姓氏,已經係原罪,信焉?

開賽三分鐘左右,舒米高第一個成功撲救,佢都已經係幾秒內開波,愛利賊卻係由佢接波到開波嗰幾秒都全程狂boo,之後傳次舒仔掂波,都換來兩三萬愛利賊狂熱亂屌,老老實實,舒仔全場盡力保己隊後方,飛撲接球冇欺場,佢用波亦不見任何拉布不君子(一場賽前熱身賽邊駛用呢啲技倆),對一位職業球員闔埋眼係唔係都屌,呢啲算乜嘢「球迷」?我見到嘅只係一大班得勢不饒人嘅足球流氓。

各位需知道一般球迷會噓龍門,通常都係龍門揼波鐘拉布,影響球賽可賞度,才會招來boo boo聲,喂阿哥,小舒米高完全合乎職業操守嘅撲救+開波,有乜好屌?佢姓舒米高就要屌?他日假如貴會見獵心喜引入呢位好門將,呢班愛利賊會係始終如一永續屌柒呢位「前曼聯球員嘅家屬」,定係抹撚哂自己啲醜態劣行,扮失憶盲撐「現利物浦精英」呢?

呢班愛利賊今晚得勢不饒人,就唔好怪其他球迷喺貴會失勢時落井下石,而家嘅利物浦其實唔失禮——有前有後有球星有 X-Factor,一大班後生當打潛力未見底,成班後生仔有氣有力。走位都走死對方啲老人家,純觀賞角度,睇順景波嘅利記隨時好睇過曼聯,但就係呢班愛利賊全晚對幾位同曼聯有少少關係,甚至無關嘅職業球員做出上述失禮+反智嘅野蠻言行,令他們自稱深愛嘅球會蒙羞。

「愛利賊」呢個稱號,是夜呢班未開化嘅野蠻人值得擁有。

 

作者:爽健

爽健
不求聞達於諸侯,只願笑傲賞江湖。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 164945
Date: 2017-07-23 17:19:04
Generated at: 2021-10-21 05:54:18
Permalink: https://www.vjmedia.com.hk/articles/2017/07/23/164945/愛利物浦賊