今時今日先開始搞page,除左買like 仲可以點起頭?

 

 

早排同個當時啱啱出書嘅朋友食飯,佢話寫嘢除咗係興趣之外,多少都滿足到自己嘅虛榮心,始終代表自己寫嘅嘢有人鍾意、自己嘅觀點有人認同。

個page開咗三個半月,就喺早兩日終於儲到一百八十個likes之後,我都出咗個post坦承like數於我不是浮雲,我都係一個虛榮嘅人,我都想多啲人認同自己欣賞自己(否則我寫日記都得啦),而現階段可以量化反映嘅,就只有隻藍色手指公。
但like數少就係少,唯有鞭自己寫得唔夠有趣、唔夠入屋、唔夠啜核⋯⋯總之唔夠好啦。
咦,咁買like呢?

事源我從朋友處得知有個新嘅寫文page,就click去睇啦,寫得不怎麼樣(我覺得啦),但like數唔低(有啲多like嘅page雖然都寫得不怎麼樣,但會明點解多人睇,你明我講邊啲啦),睇睇下就發現好多likesss嘅accountsss都係啲望落唔識睇中文嘅人,即係買like啦。
好喇,喺討論買like呢件事之前,簡單講幾點買like攻略,如何買like唔柒又不失霸氣(好似係):

1)我唔知有冇得買「心心/慘慘/嬲嬲」之類嘅reaction,如果有嘅話,唔好淨係買like。自從fb出咗唔同嘅reaction之後,如果100個都係like其實都幾唔自然,至於要咩reaction及其比例就好睇你篇文屬性,例如我呢篇多啲「哈哈」同「嘩」都無妨。
(供應商其實應該搞唔同嘅package,例如「70個like+20個心心+5個哈哈+5個嘩」之類,根據組合嘅複雜程度再調整價格,定宜家已經有喇?)

2)我見嗰個page比較近期嘅post雖然依然寫得不怎麼樣,但like數依然保持平穩,咁就自然覺得佢依然買like啦。撳開一睇,幾乎冇曬啲東南亞朋友,咦,咁係咪買like可以指定要咩種族嘅人like?(點都唔信嗰啲係真like㗎喇)如果係嘅,你買like嘅時候識做啦。

3)合乎個page嘅fans比例。如果你冇喺fb落廣告,宜家一般嚟講只有大概2%嘅page fans會睇到你個post。換言之,假設你個page有1000個like,而你個post冇咩獨特觀點、唔特別引人入勝又冇咩share rate下,但有成2、300個like呢,就好唔合理喇。

4)買comment/share,俗稱打手。當你個post百幾二百個like但零comment或者得一兩個,其實都好唔自然。供應商可以考慮「10個like/reaction+1個comment+1個share」嘅比例做package,當然,comment內容比較難量化,一面倒稱讚都幾假,你睇香港初音林羨淇啲post下面嘅comment就明。正常要tag下frd子,個frd子再like下comment回應下;或者comment下自己諗法同經驗,再互動落去;呢方面供應商再搞搞佢啦。
(題外話,我之前話只要Suga bb aka 林羨淇一日仲喺樂壇我都會支持佢,事實上我已經冇心機follow佢好耐,有咩陰功得過連hater都懶得再hate你,嗚。)

5)我覺得最重要嘅一點——你要知自己寫嘅嘢喺市場上有幾貼地、有幾多斤兩。如果你文筆累贅語法1999,內容又陳腔濫調只懂拾人牙慧,甚至邏輯狗屁不通嘅(不過冇邏輯嘅人係唔會知自己冇邏輯),你夠膽買幾百個like都只能話你勇氣可嘉。寫文寫得好唔代表會考/DSE會拎到A或者5星星,但寫得唔好一定唔會;喺網絡寫文當然同考試準則唔同,但作為一個素人,冇知名度同其他身分加持下,更是如此。

好喇,講完買like攻略講返買like呢件事本身。
我同嗰位出書嘅朋友討論咗下,首先買like有咩用呢?除咗砌人頭避免冷場,即係好似當年嘅Juno、宜家啲大陸歌唱比賽買專業fans之外,最重要就係買曝光率。
理論上個page/post越多人like,就越容易reach到人,所以哥買的不是like,是曝光率。
正如fb都會叫你畀錢boost post,幫你reach到多啲人,所以買like只不過係另一個增加曝光率嘅手法。
不過,做promote吸返嚟嘅like係睇完你個post再出於自主like嘅,而買返嚟嘅呢,唔使講啦。
You know,所謂品味,唔係見到名牌先知佢係好嘢,而係當佢未係名牌已經知佢係好嘢。買like唔排除會吸到一啲見多人like,就覺得係好嘢又like下嘅羊群嘅,well。

Fb宜家遍地都係KOL,好多廣告商同出版社都會搵呢啲KOL合作,而呢啲買like嘅page會唔會令商業機構傻豬豬以為佢哋好受歡迎,而畀錢落廣告甚至幫佢哋出書呢?
因為廣告商用唔用你唔係淨睇like數,仲會睇post engagement,包括click、comment同share rate;更何況人哋要使錢喺你身上一定唔會咁魯莽啦,一定睇得出你啲like有好多水份,所以如果想買like扮KOL搏R著數嘅,我真係多謝你促進經濟呀。

我唔評論買like可唔可恥啦,但我本人冇買過都唔打算買(你碌下我fb就知我啲like少到冇可能係買返嚟」)。
一嚟你睇Juno今時今日就算已經鯉魚翻身,當年買fans一事間唔中仲會被人拎出嚟笑柒,妹妹我玻璃心,要面子,不了。
二嚟點都會睇下有咩人like自己啲post㗎嘛,如果買咗like呢,啲真like就會被淹沒喺假like之中,連自己都唔知邊啲係真邊啲係假,姐姐我驚會不辨別前後竟調亂左右,不了。

更何況,如果我嘅本領唔足夠承載啲like嘅,買再多也不過金玉其外。
寧願課金去買書增長智慧同內涵,務求「我,值得擁有」。
子曰:「君子無病能焉,不病人之不己知也。」(〈衛靈公〉第十五)
孔子話:「君子怕就怕自己廢,唔怕人哋唔識自己。」(《香港語文——聽陳蕾士嘅秘密》Edwin翻譯)

所以,多謝慷慨解囊畀like嘅大家。
呢個page咁少人like你都知係好嘢,就證明你有品味啦。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 168971
Date: 2017-09-20 05:31:48
Generated at: 2020-03-30 06:05:40
Permalink: https://www.vjmedia.com.hk/articles/2017/09/20/168971/今時今日先開始搞page,除左買like-仲可以點起頭?