【港女旅日】係長本來想調我返香港in charge 搞特賣，我反而建議留日發配山卡啦地方. . . . . .

席上，大家飲了幾杯，開始講野直接好多。

部長﹕「蝶san，你見到香港搞啲event成績咁好，你係咪都想搞呢﹖嚟緊都仲有㗎。」
同事A﹕「香港人做返in charge一定賣得仲好啦」
我﹕「都係㗎，我都有信心喺香港會sell得好。不過到大時大節，日本啲分店唔係仲忙咩？」
係長﹕「係㗎！你有無興趣去京都？最多外國遊客。」
我﹕「都係嘅。但係，京都啲店舖都已經做得有聲有色，啲staff應該都識英文。反而有啲店舖明明有好多遊客，都係業績唔太好⋯⋯」
部長﹕「係呀，如果本身做得好，掟你過去都無乜意思。咁不如去XXX？（聽唔到係日本邊度，應該係啲山卡啦地方。）係長，你覺得點？」
係長﹕「係呀係呀，XXX（地方名）好呀！蝶san你年尾洗唔洗請假返香港？」
我﹕「唔返啦，9月返咗一次。」
係長﹕「部長，咁我即刻同YY部長（另一個部門）傾下，年尾調蝶san去XXX店度幫手一個星期。」

老老實實，返香港幫手event唔係唔好，
只係怕自己太口響，香港人又難serve，
到時「売上」（sales）唔夠高真係唔知點交代。

去京都舖又無乜挑戰，因為原本已經賣得好好。

而家成功爭取去日本其他店，發揮到自己作用又唔洗太大壓力。

最重要係，我覺得佢地真係好信任我，
即使唔係100%放心，仍願意比機會我試。

以前公司，提咗一個idea，檢討呢個部門嗰個部門，
最後換來一個No。
開頭都幾熱血，然後團火就慢慢被淋熄，
眼淚開始轉為戾氣，再化為失望同無感覺。

而家，同上司講咗意見，會即刻諗實唔實行到，
點樣實行。
就算真係唔得，都會即刻有個理由，例如系統上做唔到等等。
感覺大家真係為件事好，做事有效率好多，
似返一間正常公司。

你地成日聽我新公司幾好，
其實可能只係我舊公司真係太痴線，
而我由地獄上返來人間咁解。

作者：林璃蝶

林璃蝶，九十後香港博客。活在記憶，迷戀過去，因此喜歡以文字記下已發生的一切。最新文章﹕《張先生，謝謝你來探望我，可是……》、《鳩夢想》、《點解香港人就係唔識欣賞魔術》等。 Facebook專頁：https://www.facebook.com/o.indicum

閱讀後覺得好，請多多讚好及分享～：）