「前世作孽，男友創業」

從小就沉迷玩棋，由圍棋象棋到萬智戰鎚地下城都有玩。
願望係大個可以做地下城的魔王，有錢有地有權有勢。
不過知道哂唔夠太陽會骨折同抑鬱之後，打消左依個念頭。
大左都無咩變，依然中二病發作，有珠寶批發唔做，開左間棋院來玩。
最近，某位棋友發牢騷，大致就係開棋院同女友日嘈夜嘈，我第一時間諗到兩句：

「前世作孽，男友創業」

物種繁衍，基於生存考量，基因實會出現各種差異，以適應環境變化，或作為保險手段。
係各種本質當中，最常出現矛盾就係冒險創新同安穩守舊兩大價值。
前者推動創作，後者保存美好，都有實際用處，但又好難互相理解。
以數學為例，當得知8+9=14係計錯，冒險派大概會砍掉重練，而安穩派就傾向由14開始逐步加大。
佢同女友的矛盾，大概就係做棋院搏一鋪，定係老老實實打份工的分歧。
某程度上，都觸及左我的陰影。

唔知點解，每次拍拖，都要俾人安全感。

當然，有時會用其他修辭，例如係「懶」「唔夠成熟」「睇唔到將來」。
喂，人地朝九晚五時薪幾十，我時薪就過千，就算每日返一個鐘都唔係懶啦。
我對安全感依個概念簡直可以用厭惡來形容，大佬，要安全感可以自己去拎，好地地憑咩要人俾？
有美貌有身材有智慧有家底又性格好，駛乜怕男人走佬？
有時間管男人查手機，不如認真少少為自己增值，就算散都唔駛怕，仔死仔還在嘛。
老土又離地咁講，我認為拍拖係應該互相欣賞互相扶持的，但咁諗的人好似仲未搵到。
成日都話唔明我諗咩，大佬呀，放工就係要抖，做生意其實好煩，拍拖時唔通要做業務匯報？
到我真係講，講又唔明，明又嫌悶，我駛唔駛拍成卡通？

有時諗，發牢騷或者都會傳染的。

理性上我知道恐懼都係一種求生機制，唔識驚的人，可以好大鑊。
不過，拜託唔好一驚就發癲啦，好多人一聽創業好覺得危險，隨時會官非蝕錢破產。
其實，打工又何嘗唔危？就算唔俾人炒魷降級調職，又有幾多人靠打工買得起樓？
依個其實同我地的教育制度好有關係，因為班有錢佬唔想有人同佢爭，
一定會諗盡辦法去搞衰個制度，最好教一堆奴工出來為佢服務。
以前的奴隸制，奴隸都仲有得住，有得結婚生仔。
依家話就話自由，其實係資本奴隸制，大家有工開都仲要窮到結唔起婚，
成功結婚生仔又要俾錢興趣班，捱到仔女出來做野都差不多兩腳一伸，然後再由佢地供埋層樓。

我地的存在，好可能只係債務。

創業最難過的部份，係建立品牌的階段，現金流好可能係負數，
老板只能夠靠刻薄自己去支撐公司，奢侈品真係諗都唔駛諗。
如果無足夠理念去頂住，做左的野又唔能夠用錢來衡量，其實都幾絕望。
教育行業要建立品牌，隨時講緊係十年時間，
無啦啦叫另一半等十年，或者同講分手無分別。

諗諗下，依家先識呻笨，
無錢無地無權無勢先係最抑鬱的。
早知就去佔領地心起迷宮，插支旗話塊地係我呀爺留落，
捱到可以逆權侵佔再賣地，話唔定依家已經左擁右抱後宮三千。

作者：周怡

閱讀後覺得好，請多多讚好及分享～：）