出身小康又靚女,港獨嘅嘢唔關我事,我諗住走嫁喇~

 

無人希望自己需要面對恐怖政治。喺恐怖政治嘅世界度,投獄從來都只係最低消費,說好的殺戮仲唔知會唔會出現[1]。所謂「生不入官門,死不落地府」,只要乖乖地唔好動搖政權,呢啲恐怖政治,對我呢啲尋常百姓嚟講,都係一啲好remote嘅事情,唔引火自焚都唔會燒得著我。

當恐怖成為「正義」[2],幕末時候嘅日本暗殺不斷,法蘭西大革命時人人自危嘅景象,無人希望會發生喺自己身上。再對好多人嚟講貼身少少嘅,中國過去幾十年嚟發生咁多政治運動,反呢個、批鬥嗰個嘅呢種情景,好多人都仲有陰影同埋創傷,唔會希望自己呢個好似可以安居樂業嘅地方變得更壞。

依家好可以安居樂業咩?我呢啲離地嘅人講出嚟咩說服力都無:唔通無味覺嘅我同你講搵食艱難,又真係村民所講嘅搵食艱難[3]咩?好喇,就當村民真係有少少難搵食呢個statement係true,點解要冒險改變?改變未必係一件好事,事情可以變好,亦可以變差。

有人話,香港呢個地方今時唔同往日,好多佢哋覺得重要嘅根基同埋價值受到動搖,變成一個唔係佢哋想要嘅現況。但事實係,工時係就係長、上流機會係就係回復咗正常[4],仲叫做有瓦遮頭有兩餐食,尚算可以生存。要做得返嗰啲人期待嘅舊日的香港,我諗除咗搵牧瀬紅莉栖整部time machine改變時間線,都無咩法子做得到。

搞港獨,咁即係同個政權作對啦。好喇,此時此刻要付出啲咩統統唔好計,非常wishfully thinking咁樣俾佢哋成功咗喇,大家要面對一個點樣嘅世界、要喺一個點樣嘅世界入面生存,甚至生活呢?諗到呢度,都真係有少少覺得恐怖。

紐倫堡?正義唔正義我唔知,我只係知道佢同依家香港見到嘅一大堆案件一樣,都係政治審判嚟。就當紐倫堡唔會發生、就當中國可以放手唔搞呢個最後「獨立」[5]咗嘅香港、就當撤資無發生,究竟平民百姓能唔能夠維持其實絕無僅有嘅生活質素呢?

而事實上,所謂「港獨」,可能只係可以救贖得到我哋呢一代人,將我哋呢一代人從無咩希望中拉返出嚟。我哋呢啲港英餘孽,血統唔得純正,正常任何一個新嘅政權都會想我哋早死早著:有啲過去嘅記憶係得我哋先有,有啲思想或者思緒係因為我哋經歷過先會萌生。我哋可以講舊時點好點好,懷緬昔日點風光點威風,或者我哋都唔係好親身經歷過,但起碼嗰個時代距離我哋唔係太遙遠,多少會有啲實感;就好似啲老人家講食樹皮一樣。但老人家食樹皮係憶苦而覺得依家甜;我哋係思甜於是覺得今時苦。我相信,嗯,只係無咩科學根據嘅相信,血統純正過我哋嘅下一代,會有一個比起我哋美好嘅前途,喺佢哋嘅世界唔會有我哋咁多嘅抗中情緒,生活亦當然會過得好過我哋,至少無咁多壓逼佢哋嘅理由。

我哋呢一代人嘅救贖,除咗反抗只有離開。我相信呢個諗法都會係主權持有人嘅意願:當然我相信,反抗都唔係option嚟。至於順服,嗯,隻眼開隻眼閉,唔好無謂咁樣延長戰線,我相信主權持有人都會係咁樣諗。而呢個隻眼開隻眼閉嘅做法,加上尚能維生呢個事實,姑勿論走到唔走到、絕望唔絕望,都無一個足夠嘅誘因,要人放棄現時嘅安穩,投入鬥爭。

鬥爭係酸楚嘅,但酸楚嘅只係過程,最後所祈求嘅都係秩序同埋安穩。但係,依家脆弱嘅秩序唔見崩壞[6],虛浮嘅安穩一息尚存,點解要同你經歷酸楚?何況,仲要唔見得鬥爭可以有曙光,換嚟一個比較堅固嘅秩序、無咁虛浮嘅安穩喎。當然,本質上秩序無論點都脆弱,安穩無論點都虛浮。唔好唔記得,上面講就當唔發生嘅嘢,唔發生只係一個最美好嘅結果;實際上全部唔發生好難,至少難過全部發生,點諗都應該係唔知點樣組合咁樣砌埋發生嘅。對村民嚟講,放棄現時嘅安穩,到最後可能只係換嚟更大嘅不安穩。真係諗起都怕怕。

如果肥胖唔係問題,無人會擔心癡肥;如果社會睇落正常,邊有咁多人關心政治。奢求全民覺醒,會唔會諗多咗?就當俾你搞港獨唔係問題,你點樣俾得到信心人,喺你嘅管治入面,可以食得安心瞓得落覺先?我諗無邊個正常人會想喺恐怖政治嘅世界度生存。

何況,有啲餅點都係得咁多,唔可能做得大,有人食多咗自然有人食少咗,見到將會食少咗嘅人點都會同你死過。而將會食少咗嘅會係咩嘢人呢?嗯,係咁簡單之嘛。

 

利申:我講下嫁咋~港獨嘅嘢唔關我事,我諗住走嫁喇~

 


 

[1] 未來嘅嘢我唔識預測,我好謙卑;會唔會出現我唔知啦。

[2] 呢啲咁虛無咁主觀嘅嘢,嗯,加返個引號會適合好多,mark up咗佢,直線曲線呢啲嘢自由心證自行判斷啦。

[3] 我係Literally搵嘢食;村民係講搵錢。

[4] 咁當然,有比較就會有其他感覺:上一代人嘅上流機會係不尋常地多同快啫,呢啲時也命也,你真係要講呢啲?如果真係要講就只有重現上一代人可以上流嘅路徑,即係殖民主撤走,同搞港獨動搖政權,個分別喺邊度?

[5] 起碼名義上係咁先

[6] 真係未,都未周圍有人打家劫舍,強姦詐騙都唔係無日無之,只要唔係政治案件都仲叫公正處理,你問十個人九個半都會同你講秩序無崩壞,信乎?

 

作者:砂糖雪(☆しゅがぁ雪♡)

砂糖雪(☆しゅがぁ雪♡)
汀瀅冰中結,砂糖雪裏埋。單純愛美愛腐愛幻想,自知殘存在凡塵俗世,沉溺虛構神話裏、迷途弱蟲迷宮中,困於弱水三千內顛倒夢想 - 神無月的凝視下,葬下零落的白色花瓣、綻放璀璨的戀色花火 - 明知是夢想,依然惜夢。FB :佐藤 栞

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 166742
Date: 2017-08-17 04:16:05
Generated at: 2022-09-28 14:30:26
Permalink: https://www.vjmedia.com.hk/articles/2017/08/17/166742/出身小康又靚女,港獨嘅嘢唔關我事,我諗住走嫁