【世紀難題】究竟點先可以令人唔好再遲到?

 

 

「唔好意思,我會遲少少。」Mike說。
「琴晚咪提咗你千其唔好遲到㗎囉,平時拍拖都算,今次約咗阿爸阿媽呀大佬,死人㗎。」我說。
「哎呀,咁啱走咗㗎車呀。」Mike說。
「你唔可以預鬆少少時間嘅咩?成日都有遲無早。」我說。
「下次唔會喇sorry呀。」Mike說。

遲到,係人都試過,包括我自己,原因有好多,唔知醒啦、塞車啦、搵唔到電話啦、臨出門口隻狗痾咗屎等等。由細到大我屋企人都好守時,所以我都好少遲到,除非加班啦,因為遲到要人等其實會好唔好意思,特別係啲比較重要嘅情況,例如見工、開會、約咗長輩等等,通常我都會預早少少,驚有啲咩突發情況發生,我記得老豆話過:「我哋等人好過人哋等我哋。」

其實久唔久遲到一次,十五分鐘內,我覺得係可以接受,可能真係咁啱地鐵故障,可惜有啲人已經將遲到變成習慣,基本上十次有十次都會遲,半個鐘,一個鐘都有,而且係毫無歉意嗰種,佢會好好咁預告你知佢會遲到,然後講完就覺得任務完成,遲幾多都唔緊要,佢嚟到你話佢,佢只會話:「係你早到啫!/ 我一早講咗我會遲㗎啦!」面對呢啲人其實真係幾難頂。

今次嘅主角係我朋友阿玲(有新角色喇終於),無論返學、返工、朋友gathering,基本上任何約會佢都會遲到,輕則半個鐘,重則個幾鐘,點解會遲?佢通常都無解釋㗎,一係就好虛咁話「有嘢做」。我同朋友都試過好多方法去令佢唔好遲到,例如約佢6點但我哋6點半先到,可惜佢通常比我哋仲遲,又試過話邊個遲到請食飯,佢就話唔舒服去咗睇醫生,試過whatsapp千叮萬囑佢唔好遲到,因為間餐廳齊人先入得,佢都係照遲,然後成村人一齊等佢一個,浪費時間。

久而久之,無人想再主動約佢,一班人都還好,可以食住等,兩個人真係唔會囉,時間好寶貴,唔係咁樣畀你浪費(押韻XD)。其實喺好耐之前我已經發現守時嘅人真係少之又少,大部分人都覺得遲到好小事,甚至連sorry都唔會講聲,無論你點樣溫馨提示佢,警告佢,佢一樣會有各種唔同嘅理由遲到。其實如果唔超過半小時,有解釋同sorry,我都會當無事發生過,如果連呢啲表面功夫都唔做,我都唔會鬧你嘅,我唔再約你啫。

 

P.S.「究竟點先可以令人唔好再遲到?」應該係世紀難題之一。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 167262
Date: 2017-08-24 05:31:16
Generated at: 2020-11-01 03:17:36
Permalink: https://www.vjmedia.com.hk/articles/2017/08/24/167262/【世紀難題】究竟點先可以令人唔好再遲到?