留學澳洲做兼職,我遇到兩個極品好老細

 

(photo via cc Flickr user Murray Foubister)

 

我由細到大都覺得自己死好命,中學靠甲部碌咗入間想入嘅中學、大學又夠分夠錢入到鍾意嘅大學、之後嚟咗半年搵工interview問咗兩句就問我幾時返工,係澳洲第一份工就去咗個專做豪華團嘅旅行社做份可以周圍飛周圍玩嘅工。但係原來好彩嘅唔止係做到呢份工,而係跟到呢個老細。

 

開工

唔會準時開工好似已經係間公司常識嚟,第一日返工,老細email同我講返工時間係10點到,老細成十點三先返到嚟幫我開門。由個刻開始就無再準時返過工,每次都係大約十點半先返到去,有時仲要係我開門。呢個時候有位同事開始教我點整嘢,老細經過我個位果到,問我同事:「做咩袋垃圾唔拎去掉嘅」我同事:「係呀上個禮拜唔記得掉,你拎去垃圾房啦」之後佢竟然乖乖地(誤)咁拎走咗袋垃圾!!!咩老細嚟?

 

食嘢

咁我有兩個老細啦,兩公婆,兩個都係香港移民嚟咗起碼廿年嗰啲。佢哋同典型香港人一樣一樣好鍾意食嘢,而且好嘴刁。平時公司成日請下午茶呢啲嘢唔講啦,有時放工心情好仲會捉埋我哋去食好嘢,試過去食韓燒又去過食鮑食翅。

講食嘢有次仲離譜,嗰晚係個唔知咩飯局,去其中一間悉尼最大嘅中式酒樓開啲business dinner,公司被人邀請咗去,我同女老細兩個去。食嘢好似普通宴會咁逐樣菜搬出來,但係啲嘢有啲難食、賣相差都算,啲肉好似死咗好耐咁完全唔新鮮。上到第三定第四樣菜果陣佢同host個間個老細講聲之後,直接拉咗我走人,咁就係全場面前直接行咗出門口。最後我嗰晚係肚屙嘅,真係唔該晒老細,如果佢唔拉我走我應該痾多幾錢重。

 

出去玩

有日老細無端端問我去唔去滑雪,作為一個無車人士聽到有得出去玩梗係去啦,個雪山自己揸車去都成六個鐘喎。去之前一晚有預報話可能有南極光出現,我仲專登拎埋腳架去。去到佢屋企之後我先發覺成個公司得我一個去,這上面得我、佢兩公婆同個仔,搞到我好似亂入人哋family trip 咁。

嗰晚去到佢哋雪山下低間嘅渡假屋休息一陣,等到十一點左右就去咗一齊追南極光。明明佢已經去過南極唔知幾多次,仲陪我癲。雖然最後真係乜光都睇唔到,但係個天真係好清連銀河都可以直接肉眼望到,雖然有啲可惜,但係起碼嗱返渣沙。

上到雪山佢知我第一次玩咩都唔識,專登俾錢我租架撐同搵私人教練教我。雖然最後都係學唔識滑,未落到半山已經仆咗廿次街,不過起碼知道下次佢再扭我去或者上山開工個陣上到山都係賞下雪好啦。

 

做嘢

返咗一個禮拜工之後,老細屎忽痕突然間開咗間公司賣一樣極高價嘅農產品。佢見我讀緊農業業重要主修係農業經濟學果邊,佢就開始叫我打理果邊啲paperworks。機會真係好難得,呢科搵相關intern已經好難,而家仲要實際由0開始involve 咁做唔係去做實習,又收成到運輸、出入口、廣告我都要經手,呢啲經驗一個year 1嘅國際學生邊度搵。有次趁同佢食飯,問佢不如份人工完全係佢賣農產品個間公司名出,佢聽完二話不說就話ok,等我三個月試用期完咗就開始果邊出糧。而家連intern都慳番唔駛搵,真係勁開心,原本仲想好似啲working holiday咁搵個summer去農場返3個月工第時搵工起碼有份好似關關地事嘅工作經驗,依家完全唔使煩~

 

出糧

兩個老細都應該老人癡呆,成日唔記得出糧,每次都要提先出,不過提完兩個鐘個戶口就已經多咗錢。我係兩個禮拜出一次,可能全公司人天性怕醜,佢哋又失憶,有次全公司一個月冇糧出,果日有個同事終於同老細講,佢即刻叫我哋填返咗幾日工。填完之後老細同我講返分咗兩次俾,每次幾多咁。不過個數怪怪地,明明我請過幾日假考試同玩,我同番佢講出多咗,呢個時候佢睥住我,好似同我講緊「你係咪唔想要」咁,之後我就無出聲繼續做嘢。嘩心諗咩老細嚟,係咪多錢到咁。

除咗對我好其實對其他人都好好,啱啱提到個雪山,其實佢哋有間餐廳係上面,請咗兩個working holiday 係上面做嘢,包食住,差唔多全個雪山俾最好offer嘅餐廳嚟。喺雪山開餐廳一年開得3~4個月,其餘時間都係閂門。就嚟完雪季即係餐廳就嚟閂門啦,個老細見個兩個WH做得幾好仲幫佢哋搵埋下一份工,都係包住宿嘅,仲要係悉尼入面。我就係聽住佢幫個兩個WH打俾朋友幫佢哋搵工先知道。唔係講笑真係邊度搵到啲咁好人嘅老細,會幫你搵下一份工。

 

到而家咁大個仔都係靠好彩碌到而家,遇到個咁嘅老細,唔會唔認我真係死好命:(

 

作者:山區學童

喺澳州19野雞學店讀緊俗稱調理農務系嘅農業經濟學,不過到而家都唔識耕田。寫呢啲19文係因為生活太悶又唔想係咁打機所以寫下解下悶~

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 169281
Date: 2017-09-24 05:57:40
Generated at: 2021-12-05 16:24:24
Permalink: https://www.vjmedia.com.hk/articles/2017/09/24/169281/留學澳洲做兼職,我遇到兩個極品好老細