艾小姐,知你靚喇,但你都犯不著咁侮辱性工作者丫?

 

上禮拜數字周刊登咗幾篇報導,淺探一下獨居劏房嘅香港女仔。雖然我唔係獨居,但住劏房咁貼身嘅議題當然會留意下。

睇完之後呢,我第一個感覺係有啲污名化劏房,講到劏房就等於一樓一。

係,好多一樓一都位於唐樓,梗係啦一個客收幾百蚊貨仔,租私樓唔抵丫嘛。但大部分一樓一位於唐樓,唔代表大部分唐樓都有一樓一㗎好冇。
另外,三個受訪女仔嘅其中兩個都話劏房好多小強,但多小強唔係劏房嘅問題,係成棟樓太舊嘅問題。就算你唔係算劏房,住一間完整嘅唐樓單位,出入都一樣好多小強。
我就好L驚小強嘅,春夏季出入嘅時候都會同對佢撞個正著,佢喺樓梯邊chill緊都還好,我最多一個箭步狗衝落去,但如果佢喺正梯級中間,只能同佢講:「okay,你宜家想點?」然後同佢對峙到佢施施然行開或者引開佢,講起都打冷震。

不過我唔係幫劏房講好說話,劏房空氣流通唔好,一感冒啲細菌trap喺屋內都冇咁易走。我自己自從開始住劏房之後,身體都差咗好多,尤其氣管同喉嚨問題,今年鼻敏感仲惡化到變鼻竇炎,都唔知關唔關事。再講,之所以會有咁多劏房出現,都係因為人口爆破同貧富懸殊太太太嚴重,可以的話我都想劏房從香港消失。

睇完報導第二個感覺係——污名化性工作者。
報導中嘅女受訪者言談間對性工作者嘅厭惡都唔使再點補充,其中一位住劏房嘅性感女星仲因為被誤會係雞而覺得委屈。
坦白講,你棟樓有一樓一,被誤會係雞又有咩出奇,你一日唔拋個身下海其實都冇咩蝕。我住嗰棟之前都有一樓一,間中會見到啲姐姐仔同啲阿叔上嚟,畀阿叔望兩眼我又冇咩嘢,佢畀錢叫雞啫,係嫖客唔係強姦犯呀。再者,知嗰度多雞蟲又唔想被人誤會嘅,出出入入著件外套囉,保護自己你自己都有責任㗎。
嗱,女權撚唔好衝出嚟講咩女性身體自主,喺邊度著咩衫都應該受尊重同保護。如果你明知住嗰度治安唔好多賊嘅,都會鎖好啲門窗啦,保護自己同道德教育冇衝突㗎下。
雖然我覺得其中一個女仔帶刀仔出街都幾誇張(同埋是咪犯法),但又咁講,如果真係萬一有咩事,冇武器就係冇武器,受傷之後講咩都係馬後炮。

另外有個女仔話因為收入超標,同男朋友結婚都申請唔到公屋,所以會先生仔後結婚,三個人攤分就唔會超標申請到喇。
下,為咗住公屋所以生仔?又唔係一有b就申請到公屋,咁個b啱啱出世嗰幾年住邊?要個仔為兩個大人嘅住屋問題埋單,我衷心希望個女仔同男朋友係不育㗎。

仲有個女仔(攜刀嗰個),為咗體驗生活所以自己搬出嚟住咗一年,古有小康子弟出國留學訓練自立,今有小康閨秀住劏房嘗民間疾苦,去劏房exchange完仲要自信高呼得到成長不後悔云云。
衰啲咁講,講到住劏房咁危險出入咁驚,但過後又話係一個好好嘅經歷,都係因為呢段時間冇遇到啲咩不幸嘅事咋,真係萬一被人蝦,睇佢仲會唔會講咩住劏房係好好嘅經歷blahblahblah。
作為一個體驗完劏房生活都只能夠繼續體驗下去嘅人,嗰份天真同只能夠用作打飛機嘅自以為是,真係睇到我既葡萄又牙癢癢。

如果今時今日仲有父母捨得畀仔女自立捱下苦嘅,唔使畀咁多錢出國讀書啦,畀間劏房佢住就得,既經濟又實惠,返到嚟仲自信咗一圈添,得咗!

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 167728
Date: 2017-08-29 19:47:23
Generated at: 2020-03-30 06:00:48
Permalink: https://www.vjmedia.com.hk/articles/2017/08/29/167728/艾小姐,知你靚喇,但你都犯不著咁侮辱性工作者