其實我都好後悔無同過學生哥拍拖

 

「我前排睇咗篇文,話冇著過校服同人拍拖,人生就唔算完滿。」我說。
「唓,我都無同過學生妹拍拖啦。」男友Mike說。
「唉,我都無同過學生哥拍拖。」我說。
「哎呀,我套校服已經掉咗。」Mike說。
「就算未掉都唔啱著啦,哈哈哈!」我笑說。

話說小妹以前係讀女校,諗返起以前中學嘅生活都好開心㗎,仲識到班好姊妹,不過硬係覺得爭咁啲嘢,就係無拍過拖。雖則每個人嘅性格都唔同,但讀女校唔多唔少都會有啲影響,你諗下六年嚟日日都淨係同女仔相處喎,雖然都有幾個阿sir,但係有幾可會同佢哋講嘢先?而且男老師同男同學係好大差距,根本都唔同,長時間咁樣真係會唔係幾識同男仔相處,所以女校嘅人出到去(大部分)一係就好摺一係就好主動,即係所謂嘅姣,而我就係屬於前者,即係慢熱,靜嗰類。

其實我都有豁出去參加啲聯校活動,但係出到去又唔係點出聲,人哋問一句我答一句,加上外表又薯薯哋,唔係話靚爆鏡嗰類,更加無人想理,而且讀女校嘅人都比較獨立,有乜都係自己搞掂,例如燒嘢食自己抬炭抬嘢飲,自己做到嘅都會自己做,唔會下下叫人幫手。當其他女仔楚楚可憐咁講緊:「好重呀,可唔可以幫幫我?」嘅時候,我就喺度講:「得,我搞得掂,你去幫佢啦。」唉,咁講就死得啦。

男人多數都係鍾意幫助同保護弱者,首先我體形上已經係輸蝕咗,太高太大舊,二嚟體力上又OK(又唔識扮唔OK),心態上又覺得唔使人幫,於是就更加少機會出pool,可惜到我大個睇返轉頭先知。拍拖真係唔係話想拍就有得拍,A鍾意我、我鍾意B、B又鍾意C,呢個情況經常都會出現,又唔可以話係天意弄人嘅,只可以話係有緣無份囉。

其實就算到而家呢一刻,我都係唔太識同啲同我差唔多年紀嘅男人相處,我會好怕兩個人嘅時候dead air唔知嗡乜好,反而同大幾年嗰啲又相處到喎,可能因為佢哋識就住我嚟講嘢啦。過咗去嘅嘢當然無得返轉頭,不過如果我第時有小朋友嘅話,我都會建議佢讀男女校,唔係話想佢早啲拍拖(雖然早拍拖都無話係好定壞),只係唔希望佢會好似我咁抗拒或者唔識得點同異性相處,因為喺呢個社會上要生存,唔係靠讀書叻就得,更重要嘅係識得同唔同嘅人好好溝通,咁條路都會易行啲。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 165284
Date: 2017-07-27 06:22:14
Generated at: 2020-11-01 04:14:48
Permalink: https://www.vjmedia.com.hk/articles/2017/07/27/165284/其實我都好後悔無同過學生哥拍拖