何謂「格屎」？

近日旺角「格屎哥」*彈起，「格屎」兩字成為一時佳話。其實呢啲係背語，即係江湖術語。黑道中人為咗掩藏身份，往往會用啲特別字詞表達意思，以免外人混水摸魚。

至於個小朋友講嘅「響格屎」，絕對同安格斯、吔屎無關。「格屎」係指社團單位，問人「咩格屎」，即係問人屬於咩社團、咩幫會，多數會用「瓣」作為量詞。例如格屎哥就講：「響格屎啦！你邊瓣咖？」，邊瓣「格屎」，即係邊個社團。

成件事好old school好老香港，「格屎哥」嘅出現，完全表現住香港次文化嘅不死。其實唔少江湖術語已經變為常用語，例如雷氣等於義氣、入册意指入監、入廠解作醫院。以前港產片好興以江湖、古惑仔做背景，而對白為求真實感，多取用真實字詞嘅背語，將社團語句同日常大眾用語互用，結果街知巷聞，其他例子仲有好多，例如拖馬、疊友、臭格、底横、輪大米等，無人不曉。

不過，「格屎」就比較陌生，可能因為傳媒同電影唔太常用。但如果有睇2012年嘅電影《紮職》就會覺得似曾相識，全套戲最亮眼係譚耀文一幕。電影入面耀文（譚耀文飾演）同九紋龍（招浩強飾演）嗌霎，耀文哥霸氣盡現，講出一句：「我踩你格屎都仲得啊！九紋龍！」，令九紋龍頓時龜縮。

「踩格屎」即係踩人哋社團，亦即詆譭其他人嘅幫派，偶然都仲會聽到有人用，不過始終流於粗俗。相比之下，再古舊少少嘅香港就文雅得多，如果問人咩派，除咗用「咩格屎」之外，仲會用其他字詞代替，例如會問人「咩公司」，將社團幫會企業化，冇晒下三流嘅感覺；甚至會用「貴寶號」，「寶號」即係店舖嘅敬詞，暗指社團幫派，開頭加上「貴」字尊稱，非常有禮，絕非「格屎」二字可同日而語。

至於點解「格屎」要叫「格屎」咁核突呢？根據有限嘅查證，發現有人話「格屎，class也」，問人咩「格屎」，即係問人咩「class」，等於問人「邊一類別/邊一級/邊一瓣之類」。而事實上「class」音譯為「格屎」都不無道理，例如勇氣(guts)我哋會叫「吉屎」、面子(face)叫「飛屎」，將英文字音譯嘅傳統，香港一直都有。

不過，以上講法冇明確嘅文獻來源，我唔敢判斷真偽，唯有等旺角「格屎哥」上嚟解話，或者我建議電視台可以請佢上〈學是學非〉，講解吓「格屎」呢類語文常談，始終香港嘅背語買少見少了，仲有小朋友承傳到呢類本土文化，實在難能可貴，香港文化復興嘅任務，靠佢了。

利申：純文化探討，絕非鼓吹黑社會。

作者：潮文社

潮文社，實錄生活百態、個人小品，以流行通俗形式表達，由社長親筆原創，亦歡迎投稿。專頁：https://www.facebook.com/9.Literature

閱讀後覺得好，請多多讚好及分享～：）