其實只要拎返Day 1 你追佢嘅誠意,你女朋友根本唔會走。

 

如果可以同廣播一句說話比所有比女飛而又喊呼喊忽嘅男仔,我會揀呢句。

女飛男有兩個可能性:一係個女仔寧願單身都要同你分手,一係個女仔有第二個。前者唔該自己面壁思過,睇睇個標題然後諗下自己係咪衰懶。如果你係後者,花少少時間睇落去。

好多男仔真係好遲鈍,甚至死左都未知咩事。女朋友跟左人走,如果分手當時女朋友怕你過份激動,或者知道大家無可能再一齊,而唔講已經有新男朋友,過兩個月東窗事發,你喺Facebook見到人地貼相,又失控又話人暪你,仲要瘋狂追問,單機到2046。

咁如果佢分手當下就講有第二個呢?又要怕你狂性大發,又要應付你瘋狂挽留,想你無咁唔開心,分左手,等你放低段感情先再比你知道姐,呢方面女人永遠成熟過男人。

然後到最核心,你睇到呢度一定會諗嘅問題。

「喂,佢未分手就同第二個有野,係咪佢衰佢賤先!」係,你無錯,佢係做得唔岩呀。無完結左一段感情先去開始另一段感情,拿,我包埋嗰啲同第二個未講一齊但已經拖手、錫或者上床嗰啲,係咪開始另一段感情真係睇做左啲咩,唔係口頭講嗰幾句說話。

但係你有無諗過,佢曾經係你女朋友,就算唔講你曾經好鍾意佢,起碼有一段長時間,你認同佢份人係正路架嘛?就算唔係秀外慧中,起碼都係個好人掛,點解無啦啦變成咁先?

如果你話自己帶眼識錯人,咁真係無話可說,大多數人都唔止拍一次拖,如果比女飛嘅次數超過三,而你次次都覺得自己帶眼識錯人的話,或者你可以去驗左眼先開始下一段戀情。

講真,女仔真係好簡單,拿唔係講緊嗰啲「她們只想在軟弱的時候,得到你溫馨的擁抱,在她的耳邊輕輕說無事架我喺度。」嗰啲睇壞腦嘅是但啦,我想講嘅係,女仔圈子真係好鍾意互通消息,特別關於自己同人地啲男朋友,暗中比較黎比較去,真係再平常不過嘅事。

所以全部女仔都知道,男仔一追到手,就會無一開始追緊嗰時咁好。大家成日聽到女仔話咩大時大節個男朋友都無咩表示,所以佢好唔開心……嗰啲,其實就係因為佢地知道啲男仔追完一定會懶,但佢地只係要求一年有幾日醒神少少,返返去追佢嗰時任勞任怨,基本上佢就收貨。你無做到,咁佢嘅不滿就一定會累積,本身一百分扣到得返三,四十分,咪諗下呢段感情行唔行到落去囉。

另外,我見到好多情況,啲男仔追到手之後,當女朋友係妹仔咁洗,稍有爭執就燥到爆炸,當對方狗咁喝,呢啲野追女仔嗰時一定無架喎,但點解追到嗰時啲脾氣就開始差?因為本身燥底嗰個性格就係真正嘅你囉!但咁又點姐,係可以控制到,而且追嗰時真係控制過架嘛!呢啲野真係睇有無心做,所以正如標題寫,如果拎返Day 1 追女仔嘅誠意,其實相處多數都無問題架喎。

信我啦,女仔都好怕分手,只要佢地揀定左,一般黎講都會專一過男仔。如果大家相處得好好地,女仔會變得好痴身,事無大小都問你意見,出街點都要帶埋你咁……總之就唔想用腦,個感覺……似當你係棵樹,可以依靠下咁。聰明嘅女仔好多,但如果有得揀,要用腦嘅野佢地都會想比晒男仔做。

佢地真係真係好想咁架!唔係邊得黎咁多語錄標榜女仔好纖細柔弱,需要人包容下啲任性……

係咪好煩先?係呀,咁你可以唔要架嘛。無人迫你追架喎,當時佢一定有某啲野吸引到你,你先想去追佢架嘛,咁呢樣就係佢提供嘅野,而你追佢嗰時聲稱會有嘅配套,佢覺得好先至接受你架嘛,係咪都叫公平交易?

咁如果佢已經吸引唔到你,結果就係你飛佢啦。如果佢飛你,而你真係覺得痛心,唔係專登hea佢搏佢主動分手嘅,你自己諗下衰咩啦。

係咪你份人燥到對方真係無辦法同你理性溝通?

係咪你追到手之後懶到嘔,平時仲要人地就你,搞到佢單身仲好過比你勞役?

現代社會見嘅人多,雖然話依家女多男少,但如果個女仔身材五官都正常,性格又唔係特別差嘅,真係唔愁無得揀,如果你依家有個女朋友,睇緊啲啦,或者你已經比人飛左,咁都睇緊啲啦……

下次。

 

 

作者:求其花

求其寫,求其賣,求其志不求奢華|求其真,求其愛,求其花不求其果

閱讀後覺得好,請多多讚好及分享~:)

其他熱門文章

  • 《星際啟示錄》全面大解構 by 湯子霈
    (以下內容全面劇透,及粗淺解釋科學理論)《星際啟示錄》(Interstellar)故事簡單,講述人類在地球面臨末日,美國太空總署探索新星球進行太空移民,延續人類文明。不過,全片涉及大量科學及物理常識,即使是理科生也未必完全明白;同時,劇情探…
  • 【遊戲攻略】解鎖二三艘潛艇教學 《Monster Hunter Rise》刷國王獨角仙悶到瞓著 by 滅盡殺手
    早兩日我哋嘅一篇小知識技巧篇入面有提到要盡快解鎖收集道具必備嘅潛水艇,雖然做村任好快就會有第一隻潛水艇,但係要 […]…
  • 大埔浸信會借 Nick Vujicic 籌款事件補充 by Do Chan
    聚會的定位是「佈道暨擴堂籌款」聚會,這一點是令很多人勃然大怒的。我猜想,其實主辦方並不是想非信徒買票聽福音,他們的目標其實是教會內的富貴會友,他們買票捐錢給教會,教會還以阿 Nick 親身講見證,本意是想雙贏,但結果卻釀成公關大災難。敝教有…
  • 港大舍堂次文化雜談(上):迎新與仙制 by 殷琦
    迎新是Hall的大事。…
  • 【憂傷的嫖客】「環保吹」 by 菠蘿
    某天下午,就在我們對一樓一場所集中地進行實地考察的時候,遇見了一行三人、正在「洗樓」的嫖客小隊。所謂洗樓,就是嫖客在一樓一鳳姐集中的大厦,向每個鳳姐單位門口按鐘、逐個審視,直至他們遇上合眼緣的鳳姐,與她們進行交易為止。而這三人有別於一般的嫖…
  • 其實點先算係鍾意一個人? by 小盛女
    其實我都唔係好清楚(嗱唔好打我),不過以下有幾點可以畀大家參考吓。首先,你會乜都想同佢講,就算係啲無聊低能嘢,當你工作上好大壓力或者遇到唔開心嘅事,你都會同想同佢講,因為你知道佢會靜靜哋聽你呻,雖然唔一定會幫你解決到個問題,但係女人要嘅從來…
歡迎讚好我們的facebook page,免費資訊源源送上。

文章資訊

ID: 165787
Date: 2017-08-02 18:50:43
Generated at: 2022-08-09 16:46:15
Permalink: https://www.vjmedia.com.hk/articles/2017/08/02/165787/其實只要拎返day-1-你追佢嘅誠意,你女朋友根本唔會