佔人便宜仲以為自己係恩主,點解世界上有人戇鳩到覺得可以要求人地免費提供服務?

尊重,從來都是一種雙向的關係。-作為店家,每家小店必定有一個既定的營運模式與理念。一扇門不敢以不計成本自居,自問經營一家小店,面對日益上漲的各種支出與成本,客人的消費無疑是對我們最大的支持。小店真的很感謝大家欣賞和喜歡我們的空間,客人的…

Posted by KADO 一扇門 on 2017年8月15日

 

今日網上流傳左一單小事,無乜太仔細睇詳情,大概係有個女人想借一間鋪頭作為自己拍攝結婚影片既場景。雙方達成唔到共識,因為鋪頭認為唔可以免費借出,起碼要收費,個女人唔接受,所以借場既事就作罷。問題就黎啦,個個女人係交涉不果之後,係佢facebook上開名譴責對方,認為對方無人情味,自己充滿尊重同真誠既要求居然換黎一個虛偽銅臭既回應。

大佬呀,點世界上有人戇鳩到覺得可以要求人地免費提供服務咁荒謬?人地鋪頭打開門做生意,燈油火蠟鋪租唔使成本?你阻到人地做生意唔係成本?鋪頭要遷就你拍攝可能要搬走貨物,又要膽心你地整污糟,甚至破壞到地方,種種因素下,點解人地要免費租畀你?如果你認為呢個係一個環境好既拍攝場地,但連一小時$500都唔願意付出?人地鋪頭欠左你,要無條件任你使用?

係對話當中,佢個句「會給credit予 貴店」就係問題重點,亦係我寫呢篇文既原因。佔左人地便宜仲覺得自己係恩主,畀credit人當係報酬,係唔係似曾相識呢?大家記唔記得早一兩年有一單攝影工作報酬45個share事件?搵攝影師去影一班家庭既活動,報酬只有商機無限既45個share。其實都係同一種心態,就係覺得你提供既服務,根本就唔值咁多錢,甚至,唔值錢。

「你都係借個地方出黎畀我影下野,又唔阻你啲咩,點解要收我咁多錢?」
「你都係拎部相機出黎影下野,你本身就有部機,影相㩒個制,畀機會你練習下,仲收我錢?」
「你畫野咁叻,一陣就畫好啦,畫個幾筆收我咁貴,唔係呀?」
「幫我剪條片,好快啦幾分鐘片,又唔使你拍,幫幫手啦!」

我想講每一個人提供既服務,背後都有好多你睇唔到既成本(或者睇到但唔當人回事啦)。我自己都有業餘幫人影相拍片,所以用呢樣做個例子。攝影師硬件上既成本,首先講緊係佢既相機鏡頭腳架穩定器拖喼等等裝備,全部都要錢買返黎,唔係天跌落黎架;而仲有佢學習攝影既錢同時間呢?佢可能預先去視察場地既時間呢?佢幫你影相既時間呢?逐張逐張相幫你執既時間同心機呢?你恩賜畀對方既一個credit,一個share,可以畀到相等既價值咩?

人地提出收費係合情合理,唔同意仲反過黎話對方銅臭,呢種人真係乞衣都不如。唔好以為呢啲人係少數,見到咁多人鬧佢就以為佢係香港既小眾,你試下上網睇下人地搵freelance既價錢,好多都係乞衣價,分別係佢地可能係淨衣派,今次個女人係污衣派。

將心比己啦,如果今日係你自己提供一個服務,提供一個技能畀人,你自己都大概心入面有個譜應該係咩價錢,應該有咩待遇。一到自己要出錢畀人個陣,全部常理邏輯拋諸腦後,計盡每一分毫,其實,銅臭個個,係你自己。

 

作者:木人里

一個心地善良既仆街。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 166745
Date: 2017-08-17 04:50:38
Generated at: 2020-10-31 19:05:51
Permalink: https://www.vjmedia.com.hk/articles/2017/08/17/166745/佔人便宜仲以為自己係恩主,點解世界上有人戇鳩