【佢哋好L有錢】是咁的,我幫緊一家四口北京來港新移民補習廣東話

 

(photo via cc Flickr user jnayar)

 

話說近來有組補習學生,係一個月前啱啱由北京移咗民嚟嘅一家人,一家四口老豆老母大仔細仔。
補咩呢?就係補廣東話喇。

大仔嚟緊九月讀master,細仔仲讀緊小學,讀國際學校,家住九龍塘嘅house,簡單啲講即係好L有錢啦。
初初我都幾appreciate啲學廣東話嘅大陸人,覺得佢哋想融入香港文化,而且有受過教育嘅大陸人牌面上幾有禮貌。但之後就發現對佢哋嚟講,廣東話只係香港同大陸無縫接軌前嘅過渡工具。

當然現階段佢哋仲講得好差啦,拍馬都未追得上譚仔阿姐。
尋日上第六堂,老母話:「听得懂就是胜利!」
原來佢哋根本就唔打算識講廣東話,識聽就夠,當你班港豬屌緊佢哋嗰陣佢知你屌緊咩就夠,然後佢會用普通話幹回去。

個老母係咁講香港真係好唔方便(我心諗咁大個人都係第一次聽人講香港唔方便),例如請個菲傭七月請要成十二月先到:「在北京整个房间的保姆让我挑呢!」;想買架車又要幾個月先到,搞到冇得揸車出門下下要等shuttle;睇戲訂飛唔同院線要逐個官網訂冇得一個網劃一搞掂(佢話movie express都要link返去百老匯嘉禾度先買到飛唔夠方便喎);淘寶有好多嘢香港都買唔到;買嘢又貴,喺大陸一二百就買到啲好好嘅衫,喺香港睇上眼嘅件件都過千;又話支付寶好多地方都用唔到,呢啲位反而澳門同大陸接軌得比較好⋯⋯而且佢仲話:「繁体字太麻煩了,简体字好多了!」
有啲位我唔comment佢啦,畢竟我冇住過北京唔知係咪真係方便過香港好多,又有可能係佢未熟香港嗰套所以先覺得唔方便,你叫我宜家搬去北京我應該都覺得好乸麻煩。
但重點係,聽佢哋講呢啲嘢嘅時候,你feel到佢根本睇唔起香港嘅文化,佢哋預咗香港遲早都會同大陸接軌,到時佢哋就唔使聽唔使講廣東話,唔使睇啲一舊舊嘅繁體字。
我哋覺得佢哋文盲又點,佢有錢就是任性呀。

佢講到咁L慘,我就問佢:「那为什么你们还要来香港呢?」
人哋老母:「听说还是香港的教育比较好,所以我们就跟着来受苦了。」

嘩咁有錢嚟到香港都覺得係受苦,扯吧啦。
其實佢細仔喺北京嘅時候都係讀國際學校,即係唔識睇中文嗰啲,所以喺香港定喺北京讀書喺我睇嚟就差無幾。所以重點應該係佢就嚟讀master嘅大仔。
但佢個大仔成廿三歲,都唔使老豆老母照顧啦,佢哋咁L有錢,喺香港人買間屋畀個大仔自己住咪得,成家移曬民過嚟陪仔讀書真係有錢就是任性。

 

香港好似美國咁,其實一直都係移民國家。
我哋老豆同阿爺嗰代啲香港人,好多都係大陸移民過嚟,差在以前嘅新移民好多都好L窮,宜家嘅新移民好多都好L有錢。
我老豆老母都係新移民,當年阿嫲唔知做咩拎咗單程證嚟香港,我老豆就跟埋落嚟。後來阿嫲又唔知做咩返返大陸,老豆就留咗喺香港,兩年後老母又跟埋老豆落嚟香港。老母嚟咗香港三個月就意外有咗我,卒之就一直留咗喺度。

上一兩代嘅新移民通常都冇乜錢,加上一出邊境學歷練歷遭打折扣,嚟到先發現傳說中嘅遍地黃金係呃人,所以嚟香港真係受苦。
又同宜家啲暴發新移民唔同嘅係,上一兩代嘅人嚟到香港會自動自覺學廣東話,宜家嘅好多都覺得香港人要遷就佢哋講普通話。
去人哋地方尊重人哋文化呢啲基本嘢呢十年已經講得太多,問題就係大陸人唔覺得香港係人哋地方,佢哋覺得香港是中國不可分割的一部分,即使喺香港,中國依然是主。

