「筷子記」真係完全體現到香港人嘅所謂拼搏精神

 

 

「有位有位有位!直入轉左,拎紙寫定食咩!」
「快手啦!兩位入緊嚟,之後三位右邊!」
「收貨呀!慢吞吞,又無咗幾秒喇!」
「執嘢啦嗰度埋單呀!快快快!」
「30蚊,呢度畀錢!多謝!」
「無食飯呀你?爽手啦!」
「幾多位?入去啦入去啦!」

中環返工嘅打工仔通常都食過「筷子記」,咁以上嘅對話你應該唔會覺得陌生。食「筷子記」真係好似打仗咁,喺門口等位嘅時候老闆娘已經會隊疊簿仔同紅筆畀你,要你圈定食乜,然後一入到去就落單,員工九秒九就拎嘢食同嘢飲畀你,你就一路食一路聽住老闆娘鞭策佢嘅員工,帶位、落單、傳菜、執枱、抹枱、收貨,每個步驟佢都望到實一實,一秒佢都唔會放過,員工連喘息嘅機會都無,我自問真係做唔到呢份工。

唔止員工,其實連食客都好大壓力,唔好以為你係畀錢嗰個就係大晒,呢度嘅首領只有一個,就係老闆娘。首先你揀餸係唔可以揀得慢,佢會企喺你隔嚟等,我見過有兩個大陸遊客唔知揀咩好,佢就直情幫人揀埋,話:「痴雞翼魚蛋啦,姣痴姣痴呀!」對住我呢啲慳皮妹,食下午茶仲要淨係揀兩個餸,佢就會話:「吓?兩個餸咋?唔揀多個?」初初係會畀佢兇到,但係而家已經食慣咗唔鬼理佢。

佢仲有一個絕技,就係玩俄羅斯方塊,不斷將啲人塞晒入每一張枱,左調右調,一張圓枱係要坐八個人,大家係迫到手踭撞手踭,大脾貼大脾,然後一唔夠位佢就吩咐員工去收走食客嘅嘢食同嘢飲,唔會理你食晒未,有時佢仲急到要自己親自出馬收,喺咁窄嘅環境同壓迫嘅氣氛之下,大家都食得好快,佢就不斷收錢數錢同鬧人。

可能你會問食得咁辛苦點解仲要去啫?無計㗎喎鬼叫佢平得嚟又好食咩,而且日日都出去食lunch,唔食平啲真係會死人。當然,中環其實仲有好多平嘢食,詳情可以睇返我兩篇舊文:《邊個話中環無平嘢食?(一)(二)》。香港人嘅所謂拼搏精神,核心價值,竟然連喺「筷子記」都體現到,真係巧叻叻。

 

P.S. 呢篇係啱啱睇完《當你以為係中環返工有幾威,但其實我只食得起筷子記》即興寫。

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 167656
Date: 2017-08-29 04:13:38
Generated at: 2020-11-01 02:48:05
Permalink: https://www.vjmedia.com.hk/articles/2017/08/29/167656/「筷子記」真係完全體現到香港人嘅所謂拼搏精神