今日食完飯仲有大半個鐘，諗住過修頓個邊買啲嘢，經過個巨型月亮個陣見一個人都無就行去望兩眼。其實我月頭夜晚已經去睇過一次，但係一來又多人又嘈個個都舉機影相，二來個下同隔離條友嘈緊交，望到個月亮真係完全無辦法靜落嚟欣賞諗嘢。
上佢官網睇下，原來今次來香港展出係因為想講下八月十五中秋節係中國傳統文化入面嘅意義﹑中秋背後故事同中國關於月球嘅科技發展（唔好屌住，我無歌頌黨偉大），重頭戲大概就係會配合埋個LED舞火龍同埋中秋傳統市集。依我片面嘅理解啦，個月亮想人了解月球科學以外，都仲想人去留意下唔同地方月亮代表緊嘅文化意義。配合住唔同嘅展出方式﹑場景同相應活動，每次展出嘅象徵意義都有所不同。
我就本身無成日留意開邊到有咩展覽展出睇嘅，第一次收到有關消息係來自Ｘ假期，咁無聊無乜嘢做咪去睇下人地官網講乜。睇完又有啲興趣就搵人一齊去，點知人地話覺得無乜特別，仲要話呢啲港女嘢我唔講佢一定唔會去睇，點知轉個頭咪又係同最愛但得不到的女人去睇（另一個故事不在此討論）。但係今日再經過嘅時候終於有時間靜落嚟諗下嘢，唉，其實真係好撚可悲。有幾多香港人去睇月亮之前會認真了解下人地個裝置背後想帶出嘅意思，甚至簡單於會生成呢個作品嘅原因？其實今次巨型月亮只係其中一個例子，仲有好撚多香港人都係就咁當係打卡熱點睇完就算，轉個頭就無咗件事，甚至只係淪為其中一個呃LIKE手段。
藝術家想講中秋節係中國嘅意義，但佢擺得係香港我就下意識諗到呢個巨型月亮係香港嘅文化象徵係咩呢？係咪真係淨係中秋節咁簡單？先唔講選址利東街重建乜乜乜，淨係講下個心態。我有唔少朋友都係抱住呃LIKE心態去睇，佢地目的清楚直接：我要影女神相放上IG話俾人知我夠潮，知道城內大小吃喝玩樂資訊；有啲就簡單啲，我淨係想同另一半去睇下，留下一個美好回憶。其實兩個心態都完全無問題嫁，問題在於，前者根本唔當呢樣嘢係一件認真嘅事。
「喂，我去賞個月都要咁撚認真咁做人咪好攰，佢整出來都係想有人睇姐，咁我去睇咪得囉！」妖，有邊個創作人係唔想自己作品有人睇呢？呢個係一個好基本好基本嘅願望來，但係我諗有唔少嘅創作人都更加想觀眾去了解佢地背後嘅創作動機同想傳遞嘅資訊。太認真唔夠綽頭就無人知無人睇，到你吸引到人去睇喇，又無乜人真係會花咁多心機時間去了解欣賞你嘅作品。藝術文化係現今香港嚟講好似得返兩個目的，賺錢或者呃LIKE。
我覺得認真看待一樣事物唔等於我唔輕鬆去享受呢樣嘢，舉個例呀，你去學瑜伽上堂咪又係好撚認真，咁你係咪輕鬆面對先？兩樣嘢唔掛勾嫁喎。不過如果係人地面前咁樣講只會俾人覺得我扮撚晒嘢﹑懶係有深度咁樣，最終你咪又係想呃LIKE。屌你老母！所以啲人咪話係香港搞藝術講文化係死路一條囉，啲人唔會認真覺得你係真心喜歡嫁，只會覺得你扮有深度乜乜柒柒。但係到你出名喇，又會出POST話好欣賞你堅持夢想BLA BLA BLA。收皮啦好嗎？唔好拎人地嘅堅持嚟幫自己呃LIKE啦。
「我知嫁！我去咗賞月囉。」我朋友一路講一路放相上IG，仲要捕住幾時有幾多個LIKE乜乜柒柒。其實佢又真係有享受嘅，不過佢未必係享受緊件藝術品，而係享受緊呃LIKE嘅過程。香港地，真係咪撚同人講藝術夢想，盞俾人當自己痴撚線。
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2017年10月19日
