所謂嘅勵志感人,有幾多成係真?

 

周圍都係《Dunkirk》嘅影評同深度分析,我就唔分一杯羹喇。
之不過想拉埋另一套同期上映,都係有關Dunkirk事件嘅電影《Their Finest》一齊講兩句。

《Dunkirk》就係講二戰初期英軍從Dunkirk撒退件事啦,海陸空三條敘線去到最後殊途同歸,成套戲好男性視覺,難得一個女角都冇,嗰啲女人喺家鄉等男人返去嘅灑狗血愛情線通通都冇。
(啲人講到套戲好靜,明明都幾多戰爭場面,我被啲炸彈嚇咗好多次。)

《Their Finest》就好似續集咁,講英軍從Dunkirk撒返英國之後,英國個電影發展局就要拍套Dunkirk電影去鼓勵國民士氣喇。主角係個女編劇,換言之同老蘭嗰套掉轉,係女性視覺出發,而且準確啲講,呢套係以戰爭做背景嘅愛情電影,再進一步講,係以「烽火下的愛情」包裝嘅女性主義電影。

《Their Finest》都值得一睇㗎,雖然冇老蘭嗰套咁deep,但就算講二戰時期嘅女性主義,都冇好膚淺咁將男人同女人放喺對立層面上,最尾都係男人同女人一加一大過二。而且睇完老蘭套《Dunkirk》再睇《Their Finest》嘅戲中戲拍Dunkrik,畫面多少有啲重疊,其實都幾有趣,仲可以睇到少少以前啲電影人點拍電影,冇CG點樣拍到個沙灘有幾十萬士兵企喺度。加上啲演員都做得好睇㗎,尤其女主角同戲中老戲骨(當然佢現實都係)。
不過唔係好多院線有,趁未落畫快啲去睇喇。

好喇其實我係想講第二樣嘢。

(以下含少量劇透,如果你睇咗老蘭套《Dunkirk》就唔關事。)

《Dunkirk》入面有個十幾歲嘅角色叫George,佢自把自為跳上老細架船,跟埋去Dunkirk接啲英軍返歸。但未去到目的地已經喺船艙碌落樓梯死咗,連犧牲都談不上,名副其實嘅出師未捷身先死,但就使老細個仔Peter淚滿襟,平安返去英國之後,拎住George張相去當地報館,卒之報紙出咗大大格歌頌佢係「十七歲的英雄」(歲數唔肯定有冇記錯)。

至於《Their Finest》嘅故事,都係始於一篇報章報導。
當時有對孖生姊妹被報章吹捧成英雄,因為佢哋揸老豆隻船去Dunkirk,突破重重困難接返啲士兵返嚟。做編劇嘅女主角為咗寫個真人真事改編嘅劇本,就去訪問對孖女喇,但點知實情係佢哋駕船未到岸引擎就壞Q咗,最後被其他船拖去岸邊,唔係靠自己埋岸嘅。
哦即係報紙誤報,女主角心諗「仆街喇冇材料寫劇本,冇工開今個月點交租?」卒之佢為咗生計,繼續圓呢個謊話,當然再加鹽加醋將個劇本寫得有咁fancy得咁fancy,有咁正面得咁正面,最後就變成戲中戲嘅《Dunkirk》。

 

 

好喇,兩套視角完全唔同嘅電影,都不約而同連繫到關於戰爭誇大其辭嘅報導。
「每個國民都是英雄」,為咗成就呢句話,當時嘅勵志感人報導,其實有幾多係真?
就好似呢幾年,「相信一個人,不如相信每一個人」,香港本土嘅小人物勵志感人故事,阿邊個為邊一場運動犧牲咗幾多;阿乜水又為守護乜乜價值付出咗乜嘢,有幾多成係真,又有幾多成係因應時代需要而設計嘅劇情?
生於亂世,我哋需要嘅係血淋淋嘅真相,還是有糖衣包裝嘅「今天我」?

不過對香港人嚟講都冇乜分別。因為我哋已經去到一個連畀反應都覺得好攰嘅時代。
血淋淋又好糖衣又好,力氣都只夠喺新聞下面畀個嬲嬲或者心心,劉曉波再慘無人道都唔夠隻膠龜多noise同高hit rate。當初反國教同雨傘日日今天我打飛機嘅左膠,好多宜家連起機都費事。
個個都係阿愁:「我係咪乜都要畀反應㗎⋯⋯」
唔係要批判任何人,因為我自己都係咁。

香港人身分模糊,國家意識薄弱,部分流派連「國家」喺邊都唔知,要香港人企出嚟奮戰?不了,都唔知為咗邊個。
就算老蘭喺《Dunkirk》最後諷刺呢啲滿載溫馨嘅報導自欺欺人,走出戲院後對我哋嚟講,都唔及「今晚食咩好?」嚟得貼身同實際。

講時講,我仲未諗到今晚食咩好。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

  • 英國時裝品牌駐港高層:「我值錢因為我在香港,移民對我未算選項。」 by 白木乩
    「我老婆都有問我,我英國公司,是否可以申請調任?」…
  • 做人呀媽之後,我失去左好多女人「本能」 by Sunice
    做人呀媽有很多新增技能,在外人看來是彷彿變成了女超人一樣。但其實只有呀媽自己心知,一旦披上「母親」這個聖潔到發光的外衣,我們便同時失去了很多「本能」。…
  • 陳偉霆注定是香港人的一道傷口 by 阿享
    陳偉霆現在很紅,紅到他可以和香港完全切割。近年在大陸很紅的人,再怎樣也會偶爾在香港出現。佘詩曼因為《延禧攻略》爆紅,之後成了廠家寵兒,屢屢在香港大小活動出現。同公司的謝霆鋒,容祖兒等,雖然重心在大陸,但也會在香港開show,出歌。就算勢頭同…
  • 傷J人 by BEAR 兒
    低胸女徑自朝吧枱走去,被緊身裙包裹着的身體玲瓏有致。她走到男人旁邊,向酒保說了幾句,就在吧枱俯身等着,屁股翹得高高的。有容笑了笑搖頭說:「小婊子還挺厲害的。」…
  • 蔡東豪背後的金主靠山 by 渾水
    高振順是福建幫的財技高手。福建幫是股壇一個派系,這個派系的高手可以超高,高到做波鞋做廁紙都可以做到成份股,低手可以低到上市兩個月,主席夾帶私逃,將公司市值蒸發一半,港交所硬膠膠得個睇,這事還是近期發生,不謂不兇殘。關於高先生的介紹,網上很難…
  • 【武漢肺炎】做政府工真係人生贏家? by 文文
    各行各業都擔心緊減人工,被逼放no pay leave的時候,政府工又宣佈加5.26%人工。每年訪問大學畢業生就業方向,做公務員肯定穩佔頭三,特別係非專科(乞食科),例如各大專院校的文學院和社科院的學生,更加係一車車咁去考。而家呢個年代中五…
歡迎讚好我們的facebook page,免費資訊源源送上。

文章資訊

ID: 165629
Date: 2017-08-01 05:38:48
Generated at: 2020-07-05 05:10:45
Permalink: https://www.vjmedia.com.hk/articles/2017/08/01/165629/所謂嘅勵志感人,有幾多成係真?