兩位才子呀,其實SM 唔係咁架. . . . . .

 

最近Viu TV嘅晚吹系列多咗個新節目叫《啪啪Channel》,秉承前作《啪啪聲,太好聽》,都係講唔同嘅啪啪話題啦。今次就搵嚟專家Dickson、卓韻芝同十九才子陶傑做主持。

嗱,坦白講我純粹係想睇青頭仔專家Dickson未試過啪啪點樣講啪啪先睇,但睇到第二集,才子同Dickson講SM,嘩真係睇到我不吐不快喇。

 

 

節目一開始,才子就同Dickson講:「喂,唔係最近你都hi咗呢味嘢丫嘛?」嗱,雖然呢句說話充滿對SM嘅不屑,但姑且當佢以gimmick帶起個討論啦。

我唔詳講咩係BDSM喇,自己Google啦,但BDSM嘅重點唔係行為本身,而係關係嘅角力同權力嘅拉鋸。表面睇嚟係S控制個M,但都要M賦予權力S先有得控制佢。
十九才子最十九個位係,明明對SM(其實一般會叫做BDSM)嘅認識唔深,但又扮到智者咁似層層地發表評論。
十九才子好明顯就將BDSM同病態嘅性虐待撈埋一齊講,講到所有玩BDSM都係有心理病,將BDSM連上「瑕疵」同「創傷」就更加係無稽之談。
呢篇文章就講到唔同嘅研究都表示,BDSM實踐者並沒有心理健康問題。

然後才子講到,寄宿學校啲仔仔被校長體罰完就會有新發現,覺得自己係被虐狂。
才子讀咁多書,係唔係咁嘅邏輯都講得出?咁同「同同性拖手就會變同性戀者」有咩分別?
要被人開發到,都要本身就有呢個傾向。本身直嘅,同同性拖幾多次手都唔會變攣;反之攣嘅點都唔會拗得直;本身唔鍾意SM嘅,被人體罰幾多次都唔會興奮㗎好冇?
講到咁容易就可以改變一個人嘅性癖好,以前民智未開嘅年代要「治療」呢啲「變態」就容易好多啦。

而佢又隨口話:「呢個世界玩呢樣嘢呢,屍骸纍纍㗎」「每年呢統計呢,我唔知呀,喺西方國家或者全世界玩呢樣嘢,誤殺罪名成立嘅會有⋯有幾多囉。」「(講到扮狗、食屎飲尿)如果你咁樣落去,都叫做一種癖好,係應該包容呢,將來有好多呢啲性罪案呢,都要合法化。」,之後仲順口講到去德國綠黨提出「亂倫非刑事化」。
呢幾句對BDSM真係相當大嘅污名。
即係阿才子話曬都係個言論有影響力嘅人,唔知嘅嘢其實可以收聲唔使講㗎,屋企嘅家庭觀眾如果本身對BDSM冇咩認識、甚至已經有啲偏見嘅,聽完佢咁講,第時一聽到BDSM就真係踩到狗屎咁嘅樣㗎喇。

我上網查一查,的確有零星嘅玩SM誤殺案件,但平均一年都冇一宗,點都少過每年因為行山而意外死亡嘅人(反而喺日本,因為玩單人SM而死亡嘅相當多,一年超過300宗)。
你會唔會因為有人行山意外死亡而叫人唔好行山?唔會,你會教育行山者做足準備,留意天氣同自己身體情況,量力而為,而且唔好自己一個人行山;同樣地,玩BDSM一樣要做好準備同溝通,留意實施環境同自己嘅身體狀態,而且唔好自己一個玩。
再者,講到性罪行,可以係性虐待、強姦、非禮、性騷擾、強逼賣淫⋯⋯重點係未經同意強逼對方接受或者進行同性有關嘅行為(如果法律上有第二個定義update我please)。我明白佢意思係指BDSM嘅行為本身較一般性行為,較大機會發生意外,引致受傷甚至死亡,但如果將BDSM簡單地同性罪行同掛勾,或者同亂倫相提並論,又未免太淺薄,或者太狡猾。

對於日常生活以外唔了解嘅範疇,簡單一句「好變態呀」污名化好簡單,但我哋需要嘅教育,係學習用正確、安全嘅方法去進行,而唔係一嘢落曬閂拒諸門外,叫人唔好試、自己睇唔到就當唔存在。

