杜小喬女神呢啲叫含蓄唯美，你哋就下下要番號？

女神杜小喬一幕床戲，因為對白太港女，又俾人插到體無完膚。可憐一幕含蓄唯美嘅床戲，喺香港觀眾面前變咗對牛彈琴。

錫錫又好做愛都好，都係對愛嘅期望嘅反映。畫面係由少女嘅角度出發，俾大家想像女神視角點樣睇愛呢件事。激情只係一部份，對男神嘅瑕想，對拍拖共處嘅憧憬，對之後一齊創造嘅回憶，都係愛情嘅構成。有拉麵同秋葉原，先至有做愛時嘅美好感覺。畫面同對白都有其層次，唔明白嘅人，可能太毒，或者係少女退化嘅熟女，我唔怪你哋。

我仲以為網上嘅觀眾應該有更好嘅欣賞能力。大家唔係成日投訴TVB畫公仔畫出腸㗎咩？本身就有好多幻想空間，唔使下下掹衫，冇晒布，高清到睇到毛孔先至表達到男女交歡㗎。既然食飯嘅場口你唔使睇埋演員撩牙；大結局唔使一雙一對BBQ；噉表現兩情相悅，又使唔使睇晒男女全相呢？咁鍾意埋身肉搏，你上網睇AV算啦，何苦要睇劇？

到頭嚟原來香港嘅觀眾，不分年齡，都係咁欠缺想像，都係要所有情節鉅細無遺做晒出嚟先至收貨：女嘅想將肉麻嘅對白講晒出嚟，打冷震至夠皮；男嘅就要四仔，冇格仔先收貨。

每個少女心入面都係劇中嘅杜小喬，可惜香港啲男仔唔識欣賞，配唔起女神，只配搵 ptgf， 或者日日喺屋企搵番號嘅大魔術師。

作者：擇言

每個禮拜有15分鐘嘅話歡迎你加入粵典編輯組。 words.hk計劃: http://words.hk ｜ Facebook專頁

閱讀後覺得好，請多多讚好及分享～：）