「你呢排係咪好得閒？我見你成日都好早收工，琴日六點幾已經唔見你。」人事部Macy說。
「我放六點，六點半我先走㗎喎，而且準時收工都正常啫。」我說。
「無，想睇下你係咪好得閒咋嘛，以前你成日都好夜收。」Macy說。
「我唔係好得閒，只係最趕嘅嘢我做完咪走，而且好多project都等緊批未開得工，遲啲一齊開波就死㗎喇。」我說。
其實近期我真係比較得閒少少，同之前比嘅話，至少我七點前通常都做得晒所有最趕嘅嘢然後收工。嚟緊就係peak season，啲project撞晒期，到時真係想走都無得走，我都唔知會做到幾多點，所以而家難得可以早啲走我梗係唔會咁傻唔走啦。何況我同阿Macy姐都唔同部門，我幾點收工關佢叉事咩，我阿姐都無出聲話我啦，雖然可能係因為佢有時仲早過我收工，其實只要我喺死線之前做好晒啲嘢咪得囉。
雖然我唔知Macy會唔會同腦細報串話我好得閒成日早走，但真係唔理得咁多，我唔會為咗佢而每日加班幾粒鐘坐喺度扮勤力，我早啲返屋企食飯，寫多兩篇文唔好？時間真係好寶貴，人越大，發覺啲時間過得越快，人工只係買咗我星期一至五嘅九點至六點，頂多加埋星期六長週，當然真係忙嘅話我都會自動加班做埋佢，但無嘢要趕我死都唔會坐喺度等，仲要加班係無錢收。
成日話啲後生唔捱得，問題係值唔值得我去捱先？其實成日提倡埋啲咩後生最緊要唔好怕蝕底，都係想有廉價奴工用啫。如果有需要，我都唔會掉低啲嘢唔做準時sharp走，但大過份嘅加班我唔會接受囉。再者，加班唔等如勤力㗎，雖然某啲腦細真係會以「加班」嚟判斷一個人勤唔勤力。
「咦？你熄機準備走喇喎。」Macy說。
「係呀，拜拜。」我說。
頂！可唔可以放過我，七點喇！大大話話我都加班咗成粒鐘啦，你又唔係腦細，你自己奴性重又或者多嘢做走唔到就算啦，係都要拉埋其他同事落水或者比說話人哋聽，究竟呢啲係咩心態？反而我腦細其實咁耐都無話過我早走，我淨係記得第一日返工，六點幾佢就對住我唱：「我勸你早點歸去。」
如果你有能力搵過另一個家人
做傳銷其實同入邪教無乜分別
【塔羅個案】港女旅行完即刻被人飛，原因震驚了七百萬人！
你夠唔夠薑做auditor 的男女朋友？
根據推論，西施好可能係一個葡萄牙人
【唔開名】「手足」應小心求職陷阱，懷疑有黃色工作平台管理層「睇中」手足唔敢報警非禮少女
2017年7月28日
