唔知由幾時開始,我由好鍾意份工變成返工會喊

 

(前情提要:我喺主題樂園返part time嘅,負責帶啲learning program,每次三個鐘頭帶住十幾個學生,唔用mic咁喺樂園行到邊教到邊。)

 

我由大學時期開始返呢份part time到宜家,畢業之後炒過散、做過兩份正職、到宜家做私人補習,都冇放棄過呢份part time,想當然唔係為錢,係因為份情意結。
因為關於「工作」嘅意義、熱誠、責任同道德,都係呢份工教識我嘅。

我仲好記得,七年前interview嘅時候,時任經理講咗一句話:「喺呢度返工最緊要開心,因為你開心先可以令賓客開心。」
我一直都好記得呢句話,即使到宜家,呢句話都一直提醒我嘅專業何在,令我每次都記得要帶住自豪同每一班同學講早晨。
因為七年前充滿笑聲嘅interview,令我好想試下喺呢度工作,就quit咗啱啱返咗一個禮拜嘅日本公司part time(我主修日文),經過好多句早晨,不經不覺就七年。

我一直好慶幸當日選擇咗呢份工,除咗學咗好多硬件同軟件上嘅知識之外,我識咗好多好叻嘅人,而且,我曾經得到過好多快樂亦係事實。
以前我哋返工返到會同coordinators講:「我唔收人工畀我上training丫!」「唔收人工幫你洗materials丫!」
以前嘅coordinators好肯教你嘢、提點你,但後來佢哋去其他team升職嘅升職,離職嘅離職;宜家嘅好多只會喺你已經做錯之後屌你,佢自己做錯嘢呢?會將個波卸畀你然後屌你(例子可以睇返上上一篇)。

以前返工好開心;到中期,雖然喺office度有啲唔開心,但行到出去對住學生嘅開心可以抵消返啲唔開心;到宜家,唔係話完全冇開心,但天秤上嘅唔開心點都重過開心,連平衡都做唔到。明明我對住學生嘅時間係多過對住同事。

呢個樂園好鍾意講magic。
喺我睇嚟,唔單止員工要畀magic賓客,令賓客開心、溫暖;員工內部都應該要有magic,而且重要性不比員工對賓客低。
人非草木,個同事喺office受完氣你仲期望佢出到樂園對住賓客真心笑令賓客開心?黃紫盈當年明知唔喊得都忍唔住對住個鏡頭喊啦。
唔珍惜人嘅組織自然就留唔到人(例子可以睇返上一篇)。數字上今日需要10個人返工,你湊夠10個人頭當然就交到差。但對於主題樂園而言,一個返咗五日工嘅前線員工同返咗五年嘅,真係唔同㗎。當你啲員工一批比一批做唔長,長遠而言成條team質素就會下降。
(FYI,就我自己條team而言,一日經驗同十年經驗人工係一樣, in case有人以為公司因為慳錢所以prefer請新人。)

我深知呢個組織萎縮緊,而且返唔到轉頭。
當啲仆街成為組織嘅中層,佢教出嚟嘅都只會係仆街,佢請返嚟嘅都只會係仆街,咁好彩畀佢請到個唔仆街嘅,都會因為佢太仆街而走。
到佢成為高層,啲新仆街就會成為中層,再教啲新新仆街返嚟,成個組織由核心嘅內圍到核心嘅外圍都係仆街。

我理解呢個樂園嘅價值觀,所以深明自己寫呢啲事出嚟正正係破壞緊個magic。
比起唔鍾意啲仆街,我更討厭嘅係一邊打文一邊唔捨得離開嘅自己。
比起憤怒,一路打字嘅時候更多更多更多嘅係傷心。

以往嗰六年,有四年嘅生日我都喺樂園返工,因為真心覺得生日可以返嚟呢個地方好開心、好充實;
但今年生日,本身有工返,但我已經唔想生日都見到啲仆街,終於都搵咗同事幫我頂更。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 165130
Date: 2017-07-25 19:00:36
Generated at: 2020-07-12 19:49:04
Permalink: https://www.vjmedia.com.hk/articles/2017/07/25/165130/唔知由幾時開始,我由好鍾意份工變成返工會喊