建制派議員玩面書搶票,係立於不敗之地嘅戰役

 

呢度嘅所謂建制派,其實只係好籠統咁講。

唔同類型嘅建制派,有唔同嘅選票來源,一般咁講,民建聯工聯會呢啲傳統本地左派,靠嘅係組織票,民建聯嘅基礎係居民組織,工聯會嘅基礎係工會,佢哋啲票,就係飯民口中蔑視嘅「鐵票」,民建聯唔記得邊個曾經喺電視講「鐵票唔係票咩?!」,嗰陣我仲讀緊大學(好似係),對政治無咁理會,都令我印象深刻。

呢啲票點解叫鐵票?與其你信飯民口中靠蛇齋餅,不如務實啲正視啦。呢啲組織入面嘅人,其實成日過組織生活,即係有咩事就會去組織嗰度分享或求助,阿邊個邊個唔得閒睇住細B,佢咪交俾信得過嘅人睇住先,阿邊個睇醫生好似聽唔明醫生講乜,然後個組織領導就趕去醫院幫幫眼,呢啲一齊生活過,共過患難又好,歡樂又好,到選舉,幫過你嘅人,叫你投俾阿某某啦,咁好順理成章,一個好人介紹嘅人,都係好人,呢啲票,唔係飯民隨口講咁容易拿到,係要長期咁樣經營一個社區。至於蛇齋餅,咪就係呢啲之外,俾大家有個食嘢傾計嘅歡樂時光,只係輔助,主菜係上面嗰啲生老死葬,要洗你幾多錢先?仲要好多時有贊助的。(至於點解要贊助?遲啲有機會講下。)

 

點解明明我話講玩面書,突然講左去鐵票?因為呢個就係建制派嘅基本票源。

即係話,反對派嘅輿論如果無法動搖建制派嘅基本票源,建制派原有嘅得票就唔會少左,你反對派鬧鬧鬧,個私奶采你都傻,就係呢啲情況。(有無輿論反壓建制組織票呢?有架,0371之後嘅區議會選舉,民建聯輸到直的,但人地對社區不離不棄,下屆就收復失地有突。)

 

而暫時喺面書,建制派基本上係全線挨打的,民建聯日日直播,我唔多手去留下言,佢哋係得兩三千個VIEWS 都夠膽死,真係好核突的。睇睇周浩鼎個LIVE,冤孽啦,三千未夠,我地VJGAMER 搵GRACE 直播打PATAPATAPON(好似係)都唔只啦,醜唔醜?

 

然後睇睇工聯會旗下大將吳秋北個FB,大佬你堂堂總幹事,出個POST,紅底白字啦,又宣戰又剩啦,61?下?喂我話自己頭痕(邊個頭?)應該都唔只啦?呢個POST 我又係見到但係忍手唔同佢玩的。

 

建制派嘅現況就係咁,只要我呢類大戶忍下手,唔同佢地玩,基本上佢哋係自己對住塊鏡講野咁。

咁佢哋選情是咪會好嚴峻?梗係唔會啦,佢哋一樣贏的,佢哋啲票,唔係來自輿論,所以社交媒體上面,佢哋係垃圾係公廁都無所謂的,佢哋有嘅係組織票,係鐵票。

咁按照呢個現況,建制派玩網,稍稍有進步,識玩多少少,就算係拉到一百幾十票,呢啲對佢哋來講都係EXTRA,係除左已有嘅鐵票之外嘅錦上添花。

但對於反對派,搞組織又搞得唔好,連輿論都被人蠶食嘅話,就係傷到入肉。

 

承我琴日講,我認為中共可能已下達指令,要求在港建制派反攻輿論陣地,包括社交媒體輿論,以上嗰啲頹勢,只係一個開始,隨住佢哋越來越敢玩,佢哋累積經驗,知道點樣吸引FB 用戶嘅眼球,佢哋就算結果係摟屌多過LIKE,都係除笨有精。

記住,佢哋玩FB 贏多一票都係EXTRA,佢真正食糊係靠鐵票,而反對派呢,連輿論都輸,就乜都無。

如果真係發展到一個地步,周浩鼎開LIVE 至少有三四萬人睇,呢個先係反對派黑過黑洞嘅一日。

 

作者:白木乩

白木乩
聽聞係總編分身,專用來出D 與總編身份不符既膠文

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 170920
Date: 2017-10-19 05:50:29
Generated at: 2020-02-29 10:46:07
Permalink: https://www.vjmedia.com.hk/articles/2017/10/19/170920/建制派議員玩面書搶票,係立於不敗之地嘅戰役