其實係旺中變咗,定係我哋變咗?

 

話說中學時期嘅我都係一個MK妹嚟,久唔久都會去旺角度蒲,夾下band掃下街,必定會去某一間街邊檔度飲布甸奶茶(有台灣腸同雜丸賣,已經唔記得點去),跟住又去另一檔度食煎釀三寶同炸大腸。最鍾意就係約埋姊妹去旺中血拼,因為幾百蚊已經夠買一季嘅衫,你知啦中學生無乜錢嘛㗎,所以嗰陣旺中對我嚟講簡直係購物天堂。

旺中有三層,衫褲鞋襪、袋、飾物樣樣齊,隔離係新之城,品質會好啲,但價錢都會貴啲,所以比較少行。有時我會夾包糖一路食一路行,如果行到肚餓就食冷麵配八爪魚同蟹柳頂住先,行晒三層先同姊妹落地牢間大家樂食下午茶同整理戰利品。雖然間間嘅款式都係大同小異,但選擇都算多,真係睇到花多眼亂。大概每次行完都有六、七、八袋,然後我就會將佢迫埋兩袋塞落背囊,好滿足咁返屋企。

返到屋企第一時間就係拎晒啲衫出嚟試,因為唔啱係有得換,有啲衫望落好靚,但著上身又係另一回事。一分錢一分貨,衫會縮水,鞋又快爛,所以都係著一兩季,不過呢啲都係以前嘅事,我已經好多年無行過旺中,而家轉咗行Forever 21(執埋)、H&M、idc、cotton on等等,主要都係睇返工衫為主。

然後有一日我竟然心血來潮想返去睇下懷舊下,我發現旺中原來已經唔同咗好多,最大分別係多咗好多嘢食(食評後補)。我見到好多衫都係細件到喊,根本無可能著到,而且啲款已經唔再啱我style,甚至無興趣揭嚟睇。後嚟終於見到有條連身裙幾靚,點知一拼上身,嘩,同我而家件衫差唔多長,係咪我高咗又大份咗呢?

有一樣無變嘅係旺中仲係好多人行,迫到爆,八成都係後生仔女,有sweet到爆嘅小情侶,有嘻嘻哈哈嘅妹妹仔,諗諗下我到底有幾耐無同姊妹一齊去買過衫呢?大個咗之後好多時都係放工自己一個去睇衫,一嚟懶得約人,二嚟時間唔多,買完都想返屋企休息,係星期六、日先好啲。行咗唔夠半個鍾,我就諗其實係旺中變咗定係我變咗?真係睇唔透,只係突然間又覺得自己老咗一截,真係有衝動想唱返句:「我的青春小鳥一去不回來。」

 

 

作者:小盛女

小盛女
80後中環打工妹,誓要追求work life balance的生活,並當一個幸福的食家。FB PAGE:https://www.facebook.com/littlevibrantgirl

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 169316
Date: 2017-09-24 05:46:36
Generated at: 2020-11-01 02:56:42
Permalink: https://www.vjmedia.com.hk/articles/2017/09/24/169316/其實係旺中變咗,定係我哋變咗?