十二點前瞓真係一個好難嘅任務

（photo via cc Flickr user larsjuh）

「幾點呀而家！你仲唔瞓？」媽媽生氣地說。
「你估我想夜瞓㗎？公司加班我都唔想㗎！」我說，放工其實真係好攰，又唔夠瞓，所以個人真係好燥底。
「咁你咁夜收工就唔好再玩電腦啦，你知唔知咁樣好傷身㗎！」媽媽說。
「咁我都要放鬆下，得啦，你唔好理我啦。」我說。
「咁後生就捱到咁，幾時捱到老呀你？」媽媽說，我無再應佢。

記得幾年前我仲係做緊agency，加班係每日都會發生嘅事，一星期都唔知有無兩日可以返到屋企食飯，通常都係喺公司買飯盒食，食完又再做，星期六日就出event，有時趕起上嚟連續幾晚加班到凌晨三、四點都試過。除此之外，24小時啲客都會whatsapp你，真係人都癲，最慘係咁辛苦人工都係唔會高，因為嗰陣仲係畢咗業無耐，無乜工作經驗，亦無議價嘅能力，有人請已經係謝天謝地。

我阿媽平時好少鬧我，但嗰排佢成日都鬧我，因為我太夜瞓，我初初覺得好煩，因為返工已經夠辛苦，平時受腦細氣受客氣返到嚟仲要畀佢話，我真係寧願夜啲返等佢瞓咗鬧唔到我。有時返到屋企已經十二點，但係我仲會開電腦寫文，因為返工實在太大壓力，好想寫出嚟呻下抒發下。其實我點會唔知阿媽係怕我捱壞先鬧我，只不過當時真係「人在江湖，身不由己」啫。

捱咗一段時間之後我就轉咗in-house marketing，而家都會加班，但大部分時間都係七點前收工，我終於過返啲正常人嘅生活，我屋企人都安心好多。雖然魚唔過塘唔肥，但係暫時都唔想轉工住，因為懶得去重新適應一個新嘅工作環境同同事，至少我而家放工可以返屋企食飯，可以去學跳舞，可以去做facial，夜晚十二點前就可以瞓。

「你琴晚幾點瞓？」我說。
「五點。」男友Mike說。
「吓！有無搞錯呀，我叫咗你返到去即刻沖涼瞓㗎！」我說。
「我睇咗套戲呀嘻嘻。」Mike說。
「你已經連續成個星期都四、五點先瞓，加班就無得好講啦，琴日放假你都咁夜瞓？點解你咁唔錫身㗎！」我生氣地說。
「咁我都要放鬆下，得啦，你唔好理我啦。」Mike說。

唉，我終於都深深明白我媽以前鬧我嘅心情了。

作者：小盛女

80後中環打工妹，誓要追求work life balance的生活，並當一個幸福的食家。FB PAGE：https://www.facebook.com/littlevibrantgirl

閱讀後覺得好，請多多讚好及分享～：）