樂觀到以為踩低人地就可以抬高到自己

 

到咗今時今日仲攞林夕同Wyman嘅詞作比較,除了戇鳩,亦是戇鳩,因為唔會有答案。咁樣比較,就好似攞住幅油畫同張相問邊樣正啲咁,兩樣黎架㗎喎師兄,比乜啫?佢地兩個都係填詞界大師級人馬,堪稱鬼才,雖然兩個都係叫偉文啫,但哩兩個偉文嘅風格就好唔同,簡單啲講就係一個含蓄、一個淺白。林夕嘅詞多數都好婉轉,即係唔會好直接咁表達感情,而係好似畫一幅畫俾你咁,等你慢慢去感受。佢嘅詞充滿意境,有深度,係需要聽幾次先慢慢有所領悟,但亦有可能永遠都唔會明。相反,Wyman寫嘅嘢就直接了當得多,淺白易明嘅文字,但就好似寫咗你心底嗰句嘢咁,容易一聽就明,所以傳唱度相對高好多,但就無左一份細膩感。

所以,就算搵同一首曲俾佢哋各填一首詞,填埋同一個主題又俾同一個人唱,我相信得出嚟嘅結果都只會係不相伯仲,各有千秋各有其好。當然,係兩人海量嘅作品之中,有佳作,自然會亦有啲作品比較遜色,有行貨亦唔意外。但攞黎對決,俾你彈到一文不值,都唔會令到佢哋填詞突然差咗,其他人又會突然勁咗。唔係真係諗住踩低林夕同Wyman,自己就會即刻上神枱呀?神枱貓屎就有份。就算真係俾你攞晒佢地兩個人歷年所有嘅詞分高下,輸同贏咁又點,最多咪話林夕叻過Wyman,或者Wyman勁過林夕囉。啲人成日口口聲聲話佢地壟斷香港填詞界,偏偏日日夜夜都依戀著兩位神人嘅詞,但其實香港唔係淨係得哩兩個詞人,真係仲有好多好好嘅詞人㗎!好似潘源良、于逸堯、林若寧、陳詠謙、陳少琪、張美賢、周耀輝、周博賢、甄健強、梁柏堅⋯⋯等等,雖然未至於多到數唔到,但佢地嘅作品點都會聽過,只係唔係兩個神人嘅詞就無為意啫。同埋唔係淨係得林夕有開班授徒,周耀輝都有填詞班㗎,不過收幾錢一堂就唔知喇,而最可惜嘅係,依家林夕已經唔再開班喇。

講到尾,你話比較吓個人喜好,自己鍾意邊個人邊首詞多啲,係有得討論吓,如果你問我,我係鍾意林夕嘅詞多啲,由初出茅廬曾經主打非情歌以至Twins少女青澀嘅《女校男生》,去到《明年今日》絕處逢生失戀歌,到後期《一絲不掛》充滿禪意又帶有希望嘅詞,基本上我全部都鍾意,全部我都覺得好正,但唔等於Wyman嘅就差,我反而覺得Wyman作品流行度係高啲啲。就好似當年《最佳損友》唱到街知巷聞,「朋友,我當無一世朋友⋯⋯」查實又算唔算另一種預言呢?如果當年你無損友,我諗都幾難大開眼戒。

 

 

作者:太樂觀是一種病

太樂觀是一種病

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 166641
Date: 2017-08-15 15:40:30
Generated at: 2020-08-13 05:05:27
Permalink: https://www.vjmedia.com.hk/articles/2017/08/15/166641/樂觀到以為踩低人地就可以抬高到自己