大台劇《踩過界》:證明華人社會仍然會用大道理迫死人

 

平時都冇睇開㗎喇,不過咁啱就有睇八月六號呢集,戲情總之就係講羅樂林飾演王浩信嘅親生老豆俾人告,而王浩信唔肯幫佢打官司。

我相信都冇人會介意我劇透啦係咪?

咁點解王浩信飾演嘅盲俠咁抗拒佢老豆呢?原來當年佢老豆同佢一齊撞車,六歲嘅佢咁就盲咗,而喺佢瞓醫院期間,佢個老豆仲要跟大陸女人走咗去,所以王浩信細個就好憎佢老豆。不過咁,大台劇又好,台灣劇都好,那怕韓劇日劇如果寫咗呢種設定會點?最後都係會大團圓結局,男主同個仆街老豆一定都會冰釋前嫌,咁呢套戲又點呢。

由蔡思達飾演嘅煩膠角色,一直叫王浩信原諒返你老豆啦,你老豆當年原來有苦衷㗎!好啦,係咩苦衷呢?原來,當年個二奶話明死都唔會湊個盲仔做後母㗎喇,如果唔係佢就連埋肚入面嗰對龍鳳胎一屍三命迫呀羅樂林揀,最後羅樂林喺「無得揀」嘅情況下,揀咗二奶,唔要大仔。

真係一個好委屈嘅理由呀!有人迫你搵女人㗎咩?搵到個女人唔錫自己個仔你都唔好要啦吓嘛,女人可以走,但親生仔係一世喎。但最難聽嘅就係,蔡思達不停同盲俠講,你點解可以咁冷血㗎!你冇人送終呀!

睇到呢度,我不禁有一個疑問,點解一定要原諒呢個老豆?

 

 

當蔡思達不停話個老豆冇得揀,迫不得已先放棄自己親生大仔,佢依家都夠慘啦你就原諒佢,但如果佢唔係生浩潦倒,佢會唔會諗起盲俠? 以戲駁戲係冇結論,問題係點解大台膠劇總會用到「因為佢係你老豆」,「話哂都係親生」去作為理由去解決親人之間嘅爭執同矛盾?

好多時候,我哋總會對身邊嘅人用住大量嘅理由強迫一個人去原諒另一個人,而華人社會中用得最多的就係存在住「父為子隱,子為父隱」嘅心態,但凡係親人做嘅錯事,只要因為有血緣關係或者有關係,都可以獲得隱瞞同原諒。即使你唔想,身邊嘅人都會強迫你去原諒佢,而因為,就因為佢係較親人嘅,甚至佢就係親人。

因此你會見到呢套戲入面唔少角色,對親人係有一種執迷,聽到「當年佢迫不得已跟二奶走而扔低你」呢啲荒謬絕倫嘅理由,佢仍然好似搵到出口咁叫王浩信原諒佢,因為華人社會永遠會用「親人」嘅優勢去強迫一個人抑壓佢嘅情感,那怕呢親人做過一啲好過份嘅事都好,最後華人電視劇都會以「血濃於水」嘅理由去宣揚呢一種「唯親」嘅心態,而最大問題就係,我哋呢一代嘅年輕人唔認同,但係上一輩人仲係好收貨。

所以你唔好問點解仍然有咁多老屎忽會用年紀去迫你讓座,更唔好問點解總有一啲父母會用「我係你阿媽你就梗係要聽我話」嘅心態去教仔,迫個仔做佢唔鐘意做嘅嘢,更加唔好問點解咁多年輕人抑鬱,學《醜陋的中國人》嘅作者柏楊講法,我哋係存在住一種劣根性,對大道理有一種執迷,因為大道理係會為某一班人賦予一種特權同權力,而呢種一道理存在喺我哋華人社會永遠都會聽落好似好合理,例如「老吾老以及人之老」,就係一直灌輸畀人聽,我哋對其他老人家要好似對自己嘅長輩一樣好,而呢個思想,到今時今日仲係存在緊,只不過去到我哋呢一代會諗,點解呢個人要對佢好?點解呢個老人家我一定要讓座畀佢?點解我一定要聽呢個人講?而當我哋問呢啲問題嘅時候,其實佢哋一早有答案,而個答案就係:「因為佢係老人家囉!」、「因為佢係你阿媽囉!」。

