秋天是我最害怕的季節。

 

 

身邊嘅朋友一到秋天就好開心,因為香港嘅春夏天氣實在好熱好濕令人好煩厭,一到乾爽又涼浸浸嘅秋天,就會話「呢啲先係適合人類嘅天氣嚟㗎嘛。」
而我呢,雖然純粹講天氣我都覺得春夏真係好很熱同好很笠,但我精神上會好元氣;但一到秋天,一感受到秋風起嘅嗰一日,肉體上同精神上都會突然冇咗好多電。
嗰種感覺有啲難形容,好似身體內部有啲嘢冇咗咁,然後就會覺得好空虛好空虛。謝安琪有首歌叫《脆弱》,暫時係我覺得最接近呢個狀態嘅形容。
呢個狀態,已經持續咗最少十個秋天。

大概四五年前,我有個做心理醫生嘅朋友,話我有季節性抑鬱。
其他人嘅徵狀係點我唔肯定,但我係咁嘅——

比起平時容易攰容易眼瞓,明明瞓嘅時數唔短但都係起唔到身;
亦比較容易發惡夢,今朝就嚇醒咗,心臟跳到好似會突然間咇————;
思考能力比平常緩慢同埋容易猶豫不決,最明顯就係寫文嘅速度同埋對題材嘅敏感度,仲有食飯嘅時候;
郁啲就喊,聽咩慢歌都好易喊,睇電影trailer都已經夠喊;
容易胡思亂想,例如成日凝住自己有大病、例如人哋講咩我都好易聽到弦外之音,即使對方未必有其意、例如人哋反應冷淡啲我都會亂諗嘢,但如果係春夏時節,同一件事我可能根本唔當係一回事;
然後我又會走去喊,或者發惡夢,或者喊完再發惡夢。

從結論上講,一到秋天我就會變成一個麻麻煩煩、多愁善感、甚至令人煩厭嘅人。
如果數字化去睇,80%電力係一個舒服嘅狀態的話,我喺秋天嘅電力大概係30%,冬天係50%,春天係80%,夏天就係85-90%左右。
(上網睇過啲資料,季節性抑鬱啲case通常係冬天差過秋天,但我冬天反而會好返啲。)

我冇正式睇過醫生,唔知食藥會點。由始至終這些年來,我都係苦等冬天,再期盼春天。
但呢兩年已經比以前好咗好多,因為我開始會主動搵朋友傾計,好似搵人輪shift湊我咁,如果可以當我細路女咁氹就最好添。搵多幾個苦主,人均遭受嘅孽就會少啲,傾下傾下秋天就會易啲過。

以前細個成日覺得自己要好獨立,唔使靠人都可以生活落去先係本事;但宜家會明白做人獨立什麼好,搵到願意同你分擔、適時畀你依賴嘅人,其實都係一種本事。
就好似呢個page,都係我現時嘅依靠之一。

其實我唔係唔喜歡秋天,只是害怕。
我都希望一年比一年減少害怕,直至某年秋天,身心都會覺得舒服。

 

 

作者:一百八十呎

一百八十呎
既然有人表演瞓劏房,全天候住劏房的都是行為藝術家。

閱讀後覺得好,請多多讚好及分享~:)

其他熱門文章

歡迎讚好我們的facebook page,免費資訊源源送上。

文章資訊

ID: 171184
Date: 2017-10-25 05:09:50
Generated at: 2019-12-16 18:20:57
Permalink: https://www.vjmedia.com.hk/articles/2017/10/25/171184/秋天是我最害怕的季節。