一句到尾:旺角行人專用區留定唔留?

(photo via cc Flickr user wonderjimmy)

 

一句到尾:旺角行人專用區留定唔留?心入面畀個答案自己先。

我記得開放旺角行人專用區既頭十多年,一直相安無事。由一開始慢慢有音樂人嘗試係街頭演唱,跳舞,雜技,亦有人擺賣,有人開始用即影即有賺錢都好,大家都會認為呢個係旺角既特點,係熱鬧而唔係討厭。即使自由行愈黎愈多,條街愈黎愈迫,旺角既鋪頭愈黎愈單一,無論點都好,大家對街頭既藝術表演係一種寬容。始終好多藝術表演係香港係唔容易生存,而街頭表演係外國都係一種常見既事物,將一啲公共空間留畀非主流既藝術人,係土地問題嚴重既香港更加係提高到一個社會公義既層次。

旺角行人專用區曾經有幾次改變,主要係開放時間增縮,由全盛時期接近全時間開放,到宜家只有星期六日及公眾假期開放。係最初幾次相關討論以及改變出現既時候,我都抱住應該畀藝術人公共空間既立場。

但時至今日,如果你再問我「旺角行人專用區留定唔留?」我答案係唔好留,取消左佢啦。

到底係幾時,同埋係咩原因開始改變呢?

大家不妨想像一下,今日係星期日,你約左朋友係傍晚6點係旺角E出口,再係兆萬食劣質放題。你係旺角地鐵站E2銀行中心出口會合朋友,然後向Body shop方向行走,係呢個位置,你大概會同時間聽到左邊愛是不保留,正前方有中年男女唱歌跳舞,右邊有鬼佬乞衣玩樂器。係經過第一次衝擊之後,你轉右向前直行,浴路應該有6-7檔喇叭開到最大聲既唱歌團體,有中年有老年有男有女有人跳舞有人抽筋咁款有人群有好撚多人群,你行到好似新娘入教堂咁碎步行都行唔到,啲噪音嘈到你由無病變到精神病,由有病變到即刻病發。我有無數次想似自己打緊無雙背後有把野,衝過去人群就「敵桑仆街索架LE」架啦。仲想行去兆萬?行多兩步去廣華等佢轉介你去睇精神科啦。

一開始開放個空間畀你地去唱,你地就以為自己係Rolling Stone呀、Queen咁,喇叭開到隔三條街都聽到,路人點頂呀?居民點頂呀?歌唱表演由一種畀人欣賞既藝術,變成一班死契弟自high擾民既噪音,仲保留黎有咩意思?一刀剪左佢啦,等旺角回歸寧靜,好過繼續做一個周六日精神病勿近既地方啦。條街係唔係無有質素既表演者?係有既,對唔住,如果要我係食屎食到豆同唔食屎之間,我係肯定唔會食屎。

我知道肯定有人會搬返咩公共空間呀,藝術有自由呀出黎回應,嗱好簡單,今個星期日6點,自己行下旺角行人專用區,睇下表演緊既係咩人、咩質素、咩音量、條街有幾迫,想像下自己住樓上,唔好太投入角色,我驚你會即刻去買漒水淋落去。

 

作者:木人里

一個心地善良既仆街。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 166158
Date: 2017-08-07 20:25:14
Generated at: 2020-10-30 09:32:36
Permalink: https://www.vjmedia.com.hk/articles/2017/08/07/166158/一句到尾:旺角行人專用區留定唔留?