大學平凡事——想出軌就出啦,講乜吖你

 

「諗野諗到入哂神,諗近乜鬼吖你?」
「其實你有無諗過你宜家個個,唔係你最鍾意個個?」
「唉,你係咪傻咗, 比句『個個都拍拖,唔通個個都想拍拖』洗腦洗到傻咗吖」

以上就係我同我個朋友凌晨三點鐘係Soc房一直傾,直到訓著之前最後幾句對話。我答咗佢之後,佢就再無出過聲,我諗大概都係訓咗啦。

但係我第二日朝醒咗之後,我諗諗吓,其實佢咁諗都唔係無道理嘅。佢係一個好特別嘅人,佢成日都好靜好靜,我每次都唔知佢係度諗緊乜野。我大部分見到佢嘅時候,佢都只係發緊怐瞀。每次當佢講起佢嘅另一半嘅時候,我都好期待,其實唔係我八掛,只係佢實在太神秘,好少好少講到佢另一半,但係個一晚,偏偏得返我地兩個係Soc房,所以自然而然就講起呢啲野。

佢同另一半嘅關係好奇怪,佢地兩個人,女仔就好耐先搵一次男仔,但係男仔就成日搵佢,搞到佢地兩個成日都出現小問題,雖然兩個人都唔會因為呢件事互相鬧大家,但係呢一件事令到男仔開始諗一個問題:究竟宜家嘅另一半係唔係最終屬於自己嘅另一半呢?

成日話兩個人相處需要互相忍耐,無一個完美嘅人可以配合到天衣無縫,無兩個人相處嘅時候可以無摩擦。但係究竟宜家嘅呢一個人係咪值得自己去忍耐,去等待,定係抑或應該搵過另一個人呢?呢啲問題嘅答案肯定係無解嘅,因為愛情本身就無標準答案,只係睇吓兩個人有邊個人開始放手,唔再忍耐落去。

佢同我講,話佢近排遇到一個人,呢個人嘅氣質對佢黎講,已經有一定嘅吸引力,令到佢係除左諗起另一半就係諗住呢一個女仔,姑且就叫呢個女仔做女仔A先。女仔A係佢係做莊務嘅時候認識嘅,每一次見到女仔A,都係女仔A係度好專心做緊野。女仔A係一個做野會好認真,同佢宜家嘅另一半好唔同,佢另一半做野嘅時候好多時都係係度揼波鐘,揼得一日得一日,搞到好多野都做唔哂,而且又比人話。佢仲係呢個時候同我講咗話好彩個女仔無同佢上同一支莊,唔係真係搞到佢火都黎。但係對住女仔A,佢就覺得如果自己嘅另一半都有女仔A一半就好。

「其實,你覺得,我係咪鐘意咗佢?」
「呢啲野我點會知?你諗起女仔A多定你另一半多?」
「我都唔知道,只不過有時候我好享受係女仔A隔離,但係又好大罪惡感。好多時我都會幻想如果女仔A做咗我女朋友會點。」
「其實,你係咪只係比女仔A嘅身材同樣吸引住咋?」
「唔係囉,佢同我依家個個差唔多,差距最多都係性格咋。」
「我唔知道啦,咁你睇吓你鐘意邊一個多啲啦,鐘意一個就專心鐘意一個,唔好亂諗啦。」

呢次係我第二次同佢傾呢樣野,我都唔知道佢最後同佢另一半點啦,因為佢再無留到咁夜,夜晚都係得返我自己一個人奮鬥。

 

作者:蛋捲蝦子麵

隨遇而安,甘於平淡的大學生一名。常常會因想到將來平凡得不再平凡的生活而滿足的人。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 166248
Date: 2017-08-09 04:27:38
Generated at: 2019-09-24 02:52:08
Permalink: https://www.vjmedia.com.hk/articles/2017/08/09/166248/大學平凡事-想出軌就出啦,講乜吖你