亂評港劇:《瑪嘉烈與大衞系列—前度》

書文歌影 / 最新文章綜覽

 

重要:本劇評內容不含劇透,請各位看倌放心閱讀。

 

前度不及綠豆耐人尋味,不論演技同分鏡都不及綠豆。但綠豆嘅拍得好令我願意去追,願意去俾新面孔機會。而有一樣嘢前度超越咗綠豆嘅,或者比綠豆做得好嘅,就係音樂嘅選擇。佢哋入邊每一首歌都對一集起住不可取替嘅作用,歌有新有舊,有度身訂造亦有精選嘅現成舊歌。如果日後嘅劇集都做到呢樣嘢,我會覺得係歌影視嘅再次成功合體。呢個亦都令我諗起不久嘅《一念無明》同《今晚打喪屍》,再推遠少少就係《狂舞派》、志明春嬌系列同埋《小男人周記3之吾家有喜》。好嘅音樂選擇總係可以令人對一個戲劇作品念念不忘或吸引人起手睇,甚至每聽起嗰首歌就會諗返戲中嘅情節,當中呢個做得很好嘅就係早期嘅合拍片《如果‧愛》(雖然音樂嘅表現有啲瑕疵位,但如果講音樂作為推動劇情嘅主導角式嚟講真係唔差——而先天優勢就係呢套真心係歌舞電影啦)。

睇綠豆,你每一刻都會感受到些少苦澀,每每回甘,感覺實在嘅,係齋啡。而前度呢,嗰種感覺嚟得少啲,但係咪差?如果你一個星期前問我,我會話完全比唔上。但依家呢?我會話其實好睇,第一下飲落去係滑嘅奶泡,後面愈嚟慢慢多些少啡味,層次係漸層嘅感覺,似cappuccino。我諗唔少人係為住杜小喬或是袁澧林入場觀看(包括我),不過唔同嘅係我同時係因為廖碧兒而睇呢套。呢套劇做咗電視劇上一個好大膽嘅處理,就係第二十集〈舊氣味〉以副線人物做主要情節推動,佢哋放咗廖碧兒同黃秋生嘅「對談」嚟講返前面集數只屬暗示嘅事,後面嘅大衞出現感覺係為上承前文,後啟對感情嘅探討「面對感情嘅時候,咩叫為一個人好?」若果係十五十六唔知睇好唔睇好嘅朋友,建議由二十集起試睇。

由甜蜜、衝擊、新鮮、遷就、厭倦、分開、猜疑、習慣、疲憊,講到點樣對一個人好。我好記得都最鍾意今日呢一集嗰句「維珍只想做一個好人」,似乎維珍(廖碧兒飾)雖然係道德上企咗一個點都錯嘅位,而佢喺描述底下卻係最好嘅人,靚、大方、聰慧、細緻。講講吓我又諗起瑪嘉烈(袁澧林飾)送錯俾洛奇(許志安飾)嘅嗰個咖啡味蛋糕,錯有錯著,但慘得過洛奇鍾意。 唔知有冇人好似我咁錯有錯著睇到呢一日先覺得真係超好睇呢?如果淨係睇咗綠豆嘅人,記得睇埋前度,好多嘢係呼應咗嘅。而睇咗前度嘅人記得睇返綠豆,睇完就會覺得沒有了綠豆,前度就唔係前度呢!

本來仲想寫吓前度裏嘅對倒,以及前度與綠豆嘅互讀呢。但看來寫吓寫吓愈寫就愈遠呢件事真係唔好(雖然已經做咗),唯有再看幾時吧!

 

細細聲:二十集〈舊氣味〉嗰度如果用咗陳奕迅嘅《黑洞》,如果剪返出嚟根本可以做音樂MV呢!Eason歌迷快看吧,不服來辯。

 

作者:Echo

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 166706
Date: 2017-08-16 15:59:09
Generated at: 2020-09-22 13:04:38
Permalink: https://www.vjmedia.com.hk/articles/2017/08/16/166706/亂評港劇:《瑪嘉烈與大衞系列-前度》