「腦細咁錫你，一定唔會鬧你㗎Brenda，你食咗隻死貓佢啦，唔係全公司一鑊熟㗎咋。」同事May說。
「係囉，你同腦細講對唔住就無事㗎喇。」同事Kate說。
「其實我都知唔係好關你事，但你都知啦兩個腦細鬧交就會拉埋所有同事落水，今次委屈你喇。」經理Samantha說。
「嗯，我知點做喇。」我說，連阿姐都咁講，可以點？咪就係死死地氣同腦細認錯。
事源商場喺唔同時間都會做啲唔同主題嘅裝飾畀人影相，希望增加人流，最大型嘅通常係暑假、聖誕同新年，通常我哋公司都會早幾個月就搵agency報定價同埋交圖，然後就揀定咗邊間就會開始改圖，再定埋個timeline幾時production幾時上畫幾時拆。
公司有兩個腦細，Rex 同Michael，前者負責Marketing，後者負責睇數，佢哋好少直接溝通，通常都係靠同事傳話。我做marketing當然係直接跟阿Rex，我做嘅所有嘢亦係要經佢批准，包括timeline，原本已經定好邊日入場，但係阿Rex係一個完美主義者，個圖改咗十九幾萬次佢都唔滿意，最後agency話再改就要延期，我以為呢件事終於可以告一段落，點知佢話寧願延期都要繼續改，吹佢唔脹。
「Brenda！點解萬聖節個deco咁遲先上？」Michael生氣說。
「個圖有少少問題所以遲咗。」我說，唔通我答佢因為阿Rex話呢個期OK咩。
「咁你逼個agency提早啦！咁遲整嚟都無用，一係直情停咗佢唔好production！」Michael說。
「我問問最多可以提早幾多日完成，盡快覆你！」我說。
收咗線之後Michael就即刻打畀我阿姐，喺電話度爆爆爆爆爆，當然係加插無數粗口，阿姐就話：「今次係Brenda跟，可能佢第一次跟唔係好識，你唔好咁惡啦，一陣嚇親佢呀，同埋搞大咗件事佢又會畀阿Rex鬧㗎喇。」Michael係爆完就無事嗰種腦細嚟，有好有唔好啦，至少佢唔係記仇嗰種。
「我已經親自打咗去contractor度爆佢，會早多幾日完工，而家無事喇。」Michael說。
「對唔住呀腦細，我唔知道原來個期要set咁早。」我說。
「好少事啫，我頭先語氣都重咗少少，得啦，無事喇。」Michael說。
「嗱，都話無事㗎啦！」Samantha說。
「好嘢我哋以後有你呢個救星就得啦。」May說。
「下，唔好呀，佢會以為我成日做錯嘢，不可一不可再呀。」我說。
「Hey，佢唔會記得嘅。」May說。
其實腦細錫自己真係一件好危險嘅事，見過有啲「紅人」一遞信腦細都會因愛成恨，將優點變缺點再放大十倍，反而普普通通嗰啲同事話離職腦細係一啲都唔會理。因為轉工就等如背叛腦細，佢會諗我對你咁好，點解你仲要離開我，你同我做晒呢十九幾萬樣嘢先好走呀！吼！
為何今天好像剩下Mirror 一個偶團？
我去到2021年先唔再睇TVB——正向聯想 (Positive Association)
分手咪分手囉，三口六面講清楚好難咩？
【遊戲介紹】做個中世紀領主 《Going Medieval》極多玩法暗藏食人肉滿足饑餓度
薛定諤人生最尷尬的恥笑——薛定諤的貓實驗
寫於與舊單位分手之前——習慣化 (Habituation)
2017年10月24日