咁好啦,上一輩嘅人會有呢啲思想唔出奇,問題就係,點解我哋呢個世代轉變,會轉得咁慢呢?當睇到呢集大台劇,我終於發現大台膠劇最離地嘅一個位係,佢哋根本冇睇得透點解兩代人會出現問題,而更甚嘅係,佢哋根本冇留意到,「嚟啦我支持你」,「加油呀」呢啲鼓勵人嘅方式根本就冇用,就好似晚晚都做嘅《愛回家》咁,對白照寫,戲照拍,講啲肉麻對白就可以Sell親情,最後喜歡睇大台嘅師奶睇完,好嘅就會識反思,唔好嘅就會唔小心用咗呢一套套落去自己家庭身上,而問題嘅核心就係,作為主要傳播媒界嘅平台,佢哋仍然不自覺咁宣揚梗呢個想法,你問點解兩代關係仲係有個楚河漢界,呢個未必係主因,不過或多或少,我就覺得有啲關係。

 

 

最後分享一個例子畀大家,有一位朋友佢一直都有抑鬱症,而佢阿媽一直都以為帶佢去睇醫生就冇問題,返到屋企雖然會叫呢位朋友加油努力醫好呢個病,但當呢個朋友向佢分享情感嘅時候,呢個阿媽就會不自覺用大道理去說服佢接受,而結果呢個朋友,病情一直冇好過。你話阿媽係咪錯?未必,喺佢個世界嘅認知就係咁,只不過呢啲思想,背後原來仲有好多主流媒體支撐住。

 

 

作者:Sunshine

Sunshine
無限的宇宙裡,人和物質的山,水,遠村,雲樹,又如何比得起?然而人的思想可以超越到太空裡去,它們卻永遠只在地面上。《山中雜感》--冰心 FB PAGE: 陽光燦爛的 Sunshine

閱讀後覺得好,請多多讚好及分享~:)

其他熱門文章

  • 【遊戲新聞】新 PS Plus 訂閱服務推出 要補差價兼無訂閱期揀引起爭議 by 滅盡殺手
    有見微軟推出嘅 Xbox Game Pass 大受歡迎,Sony 亦都緊接推出自家嘅訂閱服務,亦即係今日正式上 […]…
  • 《彼岸島》絕對是我人生中看的其中一套最令我無言的漫畫。 by 鵝鑾鼻燈塔
    如果你沒有看過,恭喜你,你的人生是完全沒有任何損失的。這種比狗血更狗血的劇情,永無休止又不斷無限loop的橋段,看了也想把自己雙眼也插盲。簡單來說,主角不論做了甚麼,也無法打死早已不死的吸血鬼之王,只能眼看自己的同伴一個又一個的死去(有時甚…
  • 【BNT-020】為保住工作的女生注射了疫苗 by 柚希
    她解開襯衫最上的兩粒鈕扣,輕輕的向左邊拉下襯衫露出少部分的黑色胸罩跟小麥色的肌膚,教男護士呑了呑口水。「消毒完喇,會有少少痛,忍一忍吓。」「嗯。」Jess緊閉眼睛,憶起工作上的瑣碎事情嘗試分散注意力。「打完架喇,小姐你去休息區坐到紙仔上嘅時…
  • 18年後再次見到中國人,佢露出巨龍打招呼 by 薰華
    首先,我哋要了解下秦漢時嘅人係點坐嘅先。今日我哋會坐喺櫈上面,其實係胡人帶嚟嘅文化嚟,早期華人嘅正式坐姿,就係今日日本人嘅「正坐」,係坐喺地上面嘅,而呢種坐法,冇練過嘅話我真係寧願唔坐。…
  • 老師話同性戀唔啱,應該點答返佢? by 外賣仔
    如果一個「老師」話同性戀唔啱,你哋拍拖係錯嘅,千祈唔好諗住抗衡話同性戀無嘢先,因為呢個「老師」已經預設咗呢條問題,佢啱,但你錯。呢個時候你要先更正佢條問題先,記住,係更正佢條問題先,因為你面對緊嘅對手其實係一個白痴同埋低能嚟嘅,根本對同性戀…
  • 【轉工適用】Reference Check 又黎料啦 by HR 扮工週記
    Reference check 一般會喺個 Candidate 拎咗 Offer 之後做,公司會跟據 Candidate 俾嘅資料,然後向以前嘅僱主查詢所提供資料係咪屬實。不過唔係所有公司都會做,一般某啲特定行業或者有少少規模嘅先會去做。其…
歡迎讚好我們的facebook page,免費資訊源源送上。

文章資訊

ID: 166170
Date: 2017-08-08 03:13:30
Generated at: 2022-05-26 06:00:00
Permalink: https://www.vjmedia.com.hk/articles/2017/08/08/166170/大台劇《踩過界》:證明華人社會仍然會用大道理