好好珍惜嗰個仲肯同你鬧交嘅人

 

 

「Exact7ly應該無個l字。」Mike說。
「唔係喎,我記得係有個l字,我上網search下先。嗱,真係有呀!」我得戚地說。
「我打exact7y都search到有喎。」Mike說。
「但係太陽報都寫Exact7ly喎,同埋無咗個l都發唔到音。」我說。
「你咁認真就唔好打個7字落去啦,個7係代個l字㗎。」Mike說。
「個7都唔係代個l字!」我說。

可能你覺得咁都拗一餐真係好鬼無聊,但係拍拖就係咁㗎啦,乜都講一餐,有時仲會鬥下嘴,不過好快又無事咋嘛。每個人都有佢嘅睇法同價值觀,就算幾夾都好,總係會有意見唔同嘅時候,而且有啲嘢真係無分對錯,唔係非黑即白,只係唔同角度去睇一件事,所以有時都唔需要格硬說服另一半去認同自己,大家保持返自己嘅睇法其實無乜問題。

以前我係好少同前男友(姑且叫佢X先生,新角色出現)嗌交,因為我只會做yes girlfriend,乜都話yes,就算我唔同意佢講嘅嘢,我都唔會出聲,只會暗地裡唔gur。最初我諗住自己可以容忍到,以為乜都就晒對方就係好女友,但其實咁樣積積埋埋係會一次過爆發,然後佢就會覺得點解我之前有不滿又唔出聲,而家無啦啦又爆翻以前嘅嘢。每次我黑面,佢都會扮睇唔到,當無事發生,然後我塊面就繼續黑過舊炭,大家都好無癮咁逃避咗個問題,佢連交都唔費事同我鬧。

其實我一路都知唔開心係要出聲,唔係人哋唔會知我點諗,但係我就死都唔講,怕講出嚟好幼稚,或者顯得好小氣。直至幾年之後遇到阿Mike,佢就係死都要迫我講究竟發生咩事,永不放棄嗰種,然後往往我講完出嚟十次有十次都會發現只係超級小誤會,大家即時笑返,咩事都無,後嚟習慣咗就會有咩都即刻講出嚟,好多時嗌完交仲會更加了解對方,所以話溝通其實真係好緊要。

「喂,做乜講嘢無尾音?咩事?」Mike說。
「我頭先唔小心見到你同個女仔whatsapp仲傻笑得好開心!」我說。
「下,個女同事用緊粗口鬧我喎,話我成日做錯嘢要佢執屎,唔信你睇下。」Mike說。
「下,有無搞錯呀你,畀我我都會用粗口鬧你啦哈哈!」我說。
「所以頭先咪以笑遮醜囉。」Mike說。
「嘻嘻,又怪錯你添,今晚帶你去食好西補數。」我說。

 

P.S. 老老實實,有無人答到我係Exact7ly定Exact7y?

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 168089
Date: 2017-09-05 05:33:13
Generated at: 2020-10-31 21:06:48
Permalink: https://www.vjmedia.com.hk/articles/2017/09/05/168089/好好珍惜嗰個仲肯同你鬧交嘅人