我成日都覺得香港人真係好叻又好nice,對住鬼佬會自動波講英文,對住大陸人台灣人又會轉channel講普通話,你幾時見過其他國家嘅人好似香港人咁就得人咁有彈性至得㗎。
但對住呢班有錢就是任性嘅大陸人,包括我啲大陸學生,咁L睇小廣東話同香港文化真係會嬲豬。仆佢個街我相信母語係廣東話嘅人本身係聰明過母語係普通話嘅人,廣東話咁L靈活同千變萬化,照計會activate多啲腦部嘅地區去處理句子(總之我信了)。
對住啲咁L臭串嘅人,香港人真係應該要多返啲傲氣。最起碼日常生活有人用捲脷普通話問你嘢嘅時候,唔使急住捲起自己條脷,用字正腔圓嘅廣東話答佢啦。

語言就是政治,吾等港豚真係唔識點樣對抗強權,但既然有人在前線為革命捨身捨自由,都應該有人在後方做啲揼石仔嘢。堅持講廣東話寫粵文咋嘛,好易咋嘛,日日都做緊㗎啦,加多少少骨氣企硬就得。
(sor9對住鬼佬我會講返英文,係唔fair㗎喇,鬼叫鬼佬從來冇打算用英文取代廣東話呀。)

另,
上堂講起「吟吟噚噚」同「岩岩蠶蠶」,我唔識解釋岩岩蠶蠶,需知佢形容物件又得形容人又得,然後我講到1999:「就是一个东西不完整,东缺一点西缺一点」。返屋企同老母講開,佢話:「即係『樣樣都齊曬,但係樣樣都唔好』」。
嘩,新移民嚟講我老母啲廣東話都真係算係咁。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

  • Client 問我點解自己係「仆街磁石」(上) by Professor Chan
    佢自從中學由女校畢業之後就無試過單身⋯⋯連一個月都無。每次同一個男仔分手,佢好快就會同另一個人一齊,佢話佢已經唔記得單身係咩感覺。…
  • Client 問我點解自己係「仆街磁石」(下) by Professor Chan
    依家,你重新行一次,你由出世到依家呢廿五年嘅經歷。好似一段Video咁,由過去,由開始播放,播放到依家呢一刻⋯⋯你可以由得唔同嘅片段喺你個腦入面播放,唔需要去控制佢,一路播一路同我講你見到咩。」我講。…
  • 香港人就係純樸到連日本人都可以喺度橫行霸道 by 白木乩
    就算係日本老母來到香港,無左其他日本人嘅目光,無左其他日本人文化監察,無左其他日本人鬧佢「打咩」、「巴加丫囉」、「渣媽」,出名桎梏出名壓抑嘅大和民族,都係會個性解放,係「個性」解放。…
  • 【遊戲新聞】NS糞級新作引起熱潮 《Final Sword》挑戰任記的可疑作品 by 五木
    以前超任、PS 年代因為資訊不流通,但係「買」Game 又極平嘅關係,所以成日玩到糞作。隨住資訊變得流通,今時 […]…
  • 由林美戀談起——藝人基督徒,係咪好好撈? by 殷琦
    無論16 年背夫偷食單野又好、現時與非基林作拍拖都好(雖然個人而言基與非基我是ok既...~)、「High Profile處理感情生活、信主後感情生活仍然混亂」是我覺得對你算中肯的評價。但這其實都超出一般教會的接納程度了吧?既然是藝人,言行…
  • 吃子的文化 by 健吾
    我有時會想,是不是真的有人會覺得「考得唔好唔緊要」,是一句安慰語。我考得好,所以我沒有辦法說什麼。對考得不好的同學,我也不能說「你考得不好不好意思」。更甚者,我有學生因為考得不好,進不了醫科而感覺遺憾終生,幸好他是一個鍥而不捨的人,讀完一個…
歡迎讚好我們的facebook page,免費資訊源源送上。

文章資訊

ID: 167428
Date: 2017-08-27 05:51:28
Generated at: 2020-07-08 07:40:09
Permalink: https://www.vjmedia.com.hk/articles/2017/08/27/167428/【佢哋好l有錢】是咁的,我幫緊一家四口北京來港