身體自主搵錢很高尚,但無論如何請戴套

 

iPhone X 開賣,開價$8,588起,網傳不少笑話,例如賣肝賣腎找數,睇到都知得啖笑,無人會覺得係真。

 

 

娼妓係最古老嘅行業,部份年輕女子會販賣姿色,現今名堂很多,甚麼兼職女友(PTGF)、援交,或直接稱為舞小姐(嗯,好似好OLD SCHOOL)、妓女等等,總之,有人付錢,換取同佢性交。

iPhone 作為時下潮物,網傳有妓女為左搵快錢買新iPhone,開出「無套中出」嘅選項。

 

 

我唔係咩正人君子,我唔會喺度假惺惺話「後生女應該潔身自愛,唔應該為左物質出賣肉體」乜乜七七,呢啲說話留番俾學校啲先生講,但我認為每個人都應該為公共衛生出一分力,道理好簡單,道德嘅嘢都尚且可以獨善其身,但傳染病呢,社區感染者愈多,我感染到嘅機會就愈大。

所謂性病,用簡化左嘅字眼,同時又模糊左個概念,又神秘化左件事,對社會無乜好處。咁我講清楚先啦,性病即係「以性接觸傳染的疾病」,性接觸包含陰道性交、口交、肛交。無套中出,食藥避孕只可以防止妓女懷孕,但性器直接接觸,就會傳染性病。

咁當然,性病嘅嘢點都唔關我事嘅,我咁乖豬,是咪先。

 

咁就只係「部分正確」。

 

呢個世界唔係所有野都咁容易俾人類去分類架,傳染病都係呀,有啲好致命嘅傳染病,性接觸只係其中一個傳染途徑。

例如乙型肝炎,一般來講唔會界定為性病,但性接觸的確係好主要嘅傳染途徑。

乙型肝炎嘅傳染力高過愛滋好多,一般家庭生活接觸唔可能傳染愛滋,但係「共用指甲鉗」呢啲咁常見嘅家居習慣,係可以傳染乙型肝炎。

唔係你乖乖地永遠都同同一個人性交就無機會染上乙型肝炎。

所以呢,如果妓女感染左乙型肝炎,再返屋企同父母共用指甲鉗,或者有一日整損左然後阿哥幫佢癡膠布,咁已經可以惹到全家都有。

 

真係唔好怪我地呢啲老屎忽咁老土,係呀身體自主搵錢係好高尚,我知呀,只係希望少女們從事呢個高尚嘅職業嘅時候,都注意職業安全(?!),而消費者都應該安全第一,玩過山車都要戴安全帶啦是咪咁先(乜撚比喻)。

總之,要戴套。

 

延伸閱讀:衛生署網頁

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 168683
Date: 2017-09-14 05:24:41
Generated at: 2020-02-17 03:19:54
Permalink: https://www.vjmedia.com.hk/articles/2017/09/14/168683/身體自主搵錢很高尚,但無論如何請戴套