邊個話男人唔會呷醋?

 

 

「今日同事竟然話我著白色羽絨好得意,成個雪人咁。」我說。
「男定女?」男友Mike說。
「男,大叔嚟㗎,你唔係咁都呷醋掛?」我說。
「又聊我女朋友!下次你同佢講,關你銀事呀!」Mike生氣地說。
「你好得意呀咁都呷醋!嘻嘻!」我笑說。

最初拍拖嗰陣,其實我同阿Mike係成日吵大鑊,仲要鑊鑊都好甘,絕對唔係大家見到嘅而家咁,成日放閃是同出甜文(我意思係甜蜜呀唔好諗歪)。無論係以前定而家,如果我同男性朋友兩個單獨食飯,我一定會預先向佢報告,講下背景,例如幾時識喺邊度識,幾點會喺邊度食飯等等,諗住佢了解多啲會無咁擔心,但原來都係無用。

有次就係因為我拎嘢嘅時候唔小心掂到個電話,whatsapp藍tick咗,但我根本無睇到個message,當然就無覆到,然後佢就自編自導自演咗一個我偷食嘅故事,仲講到似層層,怒火中燒咁款,鬧咗我一大餐(呢啲事絕對唔係淨係女人先會做)。其實我本身已經好少會喺同朋友食飯嘅時候玩電話,特別係只有兩個人嘅時候,因為感覺唔係好尊重,難得約出嚟見面,如果要我望著你玩電話,咁又有咩意思?將心比己,所以我都唔會咁做。

畀人屈實會嬲,明明只係同以往一樣同朋友聚舊食飯吹水,乜都無做過,講真,有無嘢自己一定知,仲要我不嬲都行為良好,無做過任何對唔住佢嘅事。我都明佢只係因為愛我緊張我所以先會呷醋,但係有時都唔可以太過份,咁樣只會令人有窒息嘅感覺,好似長期畀人箍實咁,同埋不被信任嘅感覺其實係好差。

而家一齊咗幾年,已經唔會再好似初初咁係又嘈唔係又嘈,大部分時間仲好sweet添,至於當中有咩秘訣?無㗎,真係靠兩個人溝通、包容同忍讓,最重要係有咩不滿一定一定一定要講出嚟,對方唔係你心入面條蟲,你唔講佢係唔會知,千其唔好講反話,即係明明嬲又話無嬲,男人好簡單,你話無嬲佢可能真係以為你無嬲,跟住你就仲嬲,嬲佢點解唔氹你。

話說今日同Mike各自同朋友食飯,我行返屋企嗰陣咁啱見到有幾個人喺度跑步,於是我就whatsapp同佢講:「你一唔喺度,即刻有幾個唔著衫嘅大隻佬喺我屋企樓下跑步。」點知打完呢句唔夠一秒個電話就響。

「喂!」Mike說。
「喂?你做咩打嚟嘅?你唔係同朋友食緊飯嘅咩?」我說。
「好危險囉!一陣人哋跑跑下無啦啦跑咗落你度扮撞親,咁就搭到傘㗎喇!」Mike說。
「痴線,人哋純粹跑過咋,咁大條路點會跑過嚟,你食飯先啦,再講。」我說。
「唔使呀我送埋你返屋企先!」Mike說。

咁多年嚟,其中一樣由頭到尾都無變過嘅係佢仍然咁緊張我。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 165081
Date: 2017-07-26 05:48:57
Generated at: 2020-11-01 03:46:35
Permalink: https://www.vjmedia.com.hk/articles/2017/07/26/165081/邊個話男人唔會呷醋?