收陀地的老母

 

對我黎講,俾家用大至上分做兩種情況。

第一係「需要型」,第二係「貢獻型」。

「需要型」嘅意思即係講緊你屋企人無乜積蓄,家境唔係特別好,直情係如果你唔俾家用會連飯都開唔到嗰隻;又或者咁唔好彩,有屋企人病咗,要長期俾醫藥費等等,咁依啲情況,我就會覺得出咗黎做野有能力去幫輕下屋企絕對係天經地義。

但我想討論既係第二種既「貢獻型」。

「貢獻型」嘅意思即係話以上不幸嘅事都無發生喺你屋企,屋企人健健康康、阿爸阿媽有足夠嘅積蓄,兄弟姊妹亦都生生性性咁讀書,又或者佢地已經投身社會出咗黎做野,唔需要你特別去照顧。換句說話講,即係就算你一蚊都唔出,對成嗰屋企嘅運作係完全無影響。

既然對屋企嘅運作係唔會有任何影響,好自然地你就會問:咁點解我要俾家用呢?

我答你,因為世界上有種生物叫老母。

依種靈長類嘅生物,每逢月尾就會好似饑餓嘅野獸一樣,一手捉你入房任由佢魚肉。

「阿仔,月尾啦喎。」

「得啦,聽日過數俾你。」

你望住自已嗰份糧,本身已經唔係多,撇除咗番工嘅交通食飯洗費後其實已經所剩無幾,一交埋家用,根本就儲唔到錢。
就係因為老母嘅一句說話,你每個月就無咗幾千蚊。你望住自己戶口嗰粒數,嗰心口即刻嗱住嗱住咁痛。

但係你已經唔想再俾依種家庭式嘅陀地,所以你終於鼓起勇氣去問老母依個世紀難題。

「老母,既然屋企唔等我開飯,點解我要俾家用呢?」

「衰仔!俾家用係代表你對依個屋企既貢獻,我養到你咁大,出咗黎做野梗係要孝順下父母啦!依加叫你俾幾千就係到嘈嘈嘈!」

自幼對數學有濃厚興趣嘅你即刻屈指一算,但計極都唔知究竟老母係點樣去計應該俾幾多家用。你人工一萬三,家用要俾五千,即係你人工嘅38.46%,點解會係依個咁specific 嘅percentage 呢?點解老母唔駛cal機都計到?點解唔係俾一半又或者四份一呢?乜唔係會易計啲咩?你完全諗唔透。

「唉,阿仔,俾幾多家用其實都係象徵式嫁姐,睇下你有幾多心意啦。一家人點解要成日根根計較?」

聽到依到,你冷笑左一聲,因為如果俾家用係象徵式嘅話,即係話你俾一蚊都無問題。但你深深明白到俾一蚊家用老母,後果係會不堪設想,而依個賭博係連赌神高進都唔會all-in。

你又開始諗:依加我一萬三人工就要比五千蚊。咁如果我第時一個月搵成十萬蚊,家用又可唔可以維持番五千蚊呢?如果唔得,又點解呢?究竟所謂象徵式又係乜野意思?

但令你最介意嘅係個句「家用係代表你對依個屋企既貢獻」,點解對屋企既貢獻一定要用錢黎量度?講到好似如果你唔俾家用就等於你對屋企毫無貢獻,等於你就係一條好食懶非嘅廢青。

心入面受盡屈辱嘅你,終於忍唔住又走咗去同老母理論。

「老母,我想問,點解一定要俾家用先等於對屋企有貢獻?如果我成日幫屋企做家務,又洗碗吸塵抹地乜都做齊,咁我又對屋企夠唔夠貢獻?同埋點解俾家用等於係孝順?咁唔通你唔俾就等於你唔孝順?咁如果我每個月成份糧俾你當家用,但係對屋企嘅事完全唔過問,唔會同屋企人有任何溝通,唔通你又會覺得無問題?
如果,你真係覺得俾家用係一個心意、一個象徵式嘅表示,咁唔該唔好set 左個金額落去。我從來都無話我會唔俾家用,但係如果你連你自己想點都搞唔清楚,咁樣對我好唔公平喎。」

你一邊露出勝利既笑容,一邊用示威嘅眼神望住老母,因為你相信你嘅偉論,係絕對會擊倒佢。

點知老母聽完即刻開大技。

「我係你阿媽!仲之我話要咁就咁!」

雖然你贏咗嗰argument,但係對個結果依然毫無幫助。

因為老母完全無用任何邏輯去答你任何一個問題。

所以唔該,下個月,準時過數。

作者:鑄墨

一個看透世事既閒人。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 170675
Date: 2017-10-15 04:06:16
Generated at: 2020-02-29 11:54:50
Permalink: https://www.vjmedia.com.hk/articles/2017/10/15/170675/收陀地的老母