需知道你自己唔玩SM,但呢個世界有好多人玩,而簡單嘅污名化並唔會改變人嘅性癖好,只會令好多人唔敢承認自己嘅性需要,或者繼續偷偷摸摸地玩。
睇AV都唔會學到真嘅性知識啦,BDSM都係㗎咋。如果BDSM文化地上化,就會加速知識嘅流動,從而減低因為認識不足而發生意外嘅機會。

最後,才子講到德國有BDSM愛好者上行遊行要求反歧視:「西方呢啲左膠我話畀你聽呀,落⋯落地獄就係咁解呀。」佢指出SM係癖好,並不存在歧視或者受歧視,因為一個人西裝骨骨做工程師、醫生、律師,平時嘅日常生活唔會表露SM傾向出嚟,佢自己唔爆出嚟就冇人知,冇人知就唔存在歧視喎。
哈哈哈哈哈哈哈哈!即係如果有個基佬,冇人睇得出佢係基佬,個社會就唔存在歧視喇?
定係才子個意思係,如果你畀人知道咗你鍾意BDSM,被歧視都無可厚非㗎?

同埋再一次睇得出才子真係好叻混淆視聽,傻豬豬嘅家庭觀眾聽完佢咁講,好容易就將BDSM愛好者同左膠劃上等號。

其實才子嘅思維真係好保守,只係好多人將佢等同英殖時期嘅榮譽,就覺得佢講嘅嘢代表權威。你只要將佢呢集口中嘅SM改成性小眾,就會發現佢對BDSM嘅觀點,同恐同班人污名化性小眾嘅套路係一樣㗎。

其實覺得SM變態冇咩所謂,正如唔鍾意性小眾其實都冇問題,鹹魚青菜各有所好,喜歡同討厭無法用理智改變,但點樣表達/需唔需要表達才是重點。你唔鍾意食榴槤都唔應該批評「食榴槤嘅人好變態囉」。
反正你自己冇呢個傾向,人哋圍爐討論又好閂埋房門玩又好,都唔影響你㗎啦,你收下聲唔好污名化人哋五花大綁扑嘢好冇?

簡單而言,不過「尊重」二字。

 

 

關於作者:一百八十呎

一百八十呎
既然有人表演瞓劏房,全天候住劏房的都是行為藝術家。

我有回應

則留言

閱讀後覺得好,請多多讚好及分享~:)

其他熱門文章

  • 中出即飛 by 堂前燕
    每次扑野之前,總要說一輪甜言蜜語,慢慢地連她都不相信,自己竟然有點相信他了,終於有一次,他中出了她。當初,女孩將他當成是SP,當然除了性愛,他也會盡sugar_daddy的責任給她買名牌和iPhone,但無可否認,對於初經人道的她來說,他的…
  • 【塔羅個案】上流社會的分手方式:左手機票,右手支票 by 神婆
    今次要寫嘅個案,老老實實,好戲劇性;同埋故事中牽涉嘅嗰位男士,喺社會上都算係有頭有面,如果開名都幾大鑊,所以,Macy係占卜完之後同我講「我想妳寫我嘅故事出黎」時,我都有啲吃驚。故事好簡單。Macy,二十來歲,鄰家女孩模樣,本來為Patri…
  • 條仔明明HIV+ 但呃人無事,仲公然中出係咩玩法? by 清風
    G 本身都唔係一個會周圍玩嘅人。佢好小心,但佢同我一樣都係一個用情極深嘅人。我好好彩,只係分手,冇撚左段感情同埋大阪來回機票;但 G 佢冇左男友,亦俾男友背叛左自己條命 。我相信呢個世界上有唔少人都有足夠嘅性知識去預防疾病,但原來,即使你唔…
  • 我女朋友有個孖生姐妹 by 毛言地
    冇錯,我女朋友係有個孖生姐妹,係似樣到齋望個樣我都未必分得出——但我冇孖生兄弟嘛,我女朋友會認得出我。雖然佢地的確成日出街,雖然我拍拖有時都會變三人行,但邊個見到我會飛撲埋嚟,邊個見到我淨係會笑笑口打個招呼我會睇到嘅,咁都唔知邊個係你女朋友…
  • 不知如何生活下去的偽ABC by 霏子
    「I_will_go_back_to_California_soon.」在屋邨學校畢業的他,刪除了所有舊照,缺席一切敘舊活動,他在California讀high_school,又怎能分身在香港讀中學呢?他說他考上了University_of…
歡迎讚好我們的facebook page,免費資訊源源送上。