【公開處決毒撚?】玩IG 切忌學Rose Ma(馬俊怡)

 

「阿邊個(即係我),你係咪有去動漫展?」一個同事冇啦啦問返我,雖然上星期有提過下,但都結束咗兩日先問係有少少奇怪。

「係呀,咩事?」

「你有冇搵Rose Ma影相?」冷不防此一問,雖然我一向有偷偷睇時下嘅大波妹、KOL,但公司都應該冇乜人知,所以佢咁問到都怯一怯。

「er……咩事呀?」我故作鎮定回應。

「Rose Ma原來cap曬同佢影相嘅毒撚上instragram喎,你使唔使睇下有冇你自己份?」

回想起當日去動漫展,真係好多人前仆後繼搵PS嘅gamegirl影相,Rose Ma亦係好多人圍住。好彩當時並無興趣影人,於是我可以好放心咁同果個同事講「唔使驚呀」。

Rose Ma事件成為網絡熱話,Lunch Time去茶記食飯都會見到同檯睇緊連登果個Post,仲未唔知嘅可以睇下面簡介或連登post。事件是咁的,本土著名電玩KOL Rose Ma係動漫展擔當Playstation Gamegirl其中一員,連日活動好多粉絲搵佢影相,仲有PM俾返相Rose添。但Rose忽然以Cap圖方式貼出粉絲嘅PM,串成一個IG story post(功能即係同迷你相簿咁上下),結果被連登仔恥笑為「處決」粉絲嘅舉動。

係呢件事上,一眾花生友就睇得相當開心,但搵Rose Ma影相嘅粉絲就認真無辜。其實好多時動漫展影完相,被影嘅model/cosplayer都會叫影相嘅人send返相畀佢哋,呢啲本來係禮貌黎。但今次事件有唔少人附加message叫佢唔好post但都照cap圖cap埋名出黎就真係令人費解。Rose Ma咁玩法,下年可能龍友粉絲都淆底唔敢send返相被當事人,都幾影響呢個界別嘅運作。

係呢件事上,有好多被稱為毒撚嘅精華comment被貼堂廣傳,果堆毒撚寫千字文讚揚心中女神,雖然只得數字回應,但都非常滿足。其實毒撚有偶像、有女神一啲都唔奇,亦唔係壞事。雖然字裡行間肉麻到有點令人毛骨豎然,但佢哋只不過係人哋唔覺得好受影響下抒發內心情感,又唔係講猥瑣說話只有讚美,本身可能只係諗住人少少對住個messager幻想下咋,點估到咁都會被人公開?本身毒毒地先follow下女神PM當對幅牆講下嘢啫,宜家搞到全部人都知,真係唔敢想像佢哋今日點過。

向來感覺都好識玩嘅Rose Ma犯下致命大錯,的確好奇怪。所以有人推測佢係借毒撚fans上位,一見今日高登連登,不絕有人為此事開post,一時間Rose Ma名字響遍香港網絡。如果係咁,Rose Ma真係一個奇才黎!呢條橋真係冇乜邊個會諗到。但比起陰謀論,我更相信係無心之失。以Rose Ma網絡人氣,估計好多人會PM返相比佢,但如果佢下載又可能下載去唔同文件夾搵唔返齊,於是懶懶地直接cap每個pm出post算。咁樣就解釋到點解人哋講明唔想出又出咗樣,因為佢都無心睇對話。

Rose Ma 事後都火速道歉,其實係正確做法。上面講咗Rose Ma其實係好大責任,雖然忠心粉絲未必怪佢,但佢都要畀個交代啲廣告客戶。

呢件事亦係好值得借鏡,要建立名聲有啲嘢真係唔可以懶。好似達哥咁,如果你係街撞到達哥合照,事後PM返佢,佢係唔會用公式化嘅回覆多謝一句就算,所以抵佢有咁多粉絲。如果想係網上發圍做紅人、想儲粉絲,待人處事要做得好,無論粉絲定朋友,對方都係人,都係講建立人際關係啫。話講咁多,希望呢位打機界KOL會經一事長一智,汲取經驗,唔好再犯同樣過錯啦~~

 

作者:牛肉麵

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 165834
Date: 2017-08-03 03:52:59
Generated at: 2020-11-01 03:31:53
Permalink: https://www.vjmedia.com.hk/articles/2017/08/03/165834/【公開處決毒撚?】玩ig-切忌學rose-ma(馬俊怡)