【真人真事】千祈唔好喺地鐵用手提風扇

 

大家好,我叫阿鋒。我天生體質本身好大汗,一到夏天落街唔夠十分鐘,連底褲都濕埋。

正所謂一熱就出汗,一出汗就臭,一被身邊人發現你臭,成世都返唔到轉頭。
所以,每次出街我都一定帶把廢青扇(手提風扇),背囊再加多把做後備。不過咁,我以過來人身份勸大家一句,千祈唔好喺地鐵入面用廢青扇。

記得有一次,我由屋企行到落地鐵站已經出晒汗,當時又係放工時間,微弱嘅冷氣根本唔足夠我降溫。

好彩,入到車廂冷氣稍微大返少少,我就對住個風口位,再加埋把廢青扇,人生最爽快莫過於此。我仲扮晒舉高手緊握扶手,等冷空氣流入濕潤嘅加拿大,經由胸口由另一邊加拿大吹出,做成術語所講嘅「換氣」功效。

當地鐵去到銅鑼灣站,外面嘅人群如黃江氾濫般一發不可收拾咁湧入車廂,令車廂氣溫一下子又提升咗0.4度。

我作為一個堅忍不拔嘅男子漢,絕對唔係為咗呢小小事而動搖,我一定要企硬霸住個冷氣風口位。

就喺我紮實馬步嘅時候,突然間傳來『咔』一聲!
我低頭一睇,今翅仆街鳥!

企我前面嗰位小姐嘅一頭秀麗長髮,捲咗入我把廢青扇度,就好似咒怨上身咁,成把風扇都被頭髮纏住。

我嗰把話晒都係「巴蕉扇暴風威力加強版」,一直捲啊捲、捲啊捲…話咁快把風扇就捲到上頭頂。

我望一眼前面個位小姐,好彩佢塞住耳筒陶醉喺韓劇世界入面,仲不時流露出甜絲絲嘅笑容,暫時無發現佢啲頭髮被我把風扇吞噬緊。

而更加大件事嘅係,我把風扇唔單止係暴風版,仲係簡約設計版,得一個按鍵,調節風速同開關都係撳呢個制。

於是我起勢咁撳,希望盡快熄咗部風扇佢,否則把風扇隨時會將個女人塊頭皮都吸埋入去。

但係我太心急,手又啲震,佢啲頭髮又遮住咗個顯示燈,搞到我撳多咗一下,風扇又再著返,我又要撳多四下先熄到。

老老實實,我真係唔知把風扇做乜鳩要設計個死人電筒仔,而家女人個頭好似發射訊號燈咁不停閃燈,而我又熄唔到把風扇…

一、二、三、四…一、二、三、四…哎呀撳多咗下…
再嚟,一、二、三、四…

終於我都熄咗把風扇,救咗個女人一命。不過佢掛住睇Oppa Oppa 沙冷Hea,唔得閒報答我。

唔緊要,英雄係不求回報,而家更需要解決嘅問題,係把風扇完全卡死喺個女人頭後腦,我紅解返開佢…

點知,呢個時候列車到達金鐘站,個女人一開門就衝咗出去,我二話不說梗係追出去啦!話晒我都加咗廿蚊特登買暴風威力加強版。

「喂!小姐!我個暴風仔啊!」我一手從後拉住個女人。

呢一下拉扯,女人個耳筒鬆開咗,套韓劇播緊「you are my destiny~括嗲」

於是,我決定打蛇隨棍上,同佢講:

我相信,今天的,相遇,是一種,緣分。
糾纏在妳,腦裡,的,結…
我希望,能為妳,解開。
儘管花上,一輩子…

原來,個女人唔單止鍾意睇韓劇,仲鍾意睇鄺俊宇。
今次真係要Thanks Kwong God!

佢竟然覺得我同佢呢次相遇好浪漫,係上天鄺神嘅安排。
所以話人算不如天算,我咁靚仔,竟然都要靠呢種相遇嚟識女朋友。

我同佢由嗰日起就開始拍拖…

不過,我一直對暴風仔耿耿於懷,所以無論行街、睇戲、食飯…一有時間我就會逐條逐條頭髮將佢解救出嚟。

有次女朋友去剪髮,佢同髮型師講「照返呢個髮形修少少就ok」,我見到個髮型師望住佢個頭目瞪口味,猶疑咗好耐都唔敢剪第一刀,真係辛苦晒。

日子一日一日咁過去,「暴風仔」已經完全同女朋友把頭髮融為一體。我唔忍心佢就咁被吞噬,所以有時趁女朋友唔覺意,我會駁個尿袋入去幫暴風仔叉電。

件事過咗成年,我覺得係時候要有個解決。
於是,我趁女朋友訓著咗,拎把較剪連埋頭髮一刀兩斷。

點知…正當我想一嘢剪落去嘅時候,女朋友突然捉住我隻手!

「唔好!」
「吓?咩唔好啊?」
「唔好剪走個風扇,其實由第一日開始,我已經知…但我覺得呢個係緣分,同埋我好鍾意你一邊攬住我,一邊摸住我個頭嘅感覺,所以…由得佢啦,好無?」

「但無咗把風扇…我臭啊。」
「唔緊要,我唔介意。」
「但係…」
「我把唔緊要啊!你唔好諗住剪我把頭髮!」
「哦…」

呢一刻我真係感動到喊咗出嚟,結論,鍾意睇鄺神嘅女仔,都係極品嚟。

 

*********

 

(ps:雖然睇鄺神係極品,但睇藍橘子係極品中嘅極品。)

作者:藍橘子

藍橘子
仍未被世人發掘的詭異生果。至今共推出七本個人小說,不停寫作,目標是將荒誕奇怪的故事嵌進讀者的腦裡。若你喜歡怪人,其實我很美。專頁:http://www.facebook.com/BlueGodzi

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 169300
Date: 2017-09-24 03:47:39
Generated at: 2020-10-25 05:03:32
Permalink: https://www.vjmedia.com.hk/articles/2017/09/24/169300/【真人真事】千祈唔好喺地鐵用手提風扇