圖：京都で定年後生活
最近因為一個月餅廣告，引嚟好多人識講彼岸花係「死亡之花」，到底係香港太驚死亡定係咩？見到死亡兩個字就大驚小怪，雖然日本都好常用於喪事，仲話呢種花帶有不祥嘅意見，不過其實彼岸花意味死亡嘅原因，可能遠比起嗰啲吉唔吉利嘅意頭，深遠而浪漫得多。
「彼岸花，開一千年，落一千年，花葉永不相見。情不為因果，緣注定生死。」
相傳彼岸花係有段故的，有一對妖精，一個叫蔓茱，一個叫沙華；一個係花妖，一個係花仙，佢哋負責彼岸嘅開花，因為呢種花開花不見葉，開葉不見花，所以呢對妖精從來都不會相見。
但花葉不成一對，雖然有啲似韓劇，點都好，由於呢對妖精由於從來未見過對方，所以想違反神明嘅意思偷偷相見一次，點知一見鍾情，仲想私訂終生，結果嗰一年嘅花綠葉相拓，除咗嗰年嘅花特別靚之餘，亦因爲咁而引起神明憤怒，話佢哋違反天條喎，見一面就要懲罰佢哋，將佢哋打落凡間，永遠不能一齊，生生世世都要喺人間受苦，從此花不見葉，見葉不見花，生生世世都要花葉兩相錯。
過咗幾個輪迴，佛祖遇見呢株花，一睇就知咩事，就話既然解唔到詛咒，不如帶佢哋去彼岸，等佢哋開花遍野，放下過去啦。
點知去到地獄嘅三途河，呢支花唔小心跌咗落去河度，河水沖走咗佢嘅紅色，變成咗純白色嘅花，佛祖話大喜不若大悲，銘記不如忘記，就將呢種花種咗喺三途河，改名為曼陀羅華。
而三途河就係分隔陽間同地府嘅河，但由於曼陀羅華甩出嚟嘅紅色染紅咗成條河，充滿住恨意，菩薩眼見，就將一粒種子扔到水中，生出一支比之前更紅嘅彼岸花，叫彼岸花放下恨意，成為地府嘅接引使者，要亡者走向輪迴之前記住佢哋嘅紅色，而既然有曼陀羅華，紅色嘅就叫使蔓茱沙華，從此天下就出現咗兩種彼岸花。
我都唔明天條點解咁多限制，雖然啲橋段好似韓劇，不過除咗呢個故，上網仲搵到好幾個傳說，但最重要一點係，無論咩傳說都好，彼岸花都係語帶思念同愛，有人話呢棵花係代表孤獨，但係喺我眼中，假如人死後就係依靠呢種花作為指引，咁佢唔係代表死亡，而係人生中最後的回憶。可能因為咁，每年秋天都有唔少人會去崎玉呀，京都嵯峨呀賞花領悟生死，呢邊廂香港人驚訝人用錯花，世界嘅另一邊卻有惜花之人。
廣唔廣告呀，月唔月餅呀，其實對我來說真係好無謂，年年你都食月餅㗎啦，唔通因為個廣告用死亡之花就唔買咩？人哋議員夠話要對港獨份子殺無赦啦，又唔見你哋咁緊張？意頭嘅嘢，又有咩所謂。不過咁，有邊個唔想再見返過咗生嘅親人？浪漫啲諗，如果中秋時節，離開咗嘅人，在世嘅人，一係三途河之隔但同時賞月，彼岸兩花相呼應，咁都可以係人月兩團圓掛？
但願人長久，千里共嬋娟，係唔係死亡之花，咪又係一念之差，諗落，個月餅廣告真係好有詩意好有玄念添呀！
【遊戲新聞】新 PS Plus 訂閱服務推出 要補差價兼無訂閱期揀引起爭議
《彼岸島》絕對是我人生中看的其中一套最令我無言的漫畫。
【BNT-020】為保住工作的女生注射了疫苗
18年後再次見到中國人，佢露出巨龍打招呼
老師話同性戀唔啱，應該點答返佢？
【轉工適用】Reference Check 又黎料啦
2017年9月20日
