謹祝各位高齡A0 盡快走出comfort zone

 

 

親愛的A0大軍:

早排喺森美嘅電台節目度,聽到兩三個迴響頗大嘅表白電話,打電話想表白嘅,不約而同都係A0嘅隊員。
好多人會安慰A0嘅朋友:「你未遇到嗰個對的人啫」「緣份未到啫」,簡單啲講都係啲叫你要靜候再靜候就算失收始終要守啦。
「保持自己原來的樣子就好」,聽落好舒服係咪?
但如果你已經二十五歲或以上,明明好似冇咩明顯問題,四肢五官健全乾乾淨淨,有朋友有正當職業或者讀緊書有啲學歷,想拍拖但依然A0,bb你唔係未遇到對的人,係你自己本身唔係那個對的人呀。
你再坐落去等落去,等到28歲都唔會突然拍到拖㗎。正如你20歲嘅時候,都覺得25歲點都會有拖拍/拍過拖啦係咪?
世人好反對為戀愛而改變自己,but why not?例如你25歲都搵唔到工,你都知有啲嘢要變啦,拍拖都係㗎咋,大部分人都唔係天生就識拍拖㗎,都係要觀察加練習加調整㗎咋。

我發現好多A0 bb都好執著,尤其女仔,好執著要遇到一個對嘅人先開始一段關係,而當你A0嘅時日越長,對「初戀情人就係我老公」嘅期待會越強烈。
尤其想結婚生仔嘅女仔,梗係啦,28歲仲係A0,如果初戀唔係老公點生仔?
但係,當你完全冇實戰經驗,就算畀你好彩遇到個啱嘅又一齊到,都唔代表就可以happily
ever after㗎。
再說,銀河系根本就唔存在那個命中注定的人,所謂「對的人」,只係願意同你互相磨合、又互相愛慕互相需要嘅人,可以係Michael可以係Samuel可以係Calvin,可以係Michelle可以係Samantha都可以係Catherine。
正如可以幫Beast解開詛咒嘅人,都冇話一定要係Belle。

我自己呢,其實都做咗好多年A0,就算後來出咗池,都係撞彩㗎咋。唔識點樣表達自己,好快就完結咗。
然後我又dry咗好耐。到頭來我覺得自己同A0係冇咩分別。
後來點呢?後來喺我第2046次因為收收埋埋自己曖昧一輪再錯過緣份之後,我實在係頂唔順自己終於想改變現況,然後我就開始咗個社會實驗(其實同個社會一啲關係都冇,完全沒有公共性純粹自我滿足,sorry for 騎劫ing「社會」)——就係不停實戰喇。
你睇再多pick-up artistsss嘅書,上再多所謂戀愛達人實質柒頭嘅堂,都不及搵個真人實戰傾一次計。
好多A0直仔直女都唔明異性點諗,實戰多啲自然都會幫你了解普遍異性嘅諗法,唔止對你出pool有幫助,對出pool之後點樣經營關係都好有幫助。
(信我,我有齊《把妹達人》啲書,我唔敢話冇用,但睇完之後就算同男神女神出街都唔會load得切識得用返出嚟,啲書擺埋一邊等你段數高啲先啦。)

可能有啲A0 bb會話:「實戰到就唔會係A0啦!」
冇人叫你搵個女神男神實戰,呢個世界咁多交友渠道,你慌識唔到仔識唔到女?

 

姐姐作為過來人,要勉勵各位施主再順便分享下當時點樣突跳出comfort zone。

我當時個實驗就係上啲交友app識人。
高齡A0 bb們,尤其係女仔,好多時都會被「梗係要男仔使主動啦」嘅觀念困住自己,而佢哋被動嘅程度唔單止係唔表白唔拖手,連釋放好意嘅訊息都唔識。
唔好再信啲台劇韓劇啦,唔會有男仔見你冇乜明顯反應都勇往直前㗎,你又冇苟姑娘咁索,有嘅話唔會坐咗喺度啦。

而好多A0 bb都有另一個共通點,男仔女仔都好,就係對於戀愛關係中嘅自己有份莫名嘅自卑——覺得人哋唔會鍾意自己。嗱,喺工作上有自信、交朋友有自信,唔等於發展戀愛關係有自信。點搞好?喺邊度自卑就要喺邊度搵返自信,正如你如果見廿份工都見唔成,桃花再好睇再多心靈雞湯都冇用。
所以你要有人證明畀你睇——你係有market㗎!

每個高齡A0背後都有唔同嘅問題,太被動、太多幻想、太自以為是⋯⋯通過不停實戰慢慢就會釐清到,亦可以喺唔同嘅對象身上學到點樣示好、營造親密感⋯⋯blahblahblah。反思再改善,再反思再改善。
難度是如何在「保持自我」和「改變自己」之間取得平衡,就好似獨立同依賴咁,要取中庸之道,各走極端對關係都唔健康。

慢慢由text開始練習,順暢咗之後自然就會出嚟食飯睇戲,再之後嘅就睇你底線喇。
幾嗒糖都好,唔好借錢畀對方唔好唔用套,最緊要有意志力保護自己就好。
途中一定會通到仆街,遇到都唔係壞事,慢慢你就會從言行間識分辨咩人係真誠,咩人係扮真誠。
仆街無分性別無分性傾向,男仔女仔都好,如果冇乜戀愛經驗真係好易畀人呃。
啲老手同你傾十句計就知你係新手,如果撞正個唔好心地嘅,呃感情呃蝦條呃錢呃乜都有。所以就當係保護自己,練習多啲學識睇人都真係好重要㗎。

記住,呢個只係練習場,正正係因為你對呢班人冇感情,所以唔work都冇所謂,呢個唔work就下個,當然都可以同時間同好多個人練習。 遇唔到對的人係正常,遇到係bonus。
不過呢,我建議大家就唔好呃人喇,例如明明唔鍾意人又扮對人有意思。尤其當你段數變高、開始可以自在地表現自己之後,可能會出現至今未出現過嘅桃花期,突然有好多人向你表示好感甚至表白,呢個時候你可能會覺得一直以嚟嘅男神女神原來都不外如是,出面個世界原來有好多選擇。
你可以有好多選擇係事實,但唔好被沾沾自喜沖昏頭腦呀bb,我一直覺得,只有懦弱的人才會收兵啊。

技巧同心得我就唔share喇,我自己都還在學習的途中,再者更重要嘅係,人人適合嘅都唔同。都係嗰句,不停實戰從而發展出自己嗰套仲好。
唔一定要學我喺交友app識人,總之用下個腦諗個啱自己嘅實驗。不過,第一步:你要行出第一步。
既然已經喺個池入面游咗咁耐都唔知點出去,如果見到條梯嘅,咪爬出去睇下池外嘅世界係點先囉。
更何況,出池只係戀愛關係嘅第一步,之後點樣經營關係才是重中之重。
唔開心嘅,最多咪返去個池度繼續游,起碼都學識咗行丫。
共勉之。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

  • Client 問我點解自己係「仆街磁石」(上) by Professor Chan
    佢自從中學由女校畢業之後就無試過單身⋯⋯連一個月都無。每次同一個男仔分手,佢好快就會同另一個人一齊,佢話佢已經唔記得單身係咩感覺。…
  • Client 問我點解自己係「仆街磁石」(下) by Professor Chan
    依家,你重新行一次,你由出世到依家呢廿五年嘅經歷。好似一段Video咁,由過去,由開始播放,播放到依家呢一刻⋯⋯你可以由得唔同嘅片段喺你個腦入面播放,唔需要去控制佢,一路播一路同我講你見到咩。」我講。…
  • 香港人就係純樸到連日本人都可以喺度橫行霸道 by 白木乩
    就算係日本老母來到香港,無左其他日本人嘅目光,無左其他日本人文化監察,無左其他日本人鬧佢「打咩」、「巴加丫囉」、「渣媽」,出名桎梏出名壓抑嘅大和民族,都係會個性解放,係「個性」解放。…
  • 【遊戲新聞】NS糞級新作引起熱潮 《Final Sword》挑戰任記的可疑作品 by 五木
    以前超任、PS 年代因為資訊不流通,但係「買」Game 又極平嘅關係,所以成日玩到糞作。隨住資訊變得流通,今時 […]…
  • 由林美戀談起——藝人基督徒,係咪好好撈? by 殷琦
    無論16 年背夫偷食單野又好、現時與非基林作拍拖都好(雖然個人而言基與非基我是ok既...~)、「High Profile處理感情生活、信主後感情生活仍然混亂」是我覺得對你算中肯的評價。但這其實都超出一般教會的接納程度了吧?既然是藝人,言行…
  • 吃子的文化 by 健吾
    我有時會想,是不是真的有人會覺得「考得唔好唔緊要」,是一句安慰語。我考得好,所以我沒有辦法說什麼。對考得不好的同學,我也不能說「你考得不好不好意思」。更甚者,我有學生因為考得不好,進不了醫科而感覺遺憾終生,幸好他是一個鍥而不捨的人,讀完一個…
歡迎讚好我們的facebook page,免費資訊源源送上。

文章資訊

ID: 168146
Date: 2017-09-06 06:34:25
Generated at: 2020-07-08 22:53:52
Permalink: https://www.vjmedia.com.hk/articles/2017/09/06/168146/謹祝各位高齡a0-盡快走出comfort-